“ឥឡូវនេះការចុះឈ្មោះសេវាសាធារណៈ មិនចាំបាច់ទៅសាលាឃុំទៀតទេ គឺមានភាពងាយស្រួលណាស់។ ខ្ញុំធ្វើបែបបទរដ្ឋបាលនៅលើទូរស័ព្ទ អ្វីដែលមិនច្បាស់ គឺបានបងៗនៅក្នុងក្រុមបច្ចេកវិទ្យាឌីជីថលសហគមន៍ ណែនាំយ៉ាងយកចិត្តទុកដាក់” នេះគឺជាការចែករំលែកដោយក្តីរីករាយរបស់លោក Trần Phil ភូមិលេខ ១៦ ឃុំ Khánh Lâm។
ឃុំ Khánh Lâm បច្ចុប្បន្នមាន ៧២៣ គ្រួសារជនជាតិភាគតិច ប្រមូលផ្ដុំនៅភូមិលេខ ១៦។ ផ្តើមពីចំណុចដែលនៅមានភាពស្រពិចស្រពិលជាមួយបច្ចេកវិទ្យា មកទល់ពេលនេះ ជាង ៩០% គ្រួសារ បានប្រើប្រាស់ទូរស័ព្ទឆ្លាតវៃ។ នេះគឺជាមូលដ្ឋានគ្រឹះដ៏សំខាន់ ដើម្បីភូមិភាគអនុវត្តបរិវត្តកម្មឌីជីថល នាំយកឧបករណ៍ប្រើប្រាស់ទំនើបៗមកជិតនឹងជីវភាពរបស់ប្រជាជន។
បង Lương Văn Đô ព្យាយាមណែនាំបងប្អូនប្រជាជនអំពីរបៀបប្រើប្រាស់ទូរស័ព្ទ ជួយឱ្យបងប្អូនមានទំនុកចិត្តចូលជិតខាងបច្ចេកវិទ្យាឌីជីថល។
តួនាទីជា “ស្ពានមេត្រី” ក្នុងដំណើរការនេះ គឺក្រុមបច្ចេកវិទ្យាឌីជីថលសហគមន៍។ ដោយកម្លាំងបង្គោលភាគច្រើនជាជនជាតិ Khmer សមាជិកមិនត្រឹមតែយល់ដឹងពីបច្ចេកវិទ្យាប៉ុណ្ណោះទេ ថែមទាំងមានភាពជិតស្និទ្ធ និងយល់ចិត្តបងប្អូន។ ពួកគាត់បានព្យាយាមទៅរាលគ្រួសារ ណែនាំពីប្រតិបត្តិការសាមញ្ញបំផុត ដូចជាការដំឡើងកម្មវិធី VNeID ការចុះឈ្មោះគណនីសេវាសាធារណៈជាតិ រហូតដល់ការបញ្ជូនព័ត៌មានផ្ទាល់ខ្លួន និងធានារ៉ាប់រងសុខាភិបាល។
បង Lương Văn Đô សមាជិកក្រុមបច្ចេកវិទ្យាឌីជីថលសហគមន៍ឱ្យដឹងថា៖ “យើងខ្ញុំបានណែនាំបងប្អូនជាជំហានៗ អ្នកណាដែលមិនទាន់ច្បាស់ ឬមានលក្ខណៈធ្វើដំណើរពិបាក យើងខ្ញុំទៅដល់ផ្ទះតែម្តង។ នៅពេលដែលពួកគាត់ចេះធ្វើហើយ ពួកគាត់មានទំនុកចិត្តជាងមុន ហើយថែមទាំងណែនាំបន្តដល់សាច់ញាតិក្នុងគ្រួសារទៀតផង”។
មិនត្រឹមតែជួយឧបត្ថម្ភនៅតាមផ្ទះប៉ុណ្ណោះទេ សមាជិកក្រុមនៅទាំងអញ្ជើញបងប្អូនមកសាលាទាន ដើម្បីណែនាំផ្ទាល់។ ករណីចុះឈ្មោះមុននឹងមិនបាច់រង់ចាំ ជួយឱ្យការដោះស្រាយបែបបទកាន់តែរហ័ស និងងាយស្រួល។ ហេតុនេះ ចំនួនប្រជាជនដែលជ្រើសរើសការដាក់ពាក្យតាមប្រព័ន្ធអ៊ីនធឺណិត កាន់តែមានការកើនឡើង ជំនួសឱ្យការទៅសាលាឃុំផ្ទាល់ដូចមុន។
សមមិត្ត Trần Văn Sỹ លេខាសាខាបក្ខភាគប្រធានភូមិលេខ ១៦ ឱ្យដឹង៖ “ដំបូងឡើយ ការអនុវត្តជួបការលំបាកមិនតិចទេ ព្រោះបងប្អូនមិនទាន់ស៊ាំនឹងបច្ចេកវិទ្យា។ ប៉ុន្តែតាមរយៈការឃោសនា និងការចលនា មកទល់ពេលនេះ ស្ទើរតែគ្រប់គ្រួសារទាំងអស់ សុទ្ធតែយល់ឃើញថា ការចូលទៅកាន់បច្ចេកវិទ្យាឌីជីថល នឹងនាំមកនូវឧបករណ៍ប្រើប្រាស់ជាច្រើន និងភាពងាយស្រួលក្នុងជីវភាពរស់នៅ”។
ជាឃុំតំបន់សុវត្ថិភាព Khánh Lâm បានយកចិត្តទុកដាក់ជាពិសេស ចំពោះគោលនយោបាយសុខុមាលភាព ជាពិសេសគឺធានារ៉ាប់រងសុខាភិបាល។ ការបញ្ចូលព័ត៌មានធានារ៉ាប់រងទៅក្នុងកម្មវិធី VNeID ជួយឱ្យប្រជាជនមានភាពងាយស្រួលជាងមុន ក្នុងការពិនិត្យ និងព្យាបាលជំងឺ។ បងប្អូនជាច្រើនបានម្ចាស់ការស្វែងរកចំណុចជួយឧបត្ថម្ភ ដើម្បីទទួលបានការណែនាំ បង្កើតជាទម្លាប់ប្រើប្រាស់ឧបករណ៍ឌីជីថលក្នុងជីវភាពប្រចាំថ្ងៃ។
លោក Đinh Cộng Hoà អនុប្រធានការិយាល័យវប្បធម៌ - សង្គម ឃុំ Khánh Lâm បានឱ្យដឹងថា៖ “បរិវត្តកម្មឌីជីថលចង់ទទួលបានជោគជ័យ មុនដំបូងត្រូវផ្លាស់ប្តូរការយល់ដឹងរបស់ប្រជាជន។ នៅពេលបងប្អូនយល់ និងឃើញពីផលប្រយោជន៍ ពួកគាត់នឹងម្ចាស់ការចូលរួម។ ការពិតបានបង្ហាញឱ្យឃើញថា ពីការរារែក ឥឡូវនេះប្រជាជនបានហានក្លាប្រើប្រាស់បច្ចេកវិទ្យា ដើម្បីដោះស្រាយការងារ”។
ពីពេល “កាន់ដៃបង្រៀនការងារ” ដល់ពេលបងប្អូនមានទំនុកចិត្តដាក់ពាក្យតាមប្រព័ន្ធអ៊ីនធឺណិត ដំណើរបរិវត្តកម្មឌីជីថលនៅឃុំ Khánh Lâm កំពុងជ្រាបចូលទៅក្នុងជីវភាពរបស់ប្រជាជនបណ្តើរៗ បើកឱកាសឱ្យចូលទៅកាន់សេវាសាធារណៈ និងគោលនយោបាយសុខុមាលភាពឆាប់រហ័ស និងងាយស្រួលបំផុត៕
Nguyễn Đào - Chí Thức
