ទោះបីជាមានផ្ទៃដីជាង ៤ ហិកតាសម្រាប់ការចិញ្ចឹមវិបុលវប្បកម្មក្តី តែជាច្រើនលើកច្រើនសារ បង Hồ Thanh Vũ នៅភូមិ Lung Lá ឃុំ Định Thành ត្រូវផ្អាកការផលិតជាបណ្ដោះអាសន្ន ដោយសារតែការខាតបង់ និងកង្វះដើមទុន។ ដោយមិនព្រមចុះចាញ់ បងក៏បានសិក្សាស្វែងយល់បន្តពីទម្រង់ចិញ្ចឹមបង្គាដែលមានប្រសិទ្ធភាពតាមរយៈប្រព័ន្ធផ្សព្វផ្សាយផ្សេងៗ ព្រមទាំងក្លាហានប្តូរទៅជាទម្រង់ចិញ្ចឹមបង្គាវិបុលវប្បកម្ម ២ ដំណាក់កាល។ ដោយសារតែការខិតខំសិក្សារៀនបទពិសោធ ទម្រង់នេះក៏មានប្រសិទ្ធភាព ជួយឱ្យបងមានលក្ខណៈឆ្លងកាត់លំបាក លំនឹងសេដ្ឋកិច្ច និងក្លាយជាគ្រួសារមួយក្នុងចំណោមគ្រួសារផលិតពូកែឆ្នើមរបស់ភូមិភាគផងដែរ។
ទម្រង់ចិញ្ចឹមបង្គាវិបុលវប្បកម្ម ២ ដំណាក់កាល បានជួយឱ្យបង Hồ Vũ Thanh លើកកម្ពស់គុណភាពផលិត និងបង្កើនប្រាក់ចំណូលផងដែរ។
បង Vũ ឱ្យដឹង៖ ទម្រង់ចិញ្ចឹមបង្គាវិបុលវប្បកម្ម ២ ដំណាក់កាលមានលក្ខណៈសមស្របជាមួយផ្ទៃដី និងប្រភពទឹកប្រចាំភូមិភាគ ទន្ទឹមនិងនោះ ក៏មានសមត្ថភាពបង្កើនអត្រានៃការធំធាត់របស់បង្គាផងដែរ ព្រមទាំងមិនសូវកើតមានហានិភ័យនោះដែរ។ ទម្រង់នេះត្រូវបានអនុវត្តតាមវិធីសាស្ត្រ ២ ដំណាក់កាល រួមមាន៖ ពូជបង្គាត្រូវានបង្កាត់ក្នុងស្រះរយៈពេលប្រហែលចាប់ពី ១៤-១៥ ថ្ងៃ ជំនួយបង្គាពូជអាចគ្រប់កម្លាំងដើម្បីធំធាត់បានល្អ។ ខណៈពេលដែលបង្គាមានទំហំប្រហែលសសៃធូប នឹងត្រូវបានផ្ទេរទៅស្រះចិញ្ចឹមផ្សេងវិញ។
ក្នុងអំឡុងពេលចិញ្ចឹម បងបានផ្តោតលើការប្រើប្រាស់ផលិតផលជីវសាស្រ្ត ផ្អាប់ដំបែ Zeo និងជីដទៃទៀត ដើម្បីបង្កើតប្រភពអាហារធម្មជាតិ និងរក្សាពណ៌ទឹកឱ្យមានស្ថេរភាពក្នុងស្រះ។ វិធីសាស្រ្តនេះបានធ្វើឱ្យប្រសើរឡើងនូវបរិស្ថានស្រះ កាត់បន្ថយការផ្ទុះជំងឺ និងបង្កើនភាពធន់នឹងបង្គាផងដែរ។
ទន្ទឹមនិងនោះ បងថែមទាំងបានអនុវត្តវិធីសាស្រ្តចិញ្ចឹមបង្គាជាបណ្តើរៗ ដោយបន្ថែមកូនបង្គាពូជថ្មីជាបន្តៗជារៀងរាល់ខែ។ អាស្រ័យហេតុនេះហើយ ទើបក្នុងស្រះតែងតែមានបង្គាច្រើនក្នុងដំណាក់កាលផ្សេងៗគ្នានៃការអភិវឌ្ឍ ផ្តល់ឱ្យគ្រួសារនូវការប្រមូលផលជាបន្តបន្ទាប់ពេញមួយឆ្នាំ ដោយមិនអាស្រ័យលើរដូវកសិកម្មតែមួយទៀតផង។
បន្ទាប់ពីអនុវត្តទម្រង់នេះ លទ្ធផលគឺច្បាស់លាស់ណាស់។ អត្រារស់រានមានជីវិតរបស់បង្គាឈានដល់ប្រហែល ៨០% មានភាពខ្ពស់ជាងវិធីសាស្ត្រចិញ្ចឹមមុនយ៉ាងខ្លាំង។ បន្ទាប់ពីចិញ្ចឹមបានត្រឹមតែប្រហែល ៣ ខែ បង្គាមានទំហំចាប់ពី ៣០-៣៥ ក្បាលក្នុងមួយគីឡូក្រាម ហើយត្រូវបានទិញដោយពាណិជ្ជករក្នុងតម្លៃស្ថិរភាព។
ជិតពីរឆ្នាំបន្ទាប់ពីអនុវត្តទម្រង់ថ្មីនេះ លោក Vũ បានប្រមូលផលបង្គាប្រហែល ៧ លើក ដែលក្នុងមួយលើកៗផ្តល់ប្រាក់ចំណេញពី ៥០-៧០ លានដុង។ ប្រាក់ចំណូលស្ថិរភាពនេះបានជួយសេដ្ឋកិច្ចគ្រួសាររបស់បងឱ្យប្រសើរឡើងជាលំដាប់ និងមានលក្ខណៈដើម្បីវិនិយោគឡើងវិញក្នុងការផលិត និងបង្កើនគុណភាពរស់នៅរបស់ខ្លួន។
ក្រុមកម្មាភិបាល និងប្រជាជននាំគ្នាទស្សនាជាក់ស្តែងពីទម្រង់ចិញ្ចឹមបង្គាវិបុលវប្បកម្ម ២ ដំនាក់កាលរបស់បង Hồ Thanh Vũ។
យោងតាមលោក Nguyễn Trung Hiếu ប្រធានគណៈកម្មាធិការប្រជាជនឃុំឌិញថាញ់ ទូទាំងឃុំនៃពេលបច្ចុប្បន្នមានផ្ទៃដីចិញ្ចឹមបង្គាប្រហែល ៩.៤០០ ហិកតា ដែលភាគច្រើនចិញ្ចឹមបង្គាវិបុលវប្បកម្ម។ ពីមុន ការចិញ្ចឹមបង្គាវិបុលវប្បកម្មតាមបែបប្រពៃណីសម្រេចបានទិន្នផលត្រឹមតែប្រហែល ២០០-២៥០ គីឡូក្រាម/ហិកតាប៉ុណ្ណោះ ដោយមានប្រសិទ្ធភាពទាប និងពឹងផ្អែកយ៉ាងខ្លាំងទៅលើលក្ខណៈធម្មជាតិ។ តាមរយៈការប្តូរទៅទម្រង់ចិញ្ចឹមបង្គាយ៉ាងវិបុលវប្បកម្ម ២ ដំណាក់កាល ដោយមិនផ្លាស់ប្តូរទឹក រួមផ្សំជាមួយនឹងការកែលម្អស្រះ និងការគ្រប់គ្រងបរិស្ថានបានកាន់តែប្រសើរផងនោះ ទិន្នផលក៏កើនឡើងដល់ប្រហែល ៤០០-៤៥០ គីឡូក្រាម/ហិកតា។ នេះគឺជាទម្រង់សមស្របមួយដែលជួយកាត់បន្ថយហានិភ័យ គ្រប់គ្រងផលិតកម្មប្រកបដោយប្រសិទ្ធភាព សម្របខ្លួនទៅនឹងការប្រែប្រួលអាកាសធាតុ និងបង្កើនប្រាក់ចំណូលសម្រាប់បងប្អូនប្រជាជនផងដែរ។ "ឃុំកំពុងជំរុញទឹកចិត្តបងប្អូនប្រជាជនឱ្យពង្រីកទម្រង់ចិញ្ចឹមនេះផងដែរ"។
ផ្តើមពីគ្រួសារចិញ្ចឹមបង្គាដែលធ្លាប់បរាជ័យជាច្រើនដង បង Hồ Thanh Vũ ឥឡូវនេះបានក្លាយជាគំរូដ៏សំខាន់ម្នាក់ក្នុងការតស៊ូ និងភាពច្នៃប្រតិដ្ឋក្នុងការផលិត។ ភាពជោគជ័យរបស់បង មិនត្រឹមតែផ្តល់អត្ថប្រយោជន៍ដល់គ្រួសារប៉ុណ្ណោះទេ ថែមទាំងជំរុញឱ្យគ្រួសារជាច្រើនទៀតផ្លាស់ប្តូរវិធីសាស្រ្តធ្វើស្រែចម្ការរបស់ខ្លួនយ៉ាងក្លាហាន ដោយមានគោលបំណងផលិតឱ្យកាន់តែមានប្រសិទ្ធភាព និងមាននិរន្តរភាពថែមទៀមទៀត៕
Tú Nguyễn - Trường Giang
