រៀងរាល់ឱកាសបុណ្យចូលឆ្នាំថ្មីប្រពៃណីជាតិ ពេលដែលតាមបណ្តាភូមិស្រុក Khmer អ៊ូអរអមដោយបរិយាកាសបុណ្យទាន នំខ្ញីតែងតែមានវត្តមានជាផ្នែកមួយដែលមិនអាចខ្វះបាន។ មិនត្រឹមតែជាមុខម្ហូបប្រពៃណីប៉ុណ្ណោះទេ នំខ្ញីថែមទាំងបង្កប់នូវតម្លៃវប្បធម៌ និងស្មារតីដ៏ជ្រាលជ្រៅទៀតផង។
អ្នកមីង Thạch Thị Niêm នៅអនុសង្កាត់ Biển Đông B សង្កាត់ HiệpThành កំពុងបង្ហាត់បង្ហាញកូនចៅពីរបៀបធ្វើនំខ្ញី។
នំខ្ញីត្រូវបានធ្វើឡើងពីគ្រឿងផ្សំដែលធ្លាប់បានឃើញ ដូចជា៖ ម្សៅអង្ករ ពងមាន់ និងស្ករជាដើម។ ទោះបីជាគ្រឿងផ្សំមានសភាពសាមញ្ញពិតមែន ប៉ុន្តែដើម្បីបង្កើតបានជានំដែលមានភាពស្រួយ ពណ៌លឿងស្រស់ និងមានរសជាតិផ្អែមមុតផងនោះ អ្នកធ្វើត្រូវតែមានបទពិសោធន៍ និងភាពប៉ិនប្រសព្វ។ ចាប់តាំងពីដំណាក់កាលលាយម្សៅឱ្យមានភាពស្អិតល្មម និងកាច់រាងជាមែកតូចៗពត់ពេនដូចមើមខ្ញីរហូតដល់ដំណាក់កាលបំពង និងការស្រោបស្រទាប់ស្ករពីខាងក្រៅ សុទ្ធតែទាមទារនូវភាពផ្ចិតផ្ចង់ និងការអត់ធ្មត់យ៉ាងខ្ពស់ផងដែឬ។
នៅអនុសង្កាត់ បៀនដុង B សង្កាត់ ហ៊ីបថាញ់ អ្នកមីង ថាច់ធីនីម នៅតែរក្សាទម្លាប់ធ្វើនំខ្ញីរៀងរាល់ឱកាសបុណ្យទានប្រចាំឆ្នាំ។ អ្នកមីងបានរៀបរាប់ថា តាំងពីនៅតូច ខ្លួនបានរៀនធ្វើនំនេះតាមអ្នកម្តាយ ដោយដំបូងឡើយគ្រាន់តែជួយការងារស្រាលៗ បន្ទាប់មកទើបចេះពីរបៀបលាយម្សៅ និងចាប់រាងនំ។ អ្នកមីង នីម បានចែករំលែកថា៖ “ការធ្វើនំខ្ញីមិនពិបាកនោះទេ ប៉ុន្តែចង់ឱ្យមានរសជាតិឆ្ងាញ់គឺត្រូវតែមានភាពអត់ធ្មត់។ ម្សៅត្រូវតែល្មមនឹងដៃ ចាប់រាងឱ្យស្មើ និងបំពងត្រូវមើលភ្លើងជាប្រចាំ”។ ដើម្បីរក្សាមុខរបរប្រពៃណីនេះ អ្នកមីងថែមទាំងបានបង្ហាត់បង្ហាញដល់កូនចៅក្នុងផ្ទះ ដោយសង្ឃឹមចង់ឱ្យរសជាតិនំខ្ញីប្រចាំស្រុកកំណើត មិនត្រូវបានបាត់បង់ទៅតាមពេលវេលា។
ដូចគ្នានឹងអ្នកមីង នីម ដែរ អ្នកមីង ថាច់ធីភឿង នៅភូមិកៃយ៉ា ឃុំហឹងហូយ ក៏បានផ្សារភ្ជាប់ជាមួយនឹងមុខរបរធ្វើនំខ្ញីនេះអស់រយៈពេលជាច្រើនឆ្នាំមកហើយដែរ។ ក្នុងថ្ងៃជិតដល់បុណ្យទាន ឬក៏រដូវកាលអាពាហ៍ពិពាហ៍ម្តងៗ ផ្ទះដ៏តូចរបស់អ្នកមីងកាន់តែមមាញឹកជាងមុនជាមួយនឹងឡនំថ្មីៗ។ តាមអ្នកមីង នំខ្ញីមិនត្រឹមតែមានវត្តមាននៅលើអាសនៈដូនតាប៉ុណ្ណោះទេ ថែមទាំងជាជំនូនសម្រាប់ក្នុងពិធីមង្គលការទៀតផង នេះជានិមិត្តរូបនៃសេចក្តីស្មោះស្ម័គ្រ និងភក្តីភាពផងដែរ។
ក្នុងថ្ងៃជិតដល់បុណ្យចូលឆ្នាំថ្មី គ្រួសារអ្នកមីង Thạch Thị Phương នៅភូមិ Cái Giá ឃុំ Hưng Hội តែងមមាញឹកធ្វើនំខ្ញីប្រពៃណី។
អ្នកមីង ភឿង បានឱ្យដឹង៖ “ក្នុងឱកាសបុណ្យចូលឆ្នាំថ្មីម្តងៗ មួយថ្ងៃគ្រួសារខ្ញុំធ្វើបានអស់ពងមាន់ប្រហែល ៦០ គ្រាប់ ហើយអាចធ្វើជានំបានប្រមាណ ៣៥ ទៅ ៤០ ប្រអប់ផងដែរ។ ដោយសារធ្វើដោយដៃផ្ទាល់ ទើបមិនអាចធ្វើបានច្រើនជាងនេះឡើយ ប៉ុន្តែអ្វីដែលសំខាន់គឺរក្សាបាននូវគុណភាព និងរសជាតិបែបប្រពៃណី”។
ពីមុខនំខ្ញីមានសភាពសាមញ្ញក្នុងភូមិស្រុក តែឥឡូវនំខ្ញី ហឹងហូយ ត្រូវបានទទួលស្គាល់ជាផលិតផល OCOP កម្រិតផ្កាយ ៣។ ការចូលរួមក្នុងកម្មវិធី OCOP ក៏បានជួយដល់បណ្តាគ្រួសារផលិតនំកាន់តែយកចិត្តទុកដាក់ជាងមុនចំពោះដំណើរការកែច្នៃ និងការកែលម្អសោភ័ណភាពវេចខ្ចប់ ដើម្បីឈានជើងចូលទៅកាន់ទីផ្សារឱ្យកាន់តែទូលំទូលាយជាងទៀត។
ក្នុងជីវភាពវប្បធម៌របស់បងប្អូន Khmer នំខ្ញីតែងផ្សារភ្ជាប់ជាមួយនឹងពិធីបុណ្យទានប្រពៃណី។ ចាននំដែលត្រូវបានដាក់តាំងយ៉ាងសមរម្យនៅលើអាសនៈដូនតាក្នុងឱកាសបុណ្យទាន បានបង្ហាញពីសេចក្តីគោរព និងក្តីសង្ឃឹមក្នុងឆ្នាំថ្មីប្រកបដោយសេចក្តីសុខ និងភាពសម្បូរសប្បាយ។
នំខ្ញីត្រូវបានដាក់តាំងយ៉ាងសមរម្យនៅអាសនៈដូនតាក្នុងឱកាសបុណ្យទាន ដើម្បីបង្ហាញពីសេចក្តីគោរព និងក្តីសង្ឃឹមក្នុងឆ្នាំថ្មីពេញដោយក្តីសុខ និងបរិបូរណ៍។
មិនត្រឹមតែប៉ុណ្ណោះ ដំណើរការនៃការធ្វើនំ ក៏ជាឱកាសសម្រាប់សមាជិកក្នុងគ្រួសារជួបជុំគ្នា បង្ហាត់បង្ហាញមុខរបរដល់កូនចៅជំនាន់ក្រោយផងដែរ។ តាមរយៈនោះ មិនត្រឹមតែមុខរបរប្រពៃណីត្រូវបានរក្សាប៉ុណ្ណោះទេ សម្រាប់ខាងតម្លៃវប្បធម៌ និងរឿងរ៉ាវអំពីបុណ្យចូលឆ្នាំពីមុនៗ ក៏ត្រូវបានបន្តវេនគ្នាយ៉ាងមានលក្ខណៈធម្មជាតិបំផុតនោះដែរ។
ក្នុងដំណើរជីវិតនសសម័យទំនើបដូចសព្វថ្ងៃ នំខ្ញីនៅតែរក្សាបានទីតាំងរៀងខ្លួនក្នុងជីវភាពរបស់បងប្អូន Khmer ។ មិនត្រឹមតែដោយសារភាពសាមញ្ញ និងលក្ខណៈប្រពៃណីប៉ុណ្ណោះទេ ប្រភេទនំនេះថែមទាំងបង្កប់នូវអត្ថន័យដ៏ជ្រាលជ្រៅ ផ្សារភ្ជាប់ជាមួយនឹងទំនៀមទម្លាប់ និងជំនឿសាសនារបស់បងប្អូន Khmer យើងទៀតផង៕
Huyền Trang - Anh Tuấn
