នៅតាមបណ្តាតំបន់ភូមិភាគមួយចំនួនក្នុងខេត្ត ស្ពានជនបទបានទ្រុឌទ្រោមបន្ទាប់ពីការប្រើប្រាស់រយៈពេលយូរ ប៉ុន្តែធនធានក្នុងស្រុកមានកម្រិតបានរារាំងការវិនិយោគលើការធ្វើឱ្យប្រសើរឡើង។ ផ្តើមពីនោះ ការធ្វើដំណើរទៅមករបស់ប្រជាពលរដ្ឋ និងសិស្សានុសិស្សក៏ជួបការលំបាកផងដែរ។ ដោយយល់ឃើញដូច្នេះ អស់រយៈពេលជាច្រើនឆ្នាំមកហើយ គណៈអបាលវត្ត Kim Sơn នៅសង្កាត់ Hoà Thành ជាពិសេសព្រះតេជគុណ Thích Nữ Diệu Chánh អភិបាលរង និងជាប្រធានគណៈសប្បុរសធម៌សង្គម រួមជាមួយសាខាដូនជីនៃសមាគមព្រះពុទ្ធសាសនាខេត្ត Cà Mau ចៅអធិការវត្ត បានអនុវត្តដោយស្ងៀមស្ងាត់ក្នុងការ "តភ្ជាប់រវាងច្រាំងទន្លេ" ដោយកៀរគរប្រភពធនធានដើម្បីសាងសង់ស្ពាននៃក្តីមេត្តាសម្រាប់ប្រជាជននៅតំបន់ដាច់ស្រយាល។
ភិក្ខុនី Thích Nữ Diệu Chánh រួមជាមួយថ្នាក់ដឹកនាំខេត្ត និងរដ្ឋអំណាចភូមិភាគ រួមទាំងអ្នកឧបត្ថម្ភ ព្រមទាំងប្រជាជនប្រារព្ធពិធីសម្ពោធស្ពាន Cây Tự ស្ថិតនីអនុសង្កាត់ Tân Hoá A សង្កាត់ Hoà Thành។
ខណៈពេលដែលទទួលបានលិខិតអំពាវនាវ ឬដឹងពីកន្លែងដែលមានតម្រូវការបន្ទាន់ខាងស្ពានគមនាគមន៍ គណៈអភិបាលវត្តក៏បានធ្វើការស្ទង់មតិនៅនឹងកន្លែងដោយផ្ទាល់ បន្ទាប់មកភ្ជាប់ទំនាក់ទំនងជាមួយអ្នកឧបត្ថម្ភដើម្បីជំនួយថវិកាសាងសង់។
ថ្មីៗនេះ វត្ត Kim Sơn បានសហការជាមួយសប្បុរសជន ធ្វើពិធីសម្ពោធស្ពានចរាចរណ៍ជនបទ ២ ខ្សែនៅភូមិ Tân Hoá A និងអនុសង្កាត់ Bình Thành សង្កាត់ Hoà Thành។ ស្ពានបេតុងដ៏រឹងមាំទាំងនេះបានជំនួសឱ្យស្ពានចាស់ៗដែលទ្រុឌទ្រោមផងដែរ។
លោក Nguyến Văn Phú នៅអនុសង្កាត់ Tân Hoá A បានចែករំលែកថា៖ «ស្ពាន Cây Tự កាលពីមុនចាស់ទ្រុឌទ្រោមយ៉ាងខ្លាំងបន្ទាប់ពីប្រើប្រាស់អស់រយៈកាលច្រើនឆ្នាំ។ រាល់ពេលធ្វើដំណើរឆ្លងកាត់ម្តងៗ ក៏មានការភ័យបារម្ភណាស់ដែរ ជាពិសេសប្អូនសិស្សសាលាត្រូវឆ្លងកាត់ជាប្រចាំ ដើម្បីទៅសាលារៀន។ ឥឡូវនេះ ជាមួយនឹងស្ពានបេតុងដ៏រឹងមាំ ប្រជាជនមានក្តីសប្បាយរីករាយយ៉ាងខ្លាំង»។
យោងតាមលោក Vương Chí Thiện អនុប្រធានគណៈកម្មាធិការប្រជាជនសង្កាត់ Hoà Thành ស្ពាន និងផ្លូវជាច្រើនទូទាំងតំបន់នេះនៅតែស្ថិតក្នុងស្ថានភាពទ្រុឌទ្រោមបន្ទាប់ពីប្រើប្រាស់អស់រយៈកាលច្រើនឆ្នាំ។ ការរួមកម្លាំងរបស់បណ្តាអង្គការ និងសប្បុរសជនសម្រាប់ការសាងសង់ស្ពានចរាចរណ៍ជនបទគឺជាក់ស្តែងណាស់ បានរួមចំណែកដល់ការបញ្ចប់ហេដ្ឋារចនាសម្ព័ន្ធ បង្កលក្ខណៈអំណោយផលសម្រាប់ប្រជាជនក្នុងការធ្វើដំណើរ ដឹកជញ្ជូនទំនិញ និងលើកកម្ពស់ការអភិវឌ្ឍសេដ្ឋកិច្ចនៅភូមិភាគផងដែរ។
«នេះគឺជាកម្មវិធីសប្បុរសធម៌សង្គមដ៏មានអត្ថន័យមួយ ដែលទទួលបានឧបត្ថម្ភពីសប្បុរសជនជាច្រើន។ រហូតមកដល់បច្ចុប្បន្ន ស្ពានជនបទរាប់សិបខ្សែត្រូវបានសាងសង់នៅតាមតំបន់ដាច់ស្រយាល។ រាល់ពេលដែលស្ពានមួយត្រូវបានសម្ពោធ ការបានឃើញពីសេចក្តីរីករាយ និងក្តីរំភើបយ៉ាងជាក់ច្បាស់នៅលើផ្ទៃមុខរបស់បងប្អូនប្រជាជន ផ្តល់ឱ្យយើងនូវការលើកទឹកចិត្តកាន់តែខ្លាំងថែមទៀតដើម្បីបន្តដំណើរការនេះ» ភិក្ខនី Thích Nữ Diệu Chánh បានចែករំលែកដូច្នេះ។
រាល់ស្ពាននីមួយៗដែលបានសាងសម្រេចជាស្ថាពរគឺជារឿងរ៉ាវនៃក្តីមេត្តាករុណា។ ផ្តើមពីការរួមចំណែករបស់សប្បុរសជនទាំងឡាយ ក្តីស្រមៃដែលរង់ចាំជាយូរឆ្នាំរបស់បងប្អូនប្រជាជនដែលចង់មានស្ពានថ្មីក៏បានក្លាយជាការពិតផងដែរ។
ភិក្ខុនី Thích Nữ Diệu Chánh មានសង្ឃដីការថា បច្ចុប្បន្ន នៅតំបន់ដាច់ស្រយាលជាច្រើនទូទាំងខេត្ត នៅមានស្ពានជាច្រើនដែលខូចខាត និងទ្រុឌទ្រោម។ កន្លែងខ្លះ ប្រជាជនត្រូវឆ្លងកាត់ព្រែកទន្លេដោយទូកពោរពេញដោយការលំបាក ជាពិសេសក្នុងរដូវព្យុះភ្លៀង។ ដូច្នេះ នាពេលអនាគត វត្ត Kim Sơn នឹងបន្តប្រើប្រាស់ប្រភពធនធានទាំងអស់ពីសប្បុរសជន ពុទ្ធសាសនិកជន និងអង្គការសប្បុរសធម៌ ដើម្បីរួមគ្នាសាងសង់ស្ពាននៃក្តីមេត្តាករុណាបន្ថែមទៀត រួមចំណែកដល់ការធ្វើដំណើរប្រកបដោយសុវត្ថិភាព និងងាយស្រួលជាងមុនសម្រាប់ប្រជាជនធ្វ់ដំណើរទៅមក៕
Tú Quyên - Trường Giang
