លោក Trần Hớn Cơ អនុប្រធានសមាគមជនជាតិ Hoa ខេត្ត Cà Mau បានអះអាងថា៖ "អង្គការសមាគមជនជាតិ Hoa នៅខេត្ត Cà Mau មានជំនឿទុកចិត្តលើផ្លូវកែទម្រង់របស់បក្ស និងរដ្ឋ ជាពិសេសគឺគោលនយោបាយមហាសាមគ្គីជាតិ។ ជាគំរូ និងចូលរួមយ៉ាងសកម្មក្នុងចលនាប្រឡងប្រណាំងស្នេហាជាតិនៅមូលដ្ឋាន ចូលរួមយ៉ាងស្វាហាប់ក្នុងសកម្មភាពសប្បុរសធម៌ សង្គ្រោះសង្គម។ មានស្មារតីថែរក្សាប្រពៃណី ទំនៀមទម្លាប់ និងបង្ការទប់ស្កាត់ គ្រោះសង្គម"។
ចាស់ព្រឹទ្ធាចារ្យក្នុងសមាគមជនជាតិ Hoa នៅ Cà Mau ប្រារព្ធពិធីបូជាថ្វាយលោកយាយ Thiên Hậu នៅវត្តលោកយាយ Thiên Hậu សង្កាត់ An Xuyên ក្នុងឱកាសបុណ្យចូលឆ្នាំថ្មី។
ខេត្តកាម៉ាវមានជនជាតិភាគតិចចំនួន ២៨ កំពុងរស់នៅ ក្នុងនោះសហគមន៍ជនជាតិ Hoa មានចំនួនច្រើនលំដាប់ទីពីរ (បន្ទាប់ពីជនជាតិ Khmer) ដែលមានប្រមាណ ៦.២០០ គ្រួសារ/២៤.៦២៥ នាក់ ស្មើនឹងជិត ១% នៃចំនួនប្រជាជនទូទាំងខេត្ត។
ប៉ុន្មានឆ្នាំកន្លងមកនេះ សហគមន៍ជនជាតិ Hoa នៅ Cà Mau មានភាពស្វាហាប់ក្នុងការអភិវឌ្ឍសេដ្ឋកិច្ច។ តាមរយៈការផ្សព្វផ្សាយនូវគោលការណ៍របស់បក្ស និងគោលនយោបាយរបស់រដ្ឋដែលទាក់ទងនឹងការផលិត និងអាជីវកម្ម សមាគមបានជួយឱ្យបងប្អូនប្រជាជនមានសតិអារម្មណ៍ស្ងប់ចិត្តក្នុងការប្រកបពលកម្ម ធ្វើឱ្យគ្រួសារ និងសង្គមមានភាពធូរធារ។ គំរូសេដ្ឋកិច្ចមានប្រសិទ្ធភាពជាច្រើនរបស់ជនជាតិ Hoa បានរួមចំណែកមិនតិចទេសម្រាប់គោលដៅនៃការកាត់បន្ថយភាពក្រីក្រប្រកបដោយចីរភាព និងការកសាងក្រុងស៊ីវិល័យ និងជនបទថ្មីនៅភូមិភាគ។
ទន្ទឹមនឹងការអភិវឌ្ឍសេដ្ឋកិច្ច សហគមន៍ជនជាតិ Hoa តែងផ្តល់អាទិភាពចម្បងដល់ការអភិរក្ស និងលើកកម្ពស់ប្រពៃណីវប្បធម៌ដ៏ល្អប្រសើររបស់ជនជាតិខ្លួន។ មជ្ឈមណ្ឌលភាសា Hoa Dục Tài Cà Mau បានចលនាចាស់ព្រឹទ្ធាចារ្យ និងលោកគ្រូអ្នកគ្រូ បើកថ្នាក់បង្រៀនភាសា Hoaប្រមាណ ៦០ ថ្នាក់ សម្រាប់កូនចៅប្រជាជនជាង ៩០០ នាក់។ មូលដ្ឋានវប្បធម៌នានាដូចជា៖ សាលប្រជុំ និងតារាងបាល់បោះ Kim Thanh (ផ្លូវ Ngô Quyền អនុសង្កាត់ ២ សង្កាត់ An Xuyên) បានបង្កើតទីលានលេងកម្សាន្ត និងហាត់ពត់រាងកាយដ៏មានអត្ថប្រយោជន៍សម្រាប់ប្រជាជនក្នុងសហគមន៍។ ទន្ទឹមនឹងនោះ សមាគមក៏បានចលនាបងប្អូនប្រជាជនឱ្យលុបបំបាត់ទំនៀមទម្លាប់ចាស់និងអនុវត្តរបៀបរស់នៅដែលមានអរិយធម៌។
សកម្មភាពដ៏លេចធ្លោរបស់សមាគមជនជាតិ Hoa គឺការងារសប្បុរសធម៌សង្គមដោយផ្តោតលើ ស្មារតីជួយគ្នាទៅវិញទៅមក មិនត្រឹមតែជួយដល់អ្នកនៅក្នុងសហគមន៍ប៉ុណ្ណោះទេ ថែមទាំងបើកទូលាយដល់បណ្តាជនជាតិផ្សេងទៀតនៅក្នុងតំបន់ដោយមិនប្រកាន់វណ្ណៈ។ ដូចជាករណីគ្រួសារអ្នកមីង Lâm Thị Nguyệt រស់នៅឃុំ Tân Lộc ដែលធ្លាប់ជួបការលំបាករឿងលំនៅឋាន ពេលនេះទទួលបានផ្ទះរឹងមាំមួយខ្នង ដោយសារការឧបត្ថម្ភពីសមាគមជនជាតិ Hoa។
គិតត្រឹមដំណាក់កាលឆ្នាំ ២០១៩-២០២៥ សមាគមជនជាតិ Hoa បានសហការចលនាកសាងផ្ទះមេត្តាធម៌ និងផ្ទះមហាសាមគ្គីចំនួន ១៧ ខ្នង។ អំណោយជាង ៤.៥០០ ចំណែក ត្រូវបានប្រគល់ជូនដល់ដៃគ្រួសារក្រីក្រ និងគ្រួសារជិតក្រីក្រ ដោយចំណាយថវិកាសរុបជិត ៣ ពាន់លានដុង។ ទន្ទឹមនឹងនោះ សមាគមថែមទាំងបានរៀបចំសកម្មភាពស័្មគ្រចិត្តដូចជា៖ ឧបត្ថម្ភអង្ករ ជូនសៀវភៅដល់សិស្សានុសិស្ស ថែទាំមនុស្សចាស់ជរាគ្មានទីពឹង កុមារកំព្រា និងជនពិការ។
សមាគមជនជាតិ Hoa នៅ Cà Mau ជូនអង្ករសប្បុរសធម៌ដល់បងប្អូនប្រជាជនក្នុងឱកាសបុណ្យ Vu Lan។
លោក Trần Hớn Cơ បានចែករំលែកថា លទ្ធផលសកម្មភាពដែលសមាគមសម្រេចបាន គឺដោយសារការឯកភាពគ្នារបស់សមាជិកជាង ២០០ នាក់ និងការឧបត្ថម្ភពីសហគមន៍។
ក្នុងឆ្នាំ ២០២៦ និងឆ្នាំបន្តបន្ទាប់ទៀត សមាគមជនជាតិ Hoa បានកំណត់ថា នឹងបន្តសហការយ៉ាងជិតស្និទ្ធជាមួយគណៈកម្មាធិការបក្ស និងអាជ្ញាធរមូលដ្ឋាន ដើម្បីថែទាំជីវភាពសហគមន៍ឱ្យកាន់តែល្អប្រសើរ ជាពិសេសគឺគ្រួសារគោលនយោបាយ និងគ្រួសារមានការលំបាក។ បង្កើនស្មារតីសាមគ្គីភាព ហានក្លាប្រឡងប្រ ណាំងពលកម្មផលិត ដើម្បីឱ្យជនជាតិ Hoa ម្នាក់ៗនៅ Cà Mau ក្លាយជាកត្តាយ៉ាងសកម្ម រួមចំណែកដល់ការអភិវឌ្ឍរួមរបស់ខេត្ត៕
Nguyễn Quốc
