ប៉ុន្មានឆ្នាំកន្លង គ្រួសារ Khmer ជាច្រើននៅក្នុងឃុំ Vĩnh Phước បានទទួលយកនូវក្តីសប្បាយរីករាយនៃការតាំងទីលំនៅថ្មីដ៏ធំទូលាយ និងរឹងមាំ។ ផ្ទះទាំងនេះ ត្រូវបានសាងសង់ដោយផ្តោតលើកម្មវិធីលុបបំបាត់ផ្ទះបណ្ដោះអាសន្ន និងផ្ទះទ្រុឌទ្រោម មិនត្រឹមតែជួយបងប្អូនប្រជាជនឱ្យមានស្ថិរភាពាងជីវិតរស់នៅរបស់ពួកគេប៉ុណ្ណោះទេ ថែមទាំងសម្តែងពីការយកចិត្តទុកដាក់ និងការចែករំលែករបស់រដ្ឋអំណាចភូមិភាគ និងសហគមន៍ អ្នកដែលជួបលំបាកផងដែរ។
អ្នកមីង Tăng Thị Kim Thanh រកប្រាក់ចិញ្ចឹមជីវិតដោយរបរហាន់ឆាយពៅនៅក្បែរផ្ទះដែលទើបនឹងសាងសង់ថ្មីរបស់ខ្លួន។
គ្រួសារអ្នកមីង Tăng Thị Kim Thanh នៅភូមិ Phước Thọ Tiền គឺជាករណីមួយក្នុងចំណោមករណីជួបការលំបាកខ្លាំងដែលទទួលបានការឧបត្ថម្ភលំនៅដ្ឋាន។ គ្មានដីផលិត ប៉ុន្មានឆ្នាំកន្លង អ្នកមីងរួមជាមួយស្វាមីរបស់ខ្លួនត្រូវចាកចេញពីស្រុកកំណើតដើម្បីទៅធ្វើការជាកម្មករនៅខេត្ត Trà Vinh។ ប្រាក់ចំណូលមិនស្ថិតស្ថេរ នៅឆ្នាំ ២០២០ ប្តីប្រពន្ធអ្នកមីងក៏បានត្រឡប់មកស្រុកកំណើតរបស់ខ្លួនវិញ ហើយរស់នៅក្នុងផ្ទះដ៏ទ្រុឌទ្រោម។
ឆ្នាំ ២០២៣ ប្តីអ្នកមីងបានទទួលមរណភាព អ្នកមីងត្រូវរស់នៅជាមួយចៅពីរនាក់។ ដោយសារឈឺសន្លាក់ឆ្អឹង មិនអាចធ្វើការងារធ្ងន់បាន ប្រាក់ចំណូលប្រចាំថ្ងៃរបស់គាត់ពឹងផ្អែកតែលើការហាន់ឆាយពៅស៊ីឈ្នួលប៉ុណ្ណោះ ប្រាក់ដែលរកបានប្រចាំថ្ងៃត្រឹមតែរាប់សិបពាន់ដុងប៉ុណ្ណោះ។ ជីវភាពមានមុខខ្វះក្រោយ ធ្វើឱ្យការជួសជុលផ្ទះទ្រុឌទ្រោមរបស់ខ្លួនមិនអាចដំណើរការទៅរួច។ ដូច្នេះហើយ នៅពេលដែលរដ្ឋអំណាចភូមិភាគបានជំនួយឧបត្ថម្ភសាងសង់ផ្ទះថ្មីដោយសរុបតម្លៃទឹកប្រាក់ ៦០ នដុង អ្នកមីងមានក្តីសប្បាយរីករាយជាខ្លាំង ពីព្រោះបន្ទាប់ពីការលំបាកអស់រយៈកាលជាច្រើនឆ្នាំ ទីបំផុតអ្នកមីងក៏មានកន្លែងសម្រាប់រស់នៅសមរម្យល្អផងដែរ។
“ពីមុន ផ្ទះនេះពេលដែលមានភ្ញៀងធ្លាក់ធំម្តងៗក៏ត្រូវលេចគ្រប់ទីកន្លែង ខ្ញុំភ័យខ្លាចថាវានឹងដួលរលំបណ្តោយឱ្យប៉ះពាល់ដល់សុវត្ថិភាពរបស់ចៅៗខ្ញុំទៀតផង។ ឥឡូវនេះ ជាមួយនឹងដំបូលដ៏រឹងមាំ វាមិនត្រឹមតែផ្តល់ទីជម្រកធានាសុវត្ថិភាពសម្រាប់ខ្ញុំ និងចៅៗរស់នៅប៉ុណ្ណោះទេ ថែមទាំងផ្តល់កម្លាំងចិត្តបន្ថែមទៀតដើម្បីធ្វើការយ៉ាងលំបាក និងផ្គត់ផ្គង់អ្វីដែលប្រសើរជាងមុនសម្រាប់ខ្ញុំ” អ្នកមីង Thanh បានរៀបរាប់ដូច្នេះ។
គ្រួសារអ្នកមីង Bùi Thị Dọn នៅភូមិ Phước Thọ Hậu ជាគ្រួសារប្រកៀកបន្ទាត់ក្រ ជីវភាពេរស់នៅជាពិសេសពឹងផ្អែកលើកម្លាំងពលកម្មស៊ីឈ្នួល។ ដូច្នេះ ប្តីប្រពន្ធគាត់មិនអាចមានសមត្ថភាពដើម្បីកែជួសជុលផ្ទះដែលទ្រុឌទ្រោមយ៉ាងខ្លាំងបាននោះឡើយ។ នៅដើមឆ្នាំ ២០២៥ អាស្រ័យការឧបត្ថម្ភរបស់គណៈកម្មាធិការរណសិរ្សមាតុភូមិ Việt Nam ឃុំ Vĩnh Phước គ្រួសារអ្នកមីងក៏បានទទួលផ្ទះសាមគ្គីមួយខ្នង ដូច្នេះគ្រួសារអ្នកមីងក៏មានទីកន្លែងរស់នៅស្ថេរភាពផងដែរ។
យោងតាមគណៈកម្មាធិការរណសិរ្សមាតុភូមិ Việt Nam ឃុំ Vĩnh Phước ការអនុវត្តកម្មវិធីលុបបំបាត់ផ្ទះបណ្ដោះអាសន្ន និងផ្ទះទ្រុឌទ្រោម ចាប់ពីឆ្នាំ២០២៥ រហូតមកទល់បច្ចុប្បន្ន ភូមិភាគបាឧបត្ថម្ភសាងសង់ និងជួសជុលផ្ទះចំនួន ៤៧ ខ្នងសម្រាប់គ្រួសារអ្នកអាស្រ័យផលគោលនយោបាយ និងគ្រួសារក្រីក្រ ព្រមទាំងគ្រួសារប្រកៀកបន្ទាត់ក្រ និងគ្រួសារជនជាតិភាគតិចនៅភូមិភាគ។
ទន្ទឹមនិងការឧបត្ថម្ភលំនៅដ្ឋាន រដ្ឋអំណាចភូមិភាគក៏បានចលនាអង្គការ និងសប្បុរសជនដើម្បីជំនួយឧបត្ថម្ភសម្ភារៈប្រើប្រាស់ក្នុងផ្ទះ និងដើមទុនសម្រាប់ចិញ្ចឹមជីវភាពគ្រួសារ ជួយបងប្អូនប្រជាជនឱ្យមានស្ថិរភាពក្នុងការរស់នៅ ព្រមទាំងអភិវឌ្ឍសេដ្ឋកិច្ចជាសន្សឹមៗទៀតផង។
អ្នកមីង Bùi Thị Dọn បោសសម្អាត និងរៀបចំតុបតែងផ្ទះថ្មីរបស់ខ្លួន។
លោក Trần Văn Mãnh អនុប្រធានគណៈកម្មាធិការរណសិរ្សមាតុភូមិ Việt Nam ឃុំ Vĩnh Phước បានមានប្រសាសន៍ថា៖ “នៅពេលខាងមុខ ភូមិភាគនឹងបន្តសម្របសម្រួលការពិនិត្យឡើងវិញចំពោះគ្រួសារជនរួមជាតិ Khmer ដែលជួបលំបាកផ្នែកខាងលំនៅដ្ឋាន ជាពិសេសគ្រួសារដែលមានផ្ទះទ្រុឌទ្រោម ឬខូចខាត ដើម្បីចលនាទឹកចិត្តសប្បុរសជនឱ្យឧបត្ថម្ភសាងសង់ផ្ទះថ្មីដើម្បីជួយបងប្អូនប្រជាជនមានលក្ខណៈរស់នៅស្ថិរភាព”។
សម្រាប់ផ្ទះថ្មីទាំងនេះមិនត្រឹមតែបានផ្តល់លំនៅដ្ឋានធានាសុវត្ថិភាព និងស្ថិរភាពប៉ុណ្ណោះទេ ថែមទាំងបង្កើតទំនុកចិត្តសម្រាប់បងប្អូនប្រជាជន Khmer ឱ្យជំនះការលំបាក និងខិតខំដើម្បីជីវិតកាន់តែប្រសើរឡើង។ នៅក្នុងផ្ទះទើបសាងសង់ឡើងដោយក្តីមេត្តាករុណា មិនត្រឹមតែជាសេចក្តីរីករាយនៃការមានទីជម្រកដ៏សមរម្យប៉ុណ្ណោះទេ ថែមទាំងជាក្តីស្រមៃ និងការចែករំលែករបស់សហគមន៍ចំពោះអ្នកដែលខ្វះខាតទៀត៕
Tú Quyên - Trường Giang
