ពីមុន ដោយមានផ្ទៃដីត្រឹមតែ ២ កុងសម្រាប់ធ្វើស្រែ ហើយប្រាក់ចំណូលមិនស្ថិតស្ថេរ គ្រួសារបង Lưu Thanh Tuấn ជាជនជាតិ Khmer នៅភូមិ Kinh Đứng ឃុំ Khánh Hưng គឺជាគ្រួសារក្រីក្រអស់រយៈពេលជាច្រើនឆ្នាំកន្លងមក។ ដោយមិនព្រមចុះចាញ់ជាមួយការលំបាក គាត់បានផ្លាស់ប្តូរវិធីសាស្រ្តធ្វើស្រែចទៅជាដាំដំណាំជាច្រើនប្រភេទ ដែលមានដូចជា៖ ក្រូចថ្លុង ផ្លែល្ហុង ម្ទេស និងបន្លែបបង្ការ ព្រមទាំងធ្វើការជាកម្មករសំណង់ផងដែរ។ អាស្រ័យដូច្នេះហើយ នៅឆ្នាំ ២០២៤ គ្រួសារបងក៏បានរួចផុតពីភាពក្រីក្រ ជីវភាពកាន់តែមានស្ថិរភាព និងអភិវឌ្ឍផងដែរ។
ជាមួយផ្ទៃដីចំនួន ២ កុង ប្តីប្រពន្ធបង Lưu Thanh Tuấn ដាំដំណាំចម្រុះ ដោយមានដូចជា៖ក្រូចថ្លុង ល្ហុង ម្ទេស និងបន្លែ បង្កើតបានជាចម្ការពិពធកម្ម ប្រមូលផលពេញមួយឆ្នាំ។
ដោយមិនចង់ធ្លាក់ខ្លួនក្ររហូត បង Tuấn ក៏បានប្តេជ្ញាចិត្តស្វែងរកផ្លូវថ្មីមួយ។ ដោយប្រើប្រាស់ទូរស័ព្ទ និងប្រព័ន្ធផ្សព្វផ្សាយសង្គមរបស់ខ្លួន គាត់បានស្រាវជ្រាវចំណេះដឹងខាងផលិតកម្ម និងស្វែងយល់ពីបណ្តាទម្រង់ជោគជ័យដែលសមស្របសម្រាប់គ្រួសារដែលមានផ្ទៃដីតិចតួច។ ផ្តើមពីនោះ គាត់ក៏បានកែលម្អផ្ទៃដី ហើយប្តូរទៅដាំដំណាំចម្រុះវិញ។
នៅលើផ្ទៃដីរបស់គ្រួសារ បងដាំក្រូចថ្លុងរួមផ្សំជាមួយល្ហុង ម្ទេស និងបន្លែ។ ក្នុងមួយលើក បងដាំម្ទេសប្រហែល ៧០០ ដើម និងល្ហុងចំនួន ២០០ ដើម សម្រាប់ផ្ទៃដីដែលនៅទំនេរ បងក៏បានឆ្លៀតដាំបន្លែផងដែរ។ វិធីសាស្ត្រនេះជួយគ្រួសារឱ្យមានការប្រមូលផលវិលជុំ ដោយបង្កើតប្រភពចំណូលជាប្រចាំជំនួសឱ្យការពឹងផ្អែកតែលើដំណាំស្រូវតែមួយមុខដូចពីមុន។
លោក Lưu Thanh Tuấn បានចែករំលែកថា៖ «ខ្ញុំគិតថាប្រសិនបើយើងបន្តធ្វើអ្វីៗតាមរបៀបដែលយើងបានធ្វើពីមុនមក វានឹងពិបាកក្នុងការរួចចាកផុតពីភាពក្រីក្រខ្លាំងណាស់ ដូច្នេះខ្ញុំបានចូលទៅកាន់អ៊ីនធឺណិតដើម្បីស្រាវជ្រាវ និងរៀនអំពីការដាំដំណាំ និងអភិវឌ្ឍទម្រង់សេដ្ឋកិច្ច។ សម្រាប់អ្នកដែលមានដីផលិតគឺត្រូវតែឆ្លៀតយកប្រើប្រាស់វា កុំទុកវាចោលទំនេរ។ ខ្ញុំដាំល្ហុងរួមផ្សំជាមួយម្ទេស បន្លែ និងក្រូចថ្លុងជាដើម ដើម្បីទទួលបានប្រភពប្រាក់ចំណូលជាប្រចាំ បើប្រៀបទៅនឹងប៉ុន្មានឆ្នាំមុន ជីវភាពគ្រួសារមានស្ថេរភាពជាងច្រើន»។
បន្ទាប់ពីពេលមើលចម្ការដំណាំ បង Tuấn ក៏ឆ្លៀតឱកាសពេលទំនេររបស់ខ្លួនធ្វើការជាកម្មករសំណង់។ ប្រាក់ចំណូលដែលបានពីការដាំដំណាំរួមផ្សំជាមួយនឹងប្រាក់ចំណូលកម្លាំងពលកម្មរបស់ខ្លួន បានជួយឱ្យគ្រួសាររបស់បងរកប្រាក់ចំណូលសរុបចំនួន ១៥០ លានដុង ឬច្រើនជាងនេះក្នុងមួយឆ្នាំៗ។
វិធីសាស្រ្តរបស់បង Tuấn ត្រូវបានរដ្ឋអំណាចភូមិភាគលើកទឹកចិត្តផងដែរ ជាពិសេសសម្រាប់គ្រួសារ Khmer ដែលមានផ្ទៃដីផលិតតិចតួច។ ការឆ្លៀតយកផ្ទៃដីជុំវិញផ្ទះ និងផ្ទៃដីដែលទុកចោលនៅទំនេរដើម្បីដាំបន្លែ ល្ហុង ម្ទេស និងដំណាំរយៈពេលខ្លីផ្សេងទៀត ជួយប្រជាជនបង្កើតជីវភាពរស់នៅកាន់តែប្រសើរថែមទៀត និងកាត់បន្ថយការពឹងផ្អែកលើស្រូវតែមួយមុខ។
គ្រួសារអ្នកមីង Danh Thị Lương បានឆ្លៀតយកផ្ទៃដីជុំវិញផ្ទះសម្រាប់ដាំល្ហុងចំនួន ២០០ ដើម រួមផ្សំជាមួយបន្លែ បង្កើតបានបប្រភពម្ហូបសម្រាប់គ្រួសារផង និងអាចលក់បានប្រាក់ពេញមួយឆ្នាំផងដែរ។
លោក Lê Thanh Trường ប្រធានគណៈទទួលបន្ទុកការងារខាងរណសិរ្សភូមិ Kinh Đứng បានមានប្រសាសន៍ថា៖ “គ្រួសារ Khmer ជាច្រើនក្នុងភូមិសុទ្ធសឹងជាអ្នកមានដីផលិតតិចតួច ដូច្នេះយើងខ្ញុំបានជំរុញទឹកចិត្តពួកគេឱ្យប្រើប្រាស់ដីទំនេរសម្រាប់ដាំបន្លែ ល្ហុង និងដំណាំរយៈពេលខ្លី ដើម្បីបង្កើនប្រាក់ចំណូលរៀងខ្លួន។ ខ្លួនខ្ញុំផ្ទាល់បានដឹកនាំដើម្បីបង្ហាញពីប្រសិទ្ធភាព និងលើកទឹកចិត្តអ្នកដទៃឱ្យធ្វើតាមផងដែរ។ ទោះបីជាមានផ្ទៃដីផលិតតិចតួចក៏ពិតមែន តែប្រសិនបើពួកគាត់ដឹងពីរបៀបដាំដំណាំចម្រុះ និងប្រើប្រាស់ដំណាំរយៈពេលខ្លីដើម្បីគាំទ្រដំណាំរយៈពេលវែង ពួកគាត់នៅតែអាចមានប្រភពចំណូលជាប្រចាំ”។
បច្ចុប្បន្ន ភូមិ Kinh Đứng មានគ្រួសារក្រីក្រចំនួន ២ គ្រួសារ និងគ្រួសារប្រកៀកបន្ទាត់ក្រចំនួន ៨ គ្រួសារ ដែលសុទ្ធសឹងជាជនជាតិភាគតិច។ ការប្រើប្រាស់ផ្ទៃដីដែលប្រកបដោយប្រសិទ្ធភាព រួមផ្សំជាមួយនឹងបទពិសោធន៍ក្នុងការផលិត កម្លាំងពលកម្ម និងការសិក្សាបទពិសោធ កំពុងបង្កើតជីវភាពរស់នៅ ព្រមទាំងបង្កើនប្រាក់ចំណូល និងធ្វើឱ្យជីវភាពគ្រួសារកាន់តែប្រសើរឡើងជាសន្សឹមៗផងដែរ៕
Kiều Nương
