នៅឃុំ Hưng Hội ដែលជាតំបន់មានបងប្អូនជនជាតិ Khmer រស់នៅយ៉ាងកុះករ គោលនយោបាយនានាមកពីកម្មវិធីគោលដៅជាតិអភិវឌ្ឍន៍សេដ្ឋកិច្ច-សង្គម តំបន់ជនជាតិភាគតិច និងតំបន់ភ្នំ (ហៅកាត់ថាកម្មវិធី) កំពុងជ្រាបចូលទៅក្នុងជីវភាពរស់នៅជាបណ្តើរៗ ដោយនាំមកនូវការផ្លាស់ប្តូរយ៉ាងច្បាស់ក្រឡែត។ មិនត្រឹមតែជាគោលការណ៍នៅលើក្រដាសស្នាមប៉ុណ្ណោះទេ កម្មវិធីពិតជាបានក្លាយជាចំណុចបង្អែកដ៏ជាក់ស្តែង ជួយឱ្យគ្រួសារជាច្រើនជម្នះបាននូវការលំបាក និងមានមុខរបរចិញ្ចឹមជីវិតស្ថិរភាព។
តាមរយៈប្រភពជំនួយរបស់កម្មវិធី អ្នកមីង Thạch Sà Linh បានផ្តល់ជូនម៉ាស៊ីនកិនទឹកអំពៅសម្រាប់ជាមធ្យោបាយដោះស្រាយជីវភាពនៅនឹងផ្ទះ។
រឿងរ៉ាវរបស់អ្នកមីង Thạch Sà Linh (ភូមិទឹកប្រៃ) គឺជាសក្ខីភាពមួយក្នុងចំណោមសក្ខីភាពដ៏រស់រវើកបំផុត។ ដោយគ្មានដីផលិតកម្ម វ័យកាន់តែជ្រេ និងសុខភាពខ្សោយ ជាច្រើនឆ្នាំកន្លងមក លោកស្រីរស់នៅដោយសារការធ្វើឈ្នួល ចំណូលមិនទៀងទាត់។ ជីវភាពដែលធ្លាប់តែលំបាក កាន់តែតានតឹងថែមទៀតនៅពេលមានជំងឺបៀតបៀនជាញឹកញាប់។ តាមរយៈប្រភពជំនួយរបស់កម្មវិធី អ្នកមីងត្រូវបានផ្តល់ជូននូវម៉ាស៊ីនកិនទឹកអំពៅ ដែលជាមធ្យោបាយដោះស្រាយជីវភាពនៅនឹងផ្ទះ។ អាស្រ័យហេតុនេះ អ្នកមីងមានចំណូលបន្ថែមសម្រាប់ចំណាយលើជីវភាពប្រចាំថ្ងៃ និងធ្វើឱ្យជីវភាពកាន់តែមានស្ថិរភាព។
ក្នុងស្ថានភាពលំបាកដូចគ្នា ប្តីប្រពន្ធអ្នកមីង Lý Thị Phal នៅភូមិ Cái Giá កាលពីមុនត្រូវរស់នៅក្នុងផ្ទះដ៏ទ្រុឌទ្រោម មុខរបរចិញ្ចឹមជីវិតពឹងផ្អែកទាំងស្រុងលើការធ្វើឈ្នួលមិនទៀងទាត់។ ក្រោយពីត្រូវបានមូលដ្ឋានគាំទ្រកសាងផ្ទះមេត្តាធម៌ ពេលនេះគ្រួសារអ្នកមីងមានកន្លែងស្នាក់នៅរឹងមាំ។ មិនត្រឹមតែប៉ុណ្ណោះ ធុងស្តុកទឹកសាបដែលទទួលបានការឧបត្ថម្ភ បានជួយឱ្យគ្រួសារម្ចាស់ការលើប្រភពទឹកប្រើប្រាស់ក្នុងរដូវប្រាំង កាត់បន្ថយការព្រួយបារម្ភអំពីការខ្វះខាតទឹកដែលអូសបន្លាយជាច្រើនឆ្នាំមកហើយ។
តាមរយៈករណីជាក់ស្តែងទាំងនេះ យើងអាចមើលឃើញថា កម្មវិធីបាន “ប៉ះ” ចំតម្រូវការជាក់ស្តែងរបស់បងប្អូនប្រជាពលរដ្ឋ។ ខ្លឹមសារនៃការគាំទ្រទាំងអស់សុទ្ធតែតម្រង់ទៅរកការដោះស្រាយការលំបាកចាំបាច់ដូចជា៖ លំនៅឋាន ទឹកប្រើប្រាស់ និងមុខរបរចិញ្ចឹមជីវិត...។
អ្នកមីង Lý Thị Phal ទទួលបានការគាំទ្រធុងស្តុកទឹកសាប ជួយឱ្យគ្រួសារម្ចាស់ការលើប្រភពទឹកប្រើប្រាស់ក្នុងរដូវប្រាំង។
លោក Nguyễn Hoàng Em អនុប្រធានគណៈកម្មាធិការប្រជាជនឃុំ Hưng Hội បានឱ្យដឹងថា៖ “កម្មវិធីមិនត្រឹមតែឈប់ត្រឹមការជួយឧបត្ថម្ភចំពោះមុខប៉ុណ្ណោះទេ ថែមទាំងតម្រង់ទៅរកគោលដៅយូរអង្វែង គឺបង្កើតមុខរបរចិញ្ចឹមជីវិតប្រកបដោយចីរភាព។ ជាក់ស្តែង បងប្អូនត្រូវបានជួយឧបត្ថម្ភលំនៅឋានដើម្បី “តាំងទីលំនៅប្រកបរបរដោយសុខសាន្ត” ផ្តល់មធ្យោបាយផលិតកម្ម អាចទទួលបានប្រភពទុនឥណទានអនុគ្រោះ ណែនាំការងារធ្វើ និងបង្កលក្ខណៈងាយស្រួលឱ្យកូនចៅបានសិក្សារៀនសូត្រ...។ អាស្រ័យហេតុនេះ អាចឈានទៅលើកកម្ពស់ចំណូល និងឈានឡើងកាត់បន្ថយភាពក្រីក្រប្រកបដោយចីរភាព”។
អាស្រ័យដោយប្រភពជំនួយផ្សេងៗពីកម្មវិធី រូបរាងឃុំ Hưng Hội កាន់តែស្រស់បំព្រង និងមានភាពរីកចម្រើន។
ការផ្លាស់ប្តូរនៅឃុំ Hưng Hội នាពេលបច្ចុប្បន្ន បានបង្ហាញយ៉ាងច្បាស់តាមរយៈរូបរាងជនបទកាន់តែស្រស់បំព្រង ជីវភាពសម្ភារ និងស្មារតីរបស់ប្រជាជនត្រូវបានលើកកម្ពស់ជាលំដាប់។ អ្វីដែលសំខាន់ជាងនេះទៅទៀតនោះគឺ ជំនឿទុកចិត្តរបស់បងប្អូនចំពោះគោលការណ៍ និងគោលនយោបាយរបស់បក្ស និងរដ្ឋកាន់តែបានពង្រឹង។
តាមរយៈគោលនយោបាយដ៏ជាក់ស្តែង កម្មវិធីកំពុងបញ្ជាក់ជាបណ្តើរៗនូវតួនាទីជាចំណុចបង្អែកដ៏រឹងមាំ ក៏ដូចជាការបណ្តុះនូវជំនឿទុកចិត្ត និងដាស់តឿននូវសេចក្តីប្រាថ្នាចង់ឈានឡើងរបស់បងប្អូនជនជាតិភាគតិច បង្កើតជាមូលដ្ឋានគ្រឹះដើម្បីឱ្យឃុំ Hưng Hội បន្តការផ្លាស់ប្តូរ និងអភិវឌ្ឍន៍ប្រកបដោយចីរភាពនាពេលខាងមុខ៕
Kim Trúc - Anh Tuấn
