ថ្ងៃដើមខែវិច្ឆិកា បរិយាកាសនៅឃុំ Đất Mới រស់រវើកជាងសព្វដង។ នៅទីស្នាក់ការឃុំ បងប្អូនកំពុងរង់ចាំយ៉ាងអន្ទះសា ដើម្បីទទួលបានពូជសត្វកញ្ជ្រោងននោងដំបូងពីកម្មវិធីឧបត្ថម្ភកាត់បន្ថយភាពក្រីក្ររបស់ភូមិភាគ។ ចំពោះគ្រួសារជាច្រើន នេះមិនត្រឹមតែជាអំណោយសម្ភារៈប៉ុណ្ណោះទេ ថែមទាំងជាប្រភពនៃការលើកទឹកចិត្តស្មារតីដ៏ធំធេង បើកទិសដៅថ្មីដើម្បីមានជីវភាពស្ថេរភាព។
-9498.JPG)
គ្រួសារប្រជាជនត្រេកអរពេលទទួលពូជសត្វកញ្ជ្រោងននោង ដែលរដ្ឋអំណាចភូមិភាគឧបត្ថម្ភ។
ចំពោះបងប្រុស Sơn Phát Đạt ជាគ្រួសារក្រនៅភូមិ Biện Trượng ឃុំ Đất Mới ជីវភាពពីមុនពេញមួយឆ្នាំផ្សារភ្ជាប់នឹងវាលស្រែ រាវក្តាមចាប់ខ្យង មិនសូវធូរធារទេ។ ពេលបានភូមិភាគពិចារណាឧបត្ថម្ភចិញ្ចឹមសត្វកញ្ជ្រោងននោង គាត់រំជួលចិត្តជាខ្លាំង៖ “ខ្ញុំសប្បាយចិត្តណាស់ ព្រោះពីមុនមក ប្តីប្រពន្ធខ្ញុំរកមួយថ្ងៃចាយមួយថ្ងៃ គ្មានការសន្សំទុកទេ។ ឥឡូវបានរដ្ឋឧបត្ថម្ភពូជសត្វ គ្រួសារខ្ញុំនឹងខិតខំរកស៊ី ព្យាយាមផុតពីភាពក្រីក្រ”។
ទទួលពូជសត្វកញ្ជ្រោងននោងចំនួន ៩ ក្បាល ក្នុងនោះមាន ២ ក្បាលជាកញ្ជ្រោងមេ និង ៧ ក្បាលជាកញ្ជោ្រងសាច់ បង Đạt បានរៀបចំជ្រុងទ្រុងមួយនៅកន្លែងស្ងួត ស្អាតបាតសម្រាប់ចិញ្ចឹម។ គាត់ថែមទាំងបានចំណាយពេលរៀនសូត្របន្ថែមខាងបច្ចេកទេសចិញ្ចឹម ពីកម្មាភិបាលកសិកម្ម អ្នកដើរមុន និងតាមបណ្តាញអ៊ីនធឺណិត។ នៅភូមិ Biện Trượng ជាមួយគ្នានោះដែរ លោក Ngô Văn Đà ជាគ្រួសារប្រកៀកបន្ទាត់ក្រដែលបានទទួលការឧបត្ថម្ភក្នុងលើកនេះផងដែរ ត្រេកអរនិយាយថា៖ “រដ្ឋឧបត្ថម្ភពូជសត្វចិញ្ចឹមគឺបងប្អូនសប្បាយចិត្តខ្លាំងណាស់។ ចិញ្ចឹមសត្វកញ្ជ្រោងននោងប្រើដើមទុនតិច តែចំណេញគួរសម ចិញ្ចឹមទម្លាប់ហើយអាចពង្រីកបន្ថែម បើកឱកាសជួយពួកខ្ញុំចាកផុតពីភាពក្រីក្រដោយចីរភាព”។
យោងតាមរដ្ឋអំណាចឃុំ Đất Mới ទម្រង់ចិញ្ចឹមសត្វកញ្ជ្រោងននោង គឺជាទិសដៅមានប្រសិទ្ធភាព សមស្របនឹងលក្ខណៈដីធ្លីរបស់ភូមិភាគ។ សត្វកញ្ជ្រោងននោងងាយចិញ្ចឹម ចំណាយដើមទុនវិនិយោគតិច ឆ្លៀតយកប្រភពអាហារដែលមានស្រាប់ដូចជា ចេកជាដើម នាំមកនូវប្រាក់ចំណេញខ្ពស់ជាងច្រើនដង បើធៀបនឹងទម្រង់ចិញ្ចឹមប្រពៃណីផ្សេងទៀត។
កម្មាភិបាលបច្ចេកទេសឧបត្ថម្ភថ្នាំ និងណែនាំប្រជាជនពីរបៀបថែទាំសត្វកញ្ជ្រោងននោង ដើម្បីបងប្អូនស្ងប់ចិត្តចិញ្ចឹម។
តាំងពីដើមឆ្នាំ ២០២៥ គណៈកម្មាធិការប្រជាជនឃុំ បានពិនិត្យយ៉ាងហ្មត់ចត់នូវគ្រួសារលំបាកដែលមានឆន្ទៈឈានឡើង ជ្រើសរើស ០៤ គ្រួសារក្រ និងប្រកៀកបន្ទាត់ក្រឆ្នើមដើម្បីឧបត្ថម្ភ។ គ្រួសារនីមួយៗទទួលបានពូជសត្វកញ្ជ្រោងននោងចំនួន ៩ ក្បាល ព្រមទាំងណែនាំពីបច្ចេកទេសចិញ្ចឹមថែទាំ អនាម័យទ្រុង និងឧបត្ថម្ភអាហារក្នុងដំណាក់កាលដំបូង។ មិនបង្អង់ត្រឹមការផ្តល់ពូជសត្វប៉ុណ្ណោះទេ ឃុំនៅរៀបចំវគ្គបំប៉នបច្ចេកទេសចិញ្ចឹម តភ្ជាប់ទីផ្សារលក់ចេញ ជួយប្រជាជនស្ងប់ចិត្តពង្រីកទ្រង់ ទ្រាយទៀតផង។
លោក Trần Viết Luận អនុប្រធានគណៈកម្មាធិការប្រជាជនឃុំ Đất Mới ឱ្យដឹងថា៖ “គណៈកម្មាធិការបក្ស និងគណៈកម្មាធិការប្រជាជនឃុំ តែងយកចិត្តទុកដាក់អនុវត្តដំណោះស្រាយកាត់បន្ថយភាពក្រីក្រចីរភាព ជាពិសេសយកចិត្តទុកដាក់ដល់គ្រួសារក្រជាជនរួមជាតិភាគតិច។ តាមរយៈការស្ទង់មតិ យើងខ្ញុំជ្រើសរើសទម្រង់សមស្របនឹងលក្ខណៈនៃតំបន់ប្រជុំជននីមួយៗ។ ក្នុងនោះ ទម្រង់ចិញ្ចឹមសត្វកញ្ជ្រោងននោង បច្ចុប្បន្ននាំមកនូវប្រសិទ្ធភាពច្បាស់លាស់ ជួយបងប្អូនបង្កើនប្រាក់ចំណូល រួមចំណែកអភិវឌ្ឍសេដ្ឋកិច្ចភូមិភាគ”។
ត្រឹមតែ ២ ឆ្នាំអនុវត្ត ឃុំ Đất Mới បានឧបត្ថម្ភពូជសត្វកញ្ជ្រោងននោងជាង ២០០ ក្បាល ដល់រាប់សិបគ្រួសារក្នុងភូមិសាស្ត្រ។ អាស្រ័យហេតុនេះ អត្រាគ្រួសារក្របានថយចុះគួរឱ្យកត់សម្គាល់ ពីជាង ៦០ គ្រួសារ មកនៅត្រឹម ៣៨ គ្រួសារ គិតត្រឹមចុងឆ្នាំ ២០២៤។ មានគ្រួសារមិនតិចទេ ដែលពីមុនស្ថិតក្នុងស្ថានភាពលំបាកពិសេស ឥឡូវនេះមានប្រាក់ចំណូលស្ថេរភាព ឈានឡើងចាកផុតពីភាពក្រីក្រដោយចីរភាព។
បង Sơn Phát Đạt សង់ទ្រុងយ៉ាងរឹងមាំ ដើម្បីចិញ្ចឹមសត្វកញ្ជ្រោងននោង ប្តេជ្ញាចិត្តឈានឡើងចាកផុតពីភាពក្រីក្រ។
កម្មវិធីឧបត្ថម្ភពូជសត្វកញ្ជ្រោងននោង គឺជាជំហានចាប់ផ្តើមក្នុងសកម្មភាពកាត់បន្ថយភាពក្រីក្រ ដែលឃុំ Đất Mới កំពុងអនុវត្ត។ ពេលខាងមុខ ភូមិភាគគ្រោងនឹងពង្រីកទម្រង់ តភ្ជាប់ការប្រើប្រាស់ផលិតផល និងកសាងពាណិជ្ជសញ្ញាសត្វកញ្ជ្រោងននោង Đất Mới ឆ្ពោះទៅការអភិវឌ្ឍផលិតកម្មតាមទិសដៅចីរភាព និងមិត្តភាពជាមួយបរិស្ថាន។
សត្វកញ្ជ្រោងននោងកំពុងធំធាត់ជារៀងរាល់ថ្ងៃ សុខភាពល្អ និងរហ័សរហួន។ ចំពោះបងប្អូនឃុំ Đất Mới នោះគឺជានិមិត្តរូបនៃការចាប់ផ្តើមថ្មី សម្រាប់ដំណើរការឆ្លងកាត់លំបាកដោយកម្លាំង និងឆន្ទៈរបស់ខ្លួន៕
Kim Cương
