ប៉ុន្មានឆ្នាំកន្លងមកនេះ ខេត្ត Cà Mau មិនត្រឹមតែបាន "ផ្លាស់ប្តូរមុខមាត់" ផ្នែកខាងសេដ្ឋកិច្ចប៉ុណ្ណោះទេ ថែមទាំងបានបញ្ជាក់ពីការអភិវឌ្ឍយ៉ាងសកម្មនៃប្រពៃណីចលនាវប្បធម៌នៅមូលដ្ឋានទៀតផង។ ដែលលេចធ្លោក្នុងលំហូរនោះ គឺការស្តារឡើងវិញនូវវិស័យសិល្បៈប្រពៃណីរបស់ជនរួមជាតិ Khmer ជាមួយ "សួនបណ្តុះ" ទេពកោសល្យដែលពោរពេញដោយការយកចិត្តទុកដាក់នៅតាមគ្រប់បណ្តាភូមិស្រុក។
លោក Hữu Văn Kel នៅភូមិ Cây Khô ឃុំ Hồ Thị Kỷ គឺជាអ្នកពោរពេញដោយការតាំងចិត្ត "បន្តបំភ្លឺប្រទីប" ដល់ជំនាន់ក្រោយ។
ប្រឈមមុខជាមួយហានិភ័យនៃការសាបរលាបវប្បធម៌ប្រពៃណីក្នុងសម័យទំនើប សហគមន៍ Khmer នៅ Cà Mau បានអនុវត្តដំណើរការប្រកបដោយការតាំងចិត្តយ៉ាងមុតមាំ ដើម្បីអភិរក្សអត្តសញ្ញាណរបស់ខ្លួន។ ក្លឹបសិល្បៈ របាំប្រពៃណី ត្រូវបានបង្កើតឡើងមួយថ្ងៃកាន់តែច្រើន និងមានរបៀបរៀបរយទៀតផង។ បរិយាកាសហ្វឹកហាត់យ៉ាងសកម្ម មិនត្រឹមតែមាននៅកន្លែងដែលមានលក្ខណៈអំណោយផលប៉ុណ្ណោះទេ ថែមទាំងបានរីកសាយភាយយ៉ាងខ្លាំងក្លានៅតាមតំបន់ឆ្ងាយដាច់ស្រយាល ព្រមទាំងតំបន់ដែលមានជនរួមជាតិ Khmer រស់នៅច្រើនកុះករផងដែរ។
បន្ទាប់ពីថ្នាក់រៀនរាំនេះ ក្មួយៗជាច្រើនអាចចូលរួមរាំលេងកម្សាន្តដោយភាពជឿជាក់សម្រា់ក្នុងឱកាសបុណ្យទានប្រពៃណី។
បណ្តាវត្តអារាម Khmer ទាំងឡាយ សុទ្ធសឹងជាមជ្ឈមណ្ឌលនៃសកម្មភាពវប្បធម៌ សាសនារបស់សហគមន៍ ឥឡូវនេះបានក្លាយទៅជា "ប្រភព" សម្រាប់បណ្តុះបណ្តាខាងវិស័យសិល្បៈ។ ដែលជាឧទាហរណ៍ដ៏ជាក់ស្ដែងមួយដូចជាក្រុមសិល្បៈនៅវត្តសូរិយារាម វត្តបុប្ផារាម (Cái Giá Chót) ឃុំ Hưng Hội វត្តជ្រុងខ្មែរ (Rạch Giồng) ឃុំ Hồ Thị Kỷ ឬ វត្តព្រែកជ្រៅ (Xiem Cán) សង្កាត់ Hiệp Thành…។ នៅទីនេះ សំឡេងភ្លេងពិណពាទ្យដ៏ពីរោះរណ្តំ រួមជាមួយរបាំ ចំរៀងរាំវង់ សារ៉ាវ៉ាន់ដ៏ទន់ភ្លន់បានក្លាយជា "ចំណី" សម្រាប់ខាងស្មារតីដែលមិនអាចខ្វះបាន។
អ្វីដែលគួរឱ្យស្ងើចសរសើរបំផុតនោះ គឺស្មារតីជម្នះលំបាក ដើម្បី "រក្សាប្រទីប" នៃវិជ្ជាជីវៈរបស់អ្នកជំនាន់មុន។ ឧទាហរណ៍ដូចជា លោក Hữu Văn Kel នៅភូមិ Cây Khô ឃុំ Hồ Thị Kỷ ។ ទោះបីមានការជួបលំបាកច្រើនយ៉ាងណាក៏ដោយ ក៏គាត់នៅតែប្តេជ្ញាចិត្តបង្កើតក្រុមរបាំ ច្រៀងរាំប្រជាប្រិយ Khmer ក្នុងផ្ទះរបស់ខ្លួន ដោយមានសមាជិកជាង ៥០ នាក់ចូលរួម ភាគច្រើនសយទ្ធសឹងជាប្អូនៗសិស្សានុសិស្ស។
យុវវ័យជំនាន់ក្រោយ គឺជាអ្នកស្នងបន្តវេនក្នុងការរួមចំណែកអភិរក្ស អត្តសញ្ញាណវប្បធម៌ជាតិ។
លោក Kel បាន ឱ្យដឹង៖ “ខ្ញុំបង្កើតក្រុមចំរៀងរាំ និងរបាំប្រជាប្រិយនេះឡើង ដើម្បីជួយឱ្យបងប្អូនប្រជាជនអាចចូលរួមរាំកម្សាន្តក្នុងពិធីបុណ្យទានប្រពៃណីនៅវត្ត ឬក៏ក្នុងភូមិ ស្រុករបស់ខ្លួន។ ជាពិសេស គឺក្មួយៗតូចៗ ដើម្បីរួមចំណែកអភិរក្សវប្បធម៌របស់ជនជាតិយើង”។
គោលដៅនៃការ "បណ្តុះបណ្តាល" នេះមិនគ្រាន់តែសម្រាប់បម្រើការសម្តែងក្នុងឱកាសបុណ្យទាន ដូចជា៖ បុណ្យចូលឆ្នាំថ្មី សែនដូនតា បុនិងណ្យកឋិនទាន។ល។ នោះទេ ថែមទាំងជាភារកិច្ចសម្រាប់ជំនាន់ក្រោយស្នងបន្តវេន និងកាន់តែមានមោទនភាពចំពោះវិស័យសិល្បៈរបស់បុព្វបុរសរបស់ខ្លួនទៀតផង។
ជនជាតិ Khmer មានរបាំជាច្រើន ទាំងអាជីព និងមិនមែនអាជីព អាចចូលរួមរាំលេងកម្សាន្តជាមួយគ្នាក្នុងឱកាសបុណ្យទានប្រពៃណីផ្សេងៗបាន។ (ក្នុងរូប៖ របាំបាចផ្ការបស់ក្រុមសិល្បៈ Khmer ខេត្ត Cà Mau)។
បណ្តា "គ្រាប់ពូជ" ផ្នែកខាងសិល្បៈទាំងនេះ កំពុងត្រូវបានដាំបណ្តុះនៅកាម៉ាវនាពេលបច្ចុប្បន្ន សង្ឃឹមថានឹងដុះរីកសាយភាយ រួមចំណែកធ្វើឱ្យកាន់តែសម្បូរបែបខ្លាំងថែមទៀតនូវផ្ទាំងគំនូរវប្បធម៌ចម្រុះពណ៌នៃទឹកដីចុងជ្រោយបង្អស់របស់ប្រទេសជាតិទៀតផង៕
Đờ Ni - Danh Điệp
