ជាគ្រួសារក្រដែលខ្វះខាតដីធ្លីសម្រាប់បង្កបង្កើនផល បង Tô Văn Tấn នៅភូមិ Hoàng Minh ឃុំ An Trạch បានប្ដេជ្ញាចិត្តមុតមាំក្នុងការឈានឡើង ដោយស្វែងរកចម្លើយសម្រាប់ប្រស្នាថា៖ តើគួរចិញ្ចឹមសត្វអ្វីដែលមានដើមទុនទាប ប្រិតសំចៃផ្ទៃដីចិញ្ចឹម ប៉ុន្តែនៅតែមានតម្លៃសេដ្ឋកិច្ចខ្ពស់។ ទម្រង់នៃការចិញ្ចឹមកន្ធាយលឿង គឺជាចម្លើយដ៏ត្រឹមត្រូវ និងជាចំណុចចាប់ផ្តើមនៃដំណើរខិតខំដើម្បីចាកផុតពីភាពក្រីក្រ។
បង Tô Minh Tấn (អ្នកដំបូងគេនៅខាងឆ្វេង) និងកម្មាភិបាលសមាគមកសិករឃុំ An Trạch ពិនិត្យមើលថែកូនពូជកន្ធាយលឿង។
ទោះបីជាការចិញ្ចឹមកន្ធាយលឿងត្រូវចំណាយពេលប្រហែល ២ ឆ្នាំ ទើបអាចលក់ចេញបានក៏ដោយ ប៉ុន្តែជាថ្នូរមកវិញ នេះគឺជាទម្រង់ដែលងាយស្រួលអនុវត្តបំផុត។ ដោយគុណសម្បត្តិជាច្រើនដូចជា៖ ធន់នឹងមជ្ឈដ្ឋានជុំវិញបានល្អ អាចចិញ្ចឹមឡើងដល់ ៥ ក្បាលក្នុង ១ ម៉ែត្រការ៉េ ចំណាយដើមទុនទាប និងមានតម្លៃលក់ចន្លោះពី ៣០០,០០០ ដល់ ៣៥០,០០០ ដុងក្នុងមួយគីឡូក្រាម នេះគឺជាទម្រង់ "យកកម្លាំងពលកម្មធ្វើជាចំណេញ"។ ដោយមើលឃើញពីឱកាសនេះ បង Tấn បានសម្រេចចិត្តចិញ្ចឹមសាកល្បង ១០០ ក្បាល។ បន្ទាប់ពីចិញ្ចឹមបានជិត ២ ឆ្នាំ កន្ធាយលឿងបានធំធាត់យ៉ាងរហ័ស ដោយមានទម្ងន់ជាមធ្យម ៤ គីឡូក្រាមក្នុងមួយក្បាល។
ចែករំលែកអំពីលទ្ធផលដំបូង បង Tô Văn Tấn ឱ្យដឹងដោយក្តីរំភើបថា៖ “ឃើញកន្ធាយធំលឿន និងមិនសូវងាប់ ខ្ញុំនិងភរិយាសប្បាយចិត្តណាស់។ បន្ទាប់ពីលក់ឈុតដំបូង និងមានដើមទុនក្នុងដៃ ខ្ញុំក៏បន្តវិនិយោគបន្ថែមទៅដល់ ២០០ ក្បាល”។
ដោយសង្កេតឃើញថាគ្រួសារបង Tấn ជាគ្រួសារក្រមានស្មារតីជម្នះការលំបាក និងមានទម្រង់ចិញ្ចឹមសត្វពោរពេញដោយសក្តានុពល សមាគមកសិករឃុំអានត្រាច់បានស្នើសុំប្រភពទុនបុលមានការប្រាក់ទាប ដើម្បីជួយគាត់ពង្រីកផលិតកម្ម។
លោក Vũ Hoàng Minh ប្រធានសមាគមកសិករឃុំ An Trạch បានមានប្រសាសន៍ថា៖ “សមាគមបានជួយបង Tấn ឱ្យទទួលបានបុល ៥០ លានដុង ដើម្បីជួសជុលអាងចិញ្ចឹម និងទិញកូនពូជបន្ថែម ជួយឱ្យគ្រួសារបងពង្រីកទ្រង់ទ្រាយផលិតកម្ម និងឈានឡើងចាកផុតពីភាពក្រីក្រជាលំដាប់”។
ពេលមានប្រភពទុនឧបត្ថម្ភបង Tấn សម្រេចចិត្តចិញ្ចឹមកន្ធាយលឿងសម្រាប់បង្កាត់ពូជ។ វិធីនេះមិនត្រឹមតែជួយឱ្យគ្រួសារប្រឹតសំចៃចំណាយលើការទិញពូជប៉ុណ្ណោះទេ ថែមទាំងជួយពង្រីកទ្រង់ទ្រាយផលិតកម្មកាន់តែធំ។ ប៉ុន្តែ ដំណើរការ "ភ្ញាស់ពងឱ្យចេញជាកូន" ក៏ជួបការលំបាកមិនតិចដែរ។
បង Tô Văn Tấn បានសំណេះសំណាលថា៖ “ខ្ញុំបានទៅរៀនពីអ្នកចិញ្ចឹមមុនៗជាច្រើន ប៉ុន្តែអត្រាភ្ញាស់ចេញជាកូនមានកម្រិតទាបណាស់។ បន្ទាប់មក ខ្ញុំក៏បានស្វែងយល់បន្ថែមអំពីបច្ចេកទេសនៅលើអ៊ីនធឺណិត ធ្វើបណ្តើរដកពិសោធន៍បណ្តើរ រហូតទទួលបានជោគជ័យ”។
ចាប់ផ្តើមពីកូនពូជ ២០០ ក្បាលដំបូង មកដល់ពេលនេះ គាត់មានកន្ធាយលឿងតូចធំជាង ១,០០០ ក្បាល ក្នុងនោះមានកន្ធាយមេពូជជាង ៣០ ក្បាល។ ជាមធ្យមក្នុងមួយឆ្នាំ គាត់ភ្ញាស់កូនបានជោគជ័យជាង ៨០០ ក្បាល ដោយក្នុងនោះគាត់ទុក ២០០ ក្បាលសម្រាប់ចិញ្ចឹមយកសាច់លក់។
កម្មាភិបាលសមាគមកសិករឃុំ ចុះទស្សនកិច្ចទម្រង់ចិញ្ចឹមកញ្ជ្រោងននោងរបស់គ្រួសារបង Tô Minh Tấn (អ្នកដំបូងគេនៅខាងឆ្វេង)។
បង Tấn បានចែករំលែកដោយក្តីរីករាយថា៖ “កូនកន្ធាយមួយក្បាលមានតម្លៃប្រហែល ៣០០,០០០ ដុង ដែលផ្តល់ចំណូលយ៉ាងទៀងទាត់។ រីឯកន្ធាយសាច់វិញ ទោះបីជាតម្លៃទីផ្សារមានការប្រែប្រួល ប៉ុន្តែនៅតែផ្តល់ចំណូលខ្ពស់។ បូកសរុបរាល់ប្រភពចំណូលទាំងអស់ ក្នុងមួយឆ្នាំគ្រួសារខ្ញុំទទួលបានចំណូលជាង ៧០០ លានដុង”។
ក្រៅពីនេះ បង Tấn ថែមទាំងបានអនុវត្តទម្រង់ចិញ្ចឹម កញ្ជ្រោងននោងផងដែរ។ បច្ចុប្បន្ន បងមានសំពោចជាង ៣០ ក្បាល ដែលរំពឹងថានឹងក្លាយជាប្រភពចំណូលបន្ទាប់សម្រាប់គ្រួសារនាពេលខាងមុខ។
ពីគ្រួសារក្រដែលខ្វះដីបង្កបង្កើនផល ប៉ុន្តែតាមរយៈឆន្ទៈ និងការគិតគូរដ៏វៃឆ្លាត បង Tô Văn Tấn បានប្រែក្លាយដីតូចមួយនៅក្រោយផ្ទះ ឱ្យទៅជាកសិដ្ឋានដែលផ្តល់ចំណូលរាប់រយលានដុងក្នុងមួយឆ្នាំ។ ជោគជ័យនៃទម្រង់នេះមិនត្រឹមតែជួយឱ្យគ្រួសារបងចាកផុតពីភាពក្រីក្រប៉ុណ្ណោះទេថែមទាំងបញ្ជាក់ពីផ្លូវដើរថ្មីមានភាពច្នៃប្រតិដ្ឋ សម្រាប់កសិករក្នុងការបង្កើនជីវភាពនៅលើផ្ទៃដីរបស់ផងខ្លួន៕
Thuỳ Liên - Duy Phong
