ក្នុងសម្រស់វប្បធម៌ដ៏វិសេសវិសាលរបស់សហគមន៍ជនជាតិចិននៅខេត្ត Cà Mau គឺទំនៀមទម្លាប់ពិធីបូជាសក្ការៈ។ ទាំងនោះគឺជាពិធីសាសនាបែបប្រជាប្រិយ គ្រឿងសក្ការៈដែលបង្កប់នូវអត្ថន័យមង្គល ព្រមទាំងទស្សនវិជ្ជាមនុស្សសាស្ត្រជ្រាលជ្រៅរបស់បុព្វបុរស។
អានសារលិខិតសរសើរតម្កើងគុណូបការៈព្រះម៉ែ នៅទីសក្ការៈព្រះម៉ែ សង្កាត់ Bạc Liêu។
ក្នុងវប្បធម៌ជំនឿប្រជាប្រិយរបស់សហគមន៍ជនជាតិ Hoa នៅ Cà Mau ពិធីបុណ្យនីមួយៗតែងភ្ជាប់ជាមួយពិធីបូជាសក្ការៈ។ នោះគឺពិធីសែនទេវតា ពិធីបូជាមេឃដីមាតាបិតា ការតបស្នងគុណទេវតា និងថ្ងៃបុណ្យចម្រើនព្រះជន្មរបស់ព្រះជាម្ចាស់ផ្សេងៗ។ល។ ក្នុងនោះ មានពិធីដ៏សំខាន់មួយគឺការសរសេរសារលិខិតសរសើរតម្កើងគុណូបការៈ និងបួងសួងសុំឱ្យទេវតាជួយប្រោះព្រំឱ្យមេឃភ្លៀងខ្យល់សមស្របតាមរដូវកាល ប្រទេសជាតិសុខសន្តិភាព ប្រជាជនក្សេមក្សាន្ត។ សារលិខិតនេះជាធម្មតាបានម្ចាស់ពិធីអាន ឬច្រៀងសូត្រ ហើយបន្ទាប់ពីបញ្ចប់ពិធី នឹងយកទៅដុតក្នុងន័យផ្ញើសាររួមជាមួយក្តីប្រាថ្នាសុំសេចក្តីសុខ សំណាងល្អ និងភាពសម្បូរសប្បាយទៅកាន់ទេវតា។
បញ្ហាដែលគួរឱ្យព្រួយបារម្ភនាពេលបច្ចុប្បន្នគឺ ពិធីកិច្ចសាសនានេះកំពុងតែបាត់បង់បន្តិចម្តងៗ ដោយសារតែការសរសេរសារលិខិតត្រូវសរសេរជាអក្សរហាន (អក្សរ Hoa បុរាណ) ហើយរបៀបសរសេរច្រើនតែជាអក្សរសាស្ត្របុរាណ។ ខណៈពេលដែលអ្នកប្រាជ្ញអក្សរសាស្ត្រ ឬអ្នកវប្បធម៌ដែលមានជំនាញសរសេរសារលិខិតក្នុងសហគមន៍ជនជាតិចិននៅ Cà Mau បច្ចុប្បន្នមានតិចតួចណាស់ ហើយម្ចាស់ពិធីក៏ត្រូវតែចេះអានអក្សរហានទើបអាចបញ្ជូនអត្ថន័យទាំងស្រុងនៃសារលិខិតបាន។ ហេតុដូច្នេះ ការបណ្តុះបណ្តាលវប្បធម៌អក្សរសាស្ត្រ ការរក្សា និងអភិរក្សអត្ថបទបុរាណក្នុងពិធីបូជាសក្ការៈ គឺជាកិច្ចការដែលត្រូវយកចិត្តទុកដាក់ជាពិសេស ដើម្បីអភិរក្សនូវពិធីសាសនាបានចាត់ទុកថាជា "ដួងព្រលឹង" បង្ហាញពីអត្ថន័យ និងភាពថ្លៃថ្នូរនៃពិធីបុណ្យប្រពៃណី។
ទន្ទឹមនឹងសារលិខិត គ្រឿងសក្ការៈផ្សេងៗក៏មានអត្ថន័យខុសៗគ្នា តំណាងឱ្យសិរីសួស្តីមង្គល និងបង្កប់នូវក្តីប្រាថ្នារបស់មនុស្សសម័យមុន។ ប្រភេទផ្លែឈើដែលសហគមន៍ជនជាតិចិននិយមយកមកបូជាគឺ ផ្លែក្រូចឃ្វិត ឬផ្លែក្រូចពោធិ៍សាត់ ពីព្រោះផ្លែឈើទាំងពីរប្រភេទនេះតំណាងឱ្យមហាសិរីសួស្តី និងលាភសំណាងធំធេង។ ឬមុខម្ហូបបង្អែមអ៊ី (បង្អែមដំឡូង) និងនំគុជអណ្តែត តំណាងឱ្យភាពពេញបរិបូរណ៍ ឬមុខម្ហូបមីស៊ួ តំណាងឱ្យបុណ្យបារមីខ្ពង់ខ្ពស់ និងអាយុយឺនយូរ។ល។
ពិធីបូជាមេឃនៅទីសក្ការៈបូជាបុរាណ Phước Đức បួងសួងសុំភ្លៀងខ្យលសមស្របតាមរដូវកាល ប្រទេសជាតិសុខសន្តិភាព នៅសង្កាត់បាកលីវ។
ខេត្ត Cà Mau បានជ្រើសរើសការអភិវឌ្ឍន៍ទេសចរណ៍វប្បធម៌ជាសសរស្តម្ភដ៏សំខាន់មួយសម្រាប់ការអភិវឌ្ឍន៍សេដ្ឋកិច្ច - សង្គម។ ដូច្នេះ ការយកចិត្តទុកដាក់វិនិយោគលើការអភិរក្ស និងការលើកកម្ពស់តម្លៃវប្បធម៌របស់សហគមន៍ជនជាតិនានាមានអត្ថន័យយ៉ាងសំខាន់។ ទំនៀមទម្លាប់ដ៏ល្អប្រពៃណី និងសម្រស់វប្បធម៌ទាំងនេះ ក៏បង្កើតបានជានូវភាពប្រកួតប្រជែងដាច់ដោយឡែកសម្រាប់វិស័យទេសចរណ៍របស់ខេត្តផងដែរ។
ដើម្បីសម្រេចបាននូវចំណុចនេះ វិស័យវប្បធម៌ចាំបាច់ត្រូវបង្កើនការវិនិយោគ និងមានគោលនយោបាយគាំទ្រក្នុងការប្រមូលចងក្រង ស្រាវជ្រាវ និងរៀបរៀងពិធីសាសនានៃការបូជាសក្ការៈ។ ពីព្រោះមកដល់ពេលនេះ ខេត្ត Cà Mau នៅមិនទាន់មានស្នាដៃស្រាវជ្រាវស៊ីជម្រៅលើវិស័យនេះនៅឡើយទេ។ ម្យ៉ាងវិញទៀត នេះក៏ជាកិច្ចការដែលត្រូវធ្វើក្នុងការប្រមូលព័ត៌មានដើម្បី "ធ្វើឌីជីថលូបនីយកម្ម" ភ្ជាប់ជាមួយការផ្សព្វផ្សាយសម្រស់វប្បធម៌ប្រពៃណីដល់ភ្ញៀវទេសចរជាតិ និងអន្តរជាតិ និងរួមចំណែកយ៉ាងសំខាន់ក្នុងការកំណត់អត្តសញ្ញាណខេត្តកាម៉ាវដែលសម្បូរទៅដោយអត្តសញ្ញាណវប្បធម៌៕
Lư Kiết Tường
