ចំពោះគ្រួសារក្រីក្រ និងគ្រួសារដែលជួបលំបាកខាងលំនៅឋានជាច្រើន ក្តីបំណងប្រាថ្នាដ៏ធំបំផុតរបស់ពួកគាត់គឺបានទទួលអំណរឆ្នាំថ្មីក្នុងផ្ទះដ៏រឹងមាំ។ ដើម្បីចែករំលែកជាមួយស្ថានភាពទាំងនោះ នាពេលកន្លងមក គណៈកម្មាធិការរណសិរ្សមាតុភូមិ Việt Nam ឃុំ Phước Long ក៏បានសកម្មក្នុងការចលនាប្រភពធនធានសង្គម ដើម្បីរួមគ្នាកែជួសជុល និងសាងសង់ផ្ទះ "មហាសាមគ្គី" ជូនដល់គ្រួសារក្រីក្រ។
រដ្ឋអំណាចភូមិភាគអញ្ជើញទៅសួរសុខទុក្ខ លើកទឹកចិត្ត និងស្វែងយល់ពីស្ថានភាពរស់នៅរបស់លោកយាយ Cao Thị Diệp ក្នុងអំឡុងពេលសាងសង់ផ្ទះ។
បន្ទាប់ពីធ្វើការស៊ីឈ្នួលនៅកន្លែងទទួលទិញអេតចាយអស់រយៈពេលជាច្រើនឆ្នាំនៅស្រុកគេ លោកយាយ Cao thị Diệp អាយុ ៦៥ ឆ្នាំ នៅភូមិ Mỹ ២ បានត្រឡប់មកស្រុកកំណើតរបស់ខ្លួនវិញទាំងក្នុងស្ថានភាពដ៏លំបាកវេទនា។ គ្រោះថ្នាក់ការងារមួយបានធ្វើឱ្យសុខភាពរបស់គាត់ធ្លាក់ចុះយ៉ាងធ្ងន់ធ្ងរ មិនអាចធ្វើការងារធ្ងន់បានទៀតទេ។ ផ្ទះស្លឹកចាស់ទ្រុឌទ្រោមនៅឯស្រុកកំណើតបានបាក់រលំ គាត់ត្រូវសុំស្នាក់នៅផ្ទះកូនប្រុសជាបណ្ដោះអាសន្ន។
ថ្ងៃដែលទទួលបានដំណឹងថាត្រូវបានឧបត្ថម្ភផ្ទះ "មហាសាមគ្គី" លោកយាយ Diệp ទប់ទឹកភ្នែកមិនជាប់។ បន្ទាប់ពីរសាត់អណ្តែតអស់ជាច្រើនឆ្នាំ ក្តីសុបិនចង់បានផ្ទះដ៏រឹងមាំមួយបានក្លាយជាការពិត។ លោកយាយ Diệp បានរៀបរាប់ថា៖ "ថ្ងៃជិតចូលឆ្នាំថ្មី ផ្ទះថ្មីបានសាងសង់រួចរាល់ ប្រៀបនឹងបានទទួលកូនចៅមកជួបជុំគ្នា ខ្ញុំសប្បាយចិត្តណាស់!"។
ដោយសារការជួយឧបត្ថម្ភទាន់ពេលវេលាពីកម្មវិធីសាងសង់ផ្ទះ "មហាសាមគ្គី" រួមជាមួយនឹងការចូលរួមពីសាច់ញាតិ បុណ្យចូលឆ្នាំថ្មីនេះ គ្រួសារបង Nguyễn Văn Sơn (អាយុ ៣៤ ឆ្នាំ នៅភូមិ Vĩnh Phú A) មានផ្ទះរឹងមាំ មិនត្រូវរស់នៅចង្អៀតគ្នា ៥ នាក់ក្នុងខ្ទមស្លឹកដែលសង់នៅក្បែរប្រឡាយទាប ដែលលិចលង់ និងធ្លុះធ្លាយពេលភ្លៀងទៀតទេ។ នៅពេលមានកន្លែងស្នាក់នៅមានស្ថិរភាព ប្ដីប្រពន្ធរបស់គាត់អាច ស្ងប់ចិត្ត ក្នុងការប្រកបការងារ អភិវឌ្ឍសេដ្ឋកិច្ច និងមើលថែកូនៗឱ្យបានរៀនសូត្រ។
យោងតាមគណៈកម្មាធិការរណសិរ្សមាតុភូមិ Việt Nam ឃុំ Phước Long ក្រោយពីការរៀបចំអង្គភាពរដ្ឋបាលរហូតមកដល់បច្ចុប្បន្ន រណសិរ្ស និងអង្គការសមាជិកបានចលនាសាងសង់ផ្ទះ "មហាសាមគ្គី" ចំនួន ១៦ ខ្នង ជូនដល់គ្រួសារក្រីក្រ គ្រួសារជិតក្រ និងគ្រួសារលំបាកខាងបញ្ហាលំនៅឋាន។ ទន្ទឹមនឹងនោះ រណសិរ្សក៏បានតភ្ជាប់ការឧបត្ថម្ភសម្ភារៈប្រើប្រាស់ សំណង់បន្ទាប់បន្សំ និងដើមទុនមុខរបរ ដើម្បីជួយគ្រួសារទាំងនេះឱ្យមានជីវភាពស្ថិរភាពជាបណ្តើរៗផងដែរ។
លោកយាយ Cao Thị Diệp សប្បាយរីករាយទទួលផ្ទះថ្មី ក្រោមការចូលរួមអបអរសាទរពីរដ្ឋអំណាចភូមិភាគ និងសប្បុរសជន។
លោកស្រី Trương Thanh Xuân ប្រធានគណៈកម្មាធិការរណសិរ្សមាតុភូមិ Việt Nam ឃុំ Phước Long បានឱ្យដឹងថា៖ "នាពេលខាងមុខ គណៈកម្មាធិការរណសិរ្សមាតុភូមិ Việt Nam ឃុំ Phước Long នឹងបន្តជំរុញការងារសង្គមភាវូបនីយកម្ម កៀរគរការចូលរួមពីអង្គការ និងបុគ្គលនានា ដើម្បីលុបបំបាត់ផ្ទះបណ្តោះអាសន្ន និងផ្ទះទ្រុឌទ្រោម រួមចំណែកលើកកម្ពស់គុណភាពជីវិតរបស់ប្រជាជន"។
ផ្ទះ "មហាសាមគ្គី" នីមួយៗដែលបានប្រគល់ជូន គឺជាការបន្ថែមនូវនិទាឃរដូវដ៏កក់ក្តៅមួយទៀតទៅដល់ជនក្រីក្រ ដែលបង្ហាញពីស្មារតីសាមគ្គីភាព ជួយគ្នាទៅវិញទៅមក និងបន្ថែមកម្លាំងចិត្តដល់គ្រួសារនានាក្នុងការ ឈានឡើង រួមចំណែកកសាងស្រុកកំណើត Phước Long ឱ្យកាន់តែអភិវឌ្ឍ៕
Tú Quyên - Ngọc Quyên
