ស្ថិតនៅឃុំ Vĩnh Phước ខេត្ត Cà Mau វត្តកោះដូង មិនត្រឹមជាទីកន្លែងសម្រាប់ប្រតិបត្តិសាសនារបស់ជនរួមជាតិខ្មែរប៉ុណ្ណោះទេ ថែមទាំងបានក្លាយជា "ផ្ទះរួម" ដ៏កក់ក្តៅ ដែលមានសន្តានចិត្តសប្បុរស តែងត្រៀមខ្លួនក្នុងការជួយជ្រោមជ្រែងដល់ចាស់ជរាគ្មានទីពឹង និងគ្រួសារដែលមានជីវភាពខ្វះខាតខ្លាំង។
អំណោយមួយចំណែកលើកស្ទួយវាសនាមួយ
ព្រះតេជព្រះគុណ Thạch Dương Trung (ស្តាំ) ព្រះចៅអធិការវត្តកោះដូង ឃុំ Vĩnh Phước រៀបចំពិធីជូនអំណោយដល់មាមីងពុទ្ធបរិស័ទ។
មានមនុស្សតិចណាស់ដែលដឹងថា ប្រភពថវិកាសម្រាប់រក្សាសកម្មភាពសប្បុរសធម៌ជាប្រចាំរបស់វត្តកោះដូង គឺមានលក្ខណៈពិសេសយ៉ាងណា។ តាំងពីឆ្នាំដំបូងនៃការបង្កើតគណៈសប្បុរសធម៌សង្គម ព្រះតេជគុណ Thạch Dương រួមជាមួយគណៈកម្មការវត្ត បានសម្រេចដកថវិកាមួយផ្នែកពីចំណូលដែលបងប្អូនជួលដីវត្តធ្វើស្រែចម្ការ ដើម្បីធ្វើជាមូលនិធិសម្រាប់ខាងការហារសប្បុរស។ កើតចេញពីកម្លាំងញើសឈាម និងការខិតខំធ្វើការនៅលើដីរបស់វត្ត គ្រាប់អង្ករនៃសេចក្តីស្រឡាញ់បានត្រឡប់មកជួយដល់ជីវិតដែលទន់ខ្សោយវិញ។
តាំងពីឆ្នាំ ២០១៥ មក សកម្មភាពជូនអំណោយជាប្រចាំមួយខែម្តង ក្នុងថ្ងៃទី ១៥ ឬ ១៤ រោច បានរក្សាមានរបៀបរៀបរយ។ ផ្តើមពីអំណោយចំនួន ៤០ ចំណែកក្នុងគ្រាដំបូង ពេលខ្លះកើនឡើងដល់ ៧០ ហើយបច្ចុប្បន្នវត្តកំពុងរក្សាស្ថិរភាពដោយជួយដល់ ៥៥ គ្រួសារដែលជួបលំបាក និងឯកកោក្នុងចំណុះវត្ត។
ជារៀងរាល់ដង បងប្អូនតែងជួបជុំគ្នានៅឧបដ្ឋានសាលា ដើម្បីទទួលអំណោយជាក់ស្តែង។ អំណោយមួយចំណែកៗរួមមាន អង្ករ ១០ គីឡូក្រាម និងទឹកប្រាក់ ១០០ ពាន់ដុង។ ទោះបីជាតម្លៃសម្ភារៈមិនធំដុំក៏ដោយ ប៉ុន្តែវាគឺជាការរួមផ្សំគ្នានៃចិត្តមេត្តាករុណារបស់វត្តអារាម និងការរួមចំណែករបស់សហគមន៍។
មិនត្រឹមតែចែកអំណោយជាប្រចាំប៉ុណ្ណោះទេ គណៈកម្មការសប្បុរសធម៌សង្គមវត្តកោះដូង ក៏ជា "តួអង្គចម្បង" ក្នុងសកម្មភាពសង្គ្រោះបន្ទាន់ផងដែរ។ មិនថាគ្រួសារមានធុរៈដូចជាមានមរណទុក្ខ ឬពេលមានជំងឺដង្កាត់ វត្តតែងបើកលាដៃជួយសង្គ្រោះ លើកទឹកចិត្ត និងឧបត្ថម្ភថវិកាឱ្យទាន់ពេលវេលា ដើម្បីជួយបងប្អូនឱ្យឆ្លងផុតពីទុក្ខលំបាក។
ផ្សព្វផ្សាយព្រះធម៌ក្នុងជីវភាពរស់នៅ
ជាពិសេស ក្នុងឱកាសបុណ្យទានប្រពៃណីជាតិ ដូចជាបុណ្យចូលឆ្នាំថ្មីប្រពៃណីជាតិ Việt Nam ឬបុណ្យទានផ្សេងៗរបស់បងប្អូនខ្មែរដូចជា៖ បុណ្យចូលឆ្នាំថ្មី បុណ្យសែនដូនតាជាដើម សកម្មភាពសប្បុរសធម៌របស់វត្តកាន់តែមានភាពផុសផុលខ្លាំងឡើង។ អំណោយដែលបានជូន មិនត្រឹមជួយឱ្យបងប្អូនមានឱកាសបុណ្យទានដ៏កក់ក្តៅប៉ុណ្ណោះទេ ប៉ុន្តែថែមទាំងរួមចំណែករឹតបន្តឹងចំណងសាមគ្គីភាពរវាងភូមិស្រុក រក្សានូវភាពស្រស់ស្អាតនៃវប្បធម៌ប្រពៃណីដែលផ្សារភ្ជាប់នឹងសីលធម៌ "អ្នកមានជួយឧបត្ថម្ភអ្នកក្រីក្រ”។
ជារៀងរាល់ខែ វត្តកោះដូងតែងជូនអំណាយដល់មាមីងប្រជាពុទ្ធបរិស័ទក្រលំបាក។
រូបភាពព្រះចៅអធិការដែលមានស្នាមញញឹមប្រកបដោយក្តីមេត្តា ជូនអង្ករ និងអំណោយនៃក្តីស្រឡាញ់ផ្ទាល់ដល់ដៃបងប្អូន បានក្លាយជាភាពស៊ាំភ្នែកនៅឃុំវិញភឿកយូរណាស់មកហើយ។ សកម្មភាពរបស់គណៈកម្មការសប្បុរសធម៌សង្គមវត្តកោះដូង គឺជាភស្តុតាងដ៏រស់រវើកសម្រាប់ទិសស្លោក "ព្រះធម៌អមដំណើរជាមួយជនជាតិ" ដោយកម្លាយចិត្តមេត្តាករុណាទៅជាសកម្មភាពជាក់ស្តែង រួមចំណែកជាមួយរដ្ឋអំណាចភូមិភាគអនុវត្តបានល្អនូវកិច្ចការធានាសុខុមាលភាពសង្គម និងបន្ថែមថាមពលដល់ជីវិតដែលកំពុងជួបលំបាកឱ្យបន្តឈានទៅមុខ៕
Thạch Đờ Ni
