ប្តេជ្ញាចិត្តជួយប្រជាជនឱ្យចាកផុតពីភាពក្រីក្រចីរភាពខេត្ត Cà Mau មិនត្រឹមតែយកចិត្តទុកដាក់លើការផ្តល់លំនៅឋានប៉ុណ្ណោះទេ ថែមទាំងបង្កើតមុខរបរដោយចីរភាពសម្រាប់ប្រជាជនផងដែរ។ ខេត្តកំពុងប្រមូលផ្តុំធនធានដើម្បីអនុវត្តគម្រោងឧបត្ថម្ភបង្កើតមុខរបរទ្រង់ទ្រាយធំ ដោយបញ្ជាក់ពីគោលការណ៍ "មិនទុកចោលនរណាម្នាក់នៅខាងក្រោយ"។
ដោយដីបង្កបង្កើនផល ៤ កុង ប្តីប្រពន្ធរបស់លោក Lâm Văn Hãn ព្យាយាមជាមួយទម្រង់ដាំដំណាំរួមផ្សំផ្តល់ប្រភពចំណូលនឹងនរ។
តាមរយៈកម្មវិធីលុបបំបាត់ផ្ទះបណ្តោះអាសន្ន និងផ្ទះទ្រុឌទ្រោម ខេត្តបានជួយឧបត្ថម្ភផ្ទះឱ្យជាង ៩.៦០០គ្រួសារ។ ដើម្បីសម្តែងពីកម្លាំងសាមគ្គីនិងមនុស្សធម៌ ខេត្តបានបន្តអនុវត្តគម្រោងឧបត្ថម្ភបង្កើតមុខរបរសម្រាប់គ្រួសារក្រគ្រួសារប្រកៀកបន្ទាត់ក្រ គ្រួសារក្នុងគោលនយោបាយមានស្ថានភាពលំបាក និងជនជាតិភាគតិច សម្រាប់ដំណាក់កាលឆ្នាំ ២០២៥-២០២៧។ គម្រោងនេះបានបែងចែកជាក្រុមឧបត្ថម្ភជាច្រើន រួមមាន៖ ទុនបង្កបង្កើនផល មធ្យោបាយពលកម្ម ពូជ បច្ចេកទេសចិញ្ចឹមសត្វ ដីបង្កបង្កើនផល បណ្តុះបណ្តាលវិជ្ជាជីវៈ និងការងារធ្វើ។ល។
យោងតាមលោកស្រី Nguyễn Thu Tư នាយិកាមន្ទីរជនជាតិ និងសាសនា ទូទាំងខេត្តបច្ចុប្បន្នមានជាង ១២.០០០ ករណីទុក្ខលំបាកត្រូវការឧបត្ថម្ភ ហើយតម្រូវការ ទុនជាសរុបដើម្បីអនុវត្តគម្រោងនេះមានចំនួនជាង ៦២៣ ពាន់លានដុង។
គោលដៅរបស់ខេត្តគឺខិតខំដល់ឆ្នាំ ២០២៧ គ្មាននៅគ្រួសារក្នុងគោលនយោបាយ មានស្ថានភាពលំបាកខ្លាំងទៀត។ យ៉ាងហោចណាស់ ៧០% នៃគ្រួសារក្រ និងគ្រួ សារហៀបក្របានឧបត្ថម្ភដើម្បីឆ្លងផុតពីភាពក្រីក្រពហុកត្តា។ ប្រការនេះសម្តែង ពីការប្តេជ្ញាចិត្តក្នុងការ “ផ្តល់មុខរបរ” ដើម្បីប្រជាជនឈានឡើងដោយខ្លួនឯង។
គ្រួសាររបស់បង Thạch Văn Tôi សាកល្បងចិញ្ចឹមត្រីគន្ធរកាលពីឆ្នាំ ២០១៦ ហើយមកដល់ពេលនេះ បានពង្រីកផ្ទៃដីប្រហែល ៩.០០០ ម៉ែត្រការ៉េ។
ទន្ទឹមនឹងគម្រោងថ្មីនេះ ខេត្តក៏បាន និងកំពុងអនុវត្តគម្រោងគម្រោងជាច្រើនទៀតដែលមានប្រសិទ្ធភាព។ មកដល់ពេលនេះ ទូទាំងខេត្តមាន៩៥ទម្រង់បង្កើតមុខរបរ មាន១.៣៣៦គ្រួសារចូលរួម។ ទម្រង់ទាំងនេះបានបង្កើតកម្លាំងចលករសម្រាប់ការអភិវឌ្ឍសេដ្ឋកិច្ច បង្កើនប្រាក់ចំណូលនិងបំផុសឆន្ទ៖ខ្លួនទីពឹងខ្លួនសម្រាប់ប្រជាជន។ លទ្ធផលទាំងនេះបានរួមចំណែកយ៉ាងសំខាន់ដើម្បីភូមិភាគបន្ថយអត្រាគ្រួសារក្រពហុកត្តាចុះនៅត្រឹមតែ០,៩៤%(ប្រហាក់ប្រហែល ២.៨៩០ គ្រួសារ)។
កត់សម្គាល់នៅឃុំ Khánh Bình សឱ្យឃើញថា ប៉ុន្មានឆ្នាំកន្លងមក ការងារបន្ថយក្រទទួលបានលទ្ធផលវិជ្ជមានជាច្រើន។ ជាក់ស្តែង នៅភូមិទី ៧ មាន២៨គ្រួសារ Khmer ហើយមកដល់ពេលនេះ គ្មានគ្រួសារក្រទៀតទេ។ តាំងពីឆ្នាំ ២០១៦ មក រដ្ឋអំណាចភូមិភាគពង្រីកទម្រងចិញ្ចឹមត្រីគន្ធរសាច់។ គ្រួសារបង Thạch Văn Tôi ជាគ្រួសារឈានមុខក្នុងការសាកល្បងទម្រង់ថ្មីនេះ។ ដោយការខិតខំរៀនសូត្របច្ចេកទេស និងស្វែងរកទីផ្សារ ។ល។ ទើបបង Tôi បានទទួលជោគជ័យ។ មកដល់ពេលនេះ គ្រួសាររបស់គាត់បានពង្រីកផ្ទៃដីចិញ្ចឹមឡើងប្រហែល ៩.០០០ ម៉ែត្រការ៉េ។ ជាពិសេស គាត់អាចផលិតកូនត្រីដោយខ្លួនឯងបាន ដែលធានាថាមានសុខភាពល្អ។ ជារៀងរាល់ឆ្នាំ គ្រួសាររបស់គាត់លក់ត្រីបានប្រហែល ២៧ តោន។ បច្ចុប្បន្នទម្រង់នេះបានពង្រីកដល់ ១២ គ្រួសារផ្សេងទៀតក្នុងភូមិ។
ដោយការប្តេជ្ញាចិត្តក្នុងការបង្កើតមុខរបរដោយចីរភាពសម្រាប់ប្រជាជន មុខមាត់តំបន់ជនជាតិភាគតិចរបស់ខេត្តកាន់តែមានសម្រស់។
ចំណែកឯគ្រួសារលោក Lâm Văn Hãn នៅភូមិទី ៩ បានអភិវឌ្ឍសេដ្ឋកិច្ចគ្រួសារ ស្ថិរភាពតាមទម្រង់ ដាំដំណាំរួមផ្សំ និងចិញ្ចឹមត្រីមានប្រសិទ្ធភាព។ គាត់មានដីបង្កបង្កើនផល ៤ កុង ហើយប្តីប្រពន្ធរបស់គាត់ ឧស្សាហ៍ព្យាយាមធ្វើការរកស៊ីទុំឆ្នាំ។ អាស្រ័យទម្រង់នេះ គ្រួសាររបស់គាត់រកចំណូលបានពី ៥០០.០០០ ទៅ ៧០០.០០០ ដុងក្នុងមួយថ្ងៃ ប្រិតសំចៃឱ្យកូន២រូបស៊ីរៀន ។
ថ្លែងអំពីការឧបត្ថម្ភកាត់បន្ថយភាពក្រីក្រជូនប្រជាជន លេខាគណៈកម្មាធិការបក្សខេត្ត Nguyễn Hồ Hải បានសង្កត់ធ្ងន់ថា៖ “ត្រូវកំណត់ថា កាជំនួយឧបត្ថម្ភបង្កើតមុខរបរមិនមែនជាការឱ្យត្រីតែម្យ៉ាងនោះទេ ថែមទាំងជាការឱ្យនូវដងសន្ទូច ដើម្បីឱ្យប្រជាជនម្នាក់ៗក្លាយជាម្ចាស់ការក្នុងការអភិវឌ្ឍសេដ្ឋកិច្ច និងផ្លាស់ប្តូរជីវិតរបស់ខ្លួនដោយខ្លួនឯង។ តាមរយៈនោះ នឹងបំផុសឆន្ទៈទីពឹងលើកម្លាំងខ្លួនឯង ព្រមទាំងជៀសវាងផ្នត់គំនិតរង់ចាំ និងពឹងផ្អែកលើអ្នកដទៃ”។
Mộng Thường
