ទំនៀមគោរពបូជា Ông Bổn របស់បងប្អូនជនជាតិ Hoa មានតាំងពីយូរយារណាស់មកហើយ ហើយ ដែលមានប្រវត្តិផ្សារភ្ជាប់យ៉ាងជិតស្និទ្ធជាមួយនឹងការខិតខំប្រឹងប្រែងកាប់ឆ្កាព្រៃឈើ និងតាំងទីលំនៅរបស់ជនជាតិ Hoa នៅតំបន់ Nam Bộ បានក្លាយជាលក្ខណៈវប្បធម៌ដ៏ពិសេសប្រចាំតំបន់ផងដែរ។
សហគមន៍ជនជាតិ Hoa ប្ររព្ធពិធីថ្វាយទេវតា និងរំលឹកគុណ Ông Bổn នៅវត្ត Bang សង្កាត់ Bạc Liêu។
ទំនៀមគោរពបូជា Ông Bổn របស់ជនជាតិ Hoa ក៏ដូចជាជំនឿនៃការគោរពបូជាអាទិទេព Thần Hoàng របស់ជនជាតិ Kinh ឬក៏ទំនៀមគោរពបូជាអ្នកតារបស់ជនរួមជាតិ Khmer ផងដែរ។
យោងតាមរឿងព្រេងបុរាណ និងរឿងនិទានប្រជាប្រិយ Ông Bổn គឺជាបុរសម្នាក់ដែលមានចិត្តសន្តោសមេត្តា តែងជួយកអាសារអ្នកទន់ខ្សោយ ព្រមទាំងគិតតែពីការបង្កបង្កើតភូមិឋាន។ ដោយសារមានចិត្តសាធារ គុណធម៌ និងអំពើល្អទាំងនេះហើយ បន្ទាប់ពីគាត់ស្លាប់បាត់បង់ជីវិតទៅ គាត់ក៏ត្រូវបានព្រះជាម្ចាស់ដ៏មានឫទ្ធានុភាពប្រទានងារជាកាន់កាប់ដ៏អស្ចារ្យនៃមហារាជាធិរាជ ដោយមានន័យថា អ្នកធ្វើអំពើល្អដែលរំជួលដល់ឋានទេវតា។
មូលហេតុដែលព្រះអាទិទេពនេះត្រូវបានគេគោរពបូជា គឺពីព្រោះតែមានលក្ខណៈសមស្របទៅនឹងអារម្មណ៍ ទឹកចិត្តមោសញ្ចេតនារបស់សហគមន៍ Hoa នៅពេលដែលពួកគេបានធ្វើចំណាកស្រុកមកកាន់តំបន់ទឹកដី Nam Bộ ដែលប្រកបទៅដោយព្រៃឈើក្រាស់ជុំជិត ទឹកមានជាតិពុល សត្វព្រៃកាចសាហាវ និងបង្គាប់ដោយគ្រោះថ្នាក់។ ក្នុងកាលៈទេសៈបែបនេះ ពួកគេត្រូវការព្រះជួយការពារ ក៏ដូចជានរណាម្នាក់ដើម្បីផ្តល់ក្តីសង្ឃឹម និងក្តីសុបិនខាងភាពសុភមង្គលសម្រាប់ខ្លួនបានរស់នៅលើតំបន់ទឹកដីថ្មីនេះ។
រូបចម្លាក់លោក Ông Bổn និងលោកយាយ Bổn នៅវត្ត Bang សង្កាត់ Bạc Liêu។
ផ្តើមពីរឿងនិទានប្រជាប្រិយ តួអង្គ Ông Bổn ពេលមកដល់តំបន់ដែនដី Nam Bộ ត្រូវបានតំណាងដោយរូបចម្លាក់ផ្សេងៗគ្នា ដូចជា៖ Ông Bổn កាន់ដាវ និងអង្គុយលើខ្នងខ្លា ដែលតំណាងឱ្យការគ្រប់គ្រងលើពួកសត្វព្រៃដែលកាចសាហាវ រូបចម្លាក់ Ông Bổn កាន់ដុំមាស ដែលតំណាងឱ្យការផ្តល់ទ្រព្យសម្បត្តិធនធាន និងរូប Ông Bổn កាន់ដំបងឫស្សី និងដុំមាស តំណាងឱ្យសេចក្តីប្រាថ្នាសម្រាប់សុខសន្តិភាព។
ទំនៀមគោរពបូជា Ông Bổn ត្រូវបានផ្សារភ្ជាប់ជាមួយនឹងទំនៀមទម្លាប់ និងពិធីកិច្ចតាមបែបប្រជាប្រិយជាច្រើន ដូចជាទំនៀមខ្ចីក្រូចឃ្វិច និងបុលប្រាក់ពី Ông Bổn ដើម្បីអធិស្ឋានសុំសំណាងល្អ និងវិបុលភាព។ ទំនៀមនៃការគោរពបូជា Ông Bổn គឺក្នុងគោលបំណងបួងសួងសូមឱ្យអាកាសធាតុអំណោយផល ប្រទេសជាតិបានសុខសាន្ត ប្រជាជនមានក្តីសុខ។
ពិធីសម្តែងសិល្បៈបុរាណ Triều Kích ក្នុងពិធីថ្វាយ Ông Bổn នៅវត្ត Bang សង្កាត់ Bạc Liêu ។
ដោយផ្តើមចេញពីការអត់ឱន សេចក្តីស្រឡាញ់ចំពោះមនុស្សលោក និងស្មារតីបង្កបង្កើតទីឋានរបស់ Ông Bổn ទើបបណ្តាសាខា សមាគម និងត្រកូលនៃសហគមន៍ជនជាតិ Hoa ទាំងឡាយតែងចាត់ទុកអាស្រម Ông Bổn ជាមជ្ឈមណ្ឌលនៃចំណងសាមគ្គីភាព និងសកម្មភាពសហគមន៍។ ក្នុងនោះ អាស្រមបុរាណ Phước Đức (ហៅវត្ត Bang) នៅសង្កាត់ Bạc Liêu ដែលមានប្រវត្តិជាង ២០០ ឆ្នាំ បានក្លាយជាមជ្ឈមណ្ឌលវប្បធម៌ និងសាសនាសម្រាប់សហគមន៍ Hoa ផងដែរ៕
Lư Lâm Hỷ
