ប៉ុន្មានថ្ងៃនេះ ឃុំ Hồ Thị Kỷ មានភាពអ៊ូអរពោរពេញទៅដោយពណ៌សម្បុណ៌នៃវប្បធម៌ Khmer។ នៅតាមដងផ្លូវ និងគ្រប់ភូមិតំបន់នីមួយៗដែលមានបងប្អូនជនរួមជាតិរស់នៅកុះករ បរិយាកាសសប្បាយរីករាយបានបង្ហាញយ៉ាងច្បាស់នៅលើផ្ទៃមុខរបស់ចាស់ព្រឹទ្ធាចារ្យ នារី និងយុវវ័យផងដែរ។
បងប្អូនជនរួមជាតិ Khmer នៅឃុំ Hồ Thị Kỷ ចូលរួមថ្នាក់ហ្វឹកហ្វឺនដោយក្តីមោទនភាពចំពោះវប្បធម៌ជនជាតិដែលទទួលបានការអភិរក្ស។
ក្តីសប្បាយរីករាយបំផុតរបស់បងប្អូន គឺបានចូលរួមផ្ទាល់ក្នុងសកម្មភាពនៃការអភិរក្សវប្បធម៌ប្រពៃណី ចាប់តាំងពីការហាត់របាំប្រជាប្រិយ រៀនឧបករណ៍ភ្លេង រហូតដល់ការចូលរួមពិធីបុណ្យកម្សាន្តតាមលក្ខណៈប្រពៃណីបុរាណ ។
បណ្តាក្បាច់ចង្វាក់រាំជាច្រើន ដែលពីមុនគ្រាន់តែបានផ្ទេរតាមរយៈការនិយាយតៗគ្នាក្នុងសង្គមគ្រួសារ និងពូជពង្សវង្សត្រកូលប៉ុណ្ណោះ ឥឡូវត្រូវបានណែនាំយ៉ាងត្រឹមត្រូវតាមក្បួនខ្នាតនៅតាមរយៈថ្នាក់ហ្វឹកហ្វឺន។ កាយវិការ និងពិធីកម្មនីមួយៗត្រូវបានបង្ហាញឡើងវិញយ៉ាងរស់រវើក នាំគ្នាថែរក្សកេរមរតកដូនតាឱ្យត្រឡប់មកវិញក្នុងជីវភាពរស់នៅនាសម័យបច្ចុប្បន្ន។
ភាពរំភើបរីករាយបង្ហាញយ៉ាងច្បាស់តាមរយៈក្រសែភ្នែកអន្ទះសាររបស់ស្រទាប់យុវវ័យ ពេលបានអនុវត្តផ្ទាល់នូវពិធីកម្មដ៏មានតម្លៃជាលើកដំបូង ឬស្នាមញញឹមស្រស់ស្រាយរបស់មនុស្សចាស់ ពេលឃើញលក្ខណៈវប្បធម៌ជនជាតិត្រូវបានឲ្យតម្លៃ និងថែរក្សា ។ លោក ហ៊ឺវសេប អនុប្រធានគណៈកម្មការវត្តសិរីមង្គល ជ្រុងខ្មែរ (Rạch Giồng) បានចែករំលែកដោយក្តីរំភើបថា៖ "បងប្អូនសប្បាយចិត្តខ្លាំងណាស់ ការដែលបានណែនាំយ៉ាងល្អត្រឹមត្រូវតាមលំដាប់លំដោយនៃពិធីបុណ្យទានប្រពៃណី ជួយឱ្យយើងខ្ញុំយល់កាន់តែច្បាស់អំពីវប្បធម៌ប្រពៃណី ដើម្បីថែរក្សា និងបន្តទៅឱ្យជំនាន់ក្រោយទៀត" ។
យុវជនជាច្រើនចូលរួមស្ដារឡើងវិញនូវចង្វាក់រាំ និងរបាំប្រជាប្រិយបុរាណ Khmer។
គួរឱ្យត្រេកអរណាស់ដែលយុវជនចូលរួមកាន់តែផុសផុល។ បើពីមុនមិនសូវមានការចាប់អារម្មណ៍នឹងរបាំប្រជាប្រិយ ឬពិធីបុណ្យទានប្រពៃណី តែឥឡូវនេះយុវជនជាច្រើនបានសកម្មហ្វឹកហាត់ និងចូលរួមក្នុងក្រុមសម្តែងសិល្បៈយ៉ាហច្រើនកុះករផងដែរ។ បណ្តាក្លឹបនានាមួយបានរក្សាការហ្វឹកហាត់រៀងរាល់សប្តាហ៍ អនុវត្តពេញលេញនូវគ្រប់ពិធីកម្ម បង្កើតទីលានលេងកម្សាន្តដែលមានប្រយោជន៍ និងរួមចំណែកលើកកម្ពស់ចំណេះដឹងខាងសារៈសំខាន់នៃការថែរក្សាកេរមរតកវប្បធម៌។
ក្តីរំភើបរីករាយរបស់បងប្អូនជនរួមជាតិ Khmer មិនត្រឹមតែនៅក្នុងម៉ោងរៀន ឬសកម្មភាពសម្តែងកម្មវិធីសិល្បៈប៉ុណ្ណោះទេ ។ ការស្ដារឡើងវិញនូវគ្រប់ចង្វាក់ក្បាច់រាំ និងពិធីកម្មផ្សេងៗ គឺជាជំហានចាប់ផ្តើមសម្រាប់ដំណើរការដ៏វែងឆ្ងាយក្នុងការថែរក្សា និងពង្រីកតម្លៃវប្បធម៌ប្រពៃណីផងដែរ។ នៅពេលដែលលក្ខណៈវប្បធម៌ដ៏ពិសេសត្រូវបានថែរក្សាតាមក្បួនខ្នាត មិនត្រឹមតែតភ្ជាប់អតីតកាលជាមួយបច្ចុប្បន្នប៉ុណ្ណោះទេ ថែមទាំងបើកឱកាសអភិវឌ្ឍទេសចរណ៍សហគមន៍ ទាក់ទាញភ្ញៀវទេសចរមកស្វែងយល់អំពីជីវភាពវប្បធម៌ខ្មែរទៀតផង។
សិស្សានុសិស្សជាច្រើនសកម្មចូលរួមហាត់ក្បាច់របាំប្រពៃណីរបស់ជនជាតិ Khmer។
ក្តីស្រឡាញ់ និងមោទនភាពវប្បធម៌របស់បងប្អូនជនរួមជាតិខ្មែរនៅឃុំ Hồ Thị Kỷ កំពុងពង្រីកសាយភាយយ៉ាងខ្លាំងក្លា។ រាល់គ្រប់ចង្វាក់រាំ និងរបាំនីមួយៗ និងពិធីកម្មដែលបានស្ដារឡើងវិញ មិនត្រឹមជាការចងចាំដ៏រស់រវើករបស់ដូនតាប៉ុណ្ណោះទេ ថែមទាំងជាមូលដ្ឋានគ្រឹះដើម្បីសហគមន៍មានទំនុកចិត្តក្នុងការណែនាំអត្តសញ្ញាណដោយផ្ទាល់ខ្លួនសម្រាប់ភ្ញៀវទេសចរជិតឆ្ងាយទៀតផង។ វប្បធម៌បានក្លាយជាស្ពានតភ្ជាប់រវាងជំនាន់មួយទៅជំនាន់មួយ ព្រមទាំងរួមចំណែកកសាងជីវភាពស្មារតីសម្បូរបែប និងនិរន្តរភាពសម្រាប់ប្រជាជននៅទីនេះផងដែរ៕
Nguyễn Đào - Chí Thức
