ក្នុងបរិយាកាសដ៏បុរាណនៃវត្តកោះដូង ឃុំ Vĩnh Phước ខេត្ត Cà Mau នាថ្ងៃចុងសប្តាហ៍ ស្រាប់តែក្លាយជាអ៊ូអរខ្ទរខ្ទារទៅដោយសូរសព្ទដូរ្យតន្ត្រីពិណពាទ្យ រួមជាមួយជំហានរាំយ៉ាងរស់រវើករបស់សមាជិកក្រុមរបាំប្រពៃណីកុមារ Khmer។
សកម្មភាពសម្តែងមួយរបស់ក្រុមរបាំប្រពៃណី Khmer វត្តកោះដូង។
ផ្តើមពីទឹកចិត្តយ៉ាងមុះមុតក្នុងការអភិរក្សសិល្បៈវប្បធម៌ជនជាតិនៅមូលដ្ឋាន គណៈកម្មការវត្តបានបង្កើតក្រុមរបាំនេះឡើង។ ការបណ្តុះបណ្តាលធនធាន “កូនចៅក្នុងភូមិស្រុក” មិនត្រឹមតែជួយឱ្យវត្តម្ចាស់ការក្នុងការបម្រើបុណ្យទានផ្សេងៗប៉ុណ្ណោះទេ ថែមទាំងជួយប្រឹតសំចៃចំណាយក្នុងការជួលពីខាងក្រៅទៀតផង។ ក្រុមរបាំនេះបានដឹកនាំដោយអ្នកគ្រូ Thạch Thị Sô Phi ដែលជាកូនចៅក្នុងភូមិស្រុក ធ្លាប់ជាសមាជិកក្រុមសិល្បៈនៃសាកលវិទ្យាល័យកឹ Cần Thơ ។ ដោយចំណេះដឹងដ៏រឹងមាំ អ្នកគ្រូបានវិលមកភូមិស្រុក ដើម្បីផ្ទេរចំណេះដឹង និងបណ្តុះក្តីស្រឡាញ់សិល្បៈដល់ប្អូនៗកុមារ។
ជារៀងរាល់ថ្ងៃសៅរ៍ និងអាទិត្យ វេលាម៉ោង ៥ ល្ងាច ប្អូនៗតែងមកជួបជុំគ្នានៅទីធ្លាវត្តដើម្បីហាត់រៀន។ ដោយឡែកក្នុងរដូវវិស្សមកាល ការហាត់រៀនបានរៀបចំឡើងជារៀងរាល់ថ្ងៃ ដោយបែងចែកជា ៣ ក្រុម៖ ក្រុមរបាំបុរាណ របាំយក្ស-ស្វា ដ៏រីករាយ និងក្រុមរបាំមហាជនដូចជា រាំវង់ សារ៉ាវ៉ាន់ ឡាំលាវ។
ក្រៅពីក្រុមរបាំ វត្តកោះដូងនៅទាំងបានបង្កើតក្រុមតន្ត្រីពិណពាទ្យ ក្រុមរបាំយក្ស ។ល។ ដើម្បីបម្រើក្នុងឱកាសបុណ្យទានផ្សេងៗ។
អ្នកគ្រូ Sô Phi ឱ្យដឹងថា ទោះបីការរៀបចំកាលវិភាគហាត់រៀនមានការលំបាកខ្លះៗ ដោយសារពេលទំនេររបស់ប្អូនៗមិនទៀងទាត់ ប៉ុន្តែក្តីស្រឡាញ់ចំពោះមរតកដូនតាបានចងភ្ជាប់ក្រុមទាំងមូល។ ពីកុមារដែលមិនធ្លាប់ស្គាល់សិល្បៈ ឥឡូវនេះប្អូនៗអាចសម្តែងយ៉ាងស្ទាត់ជំនាញ។ ប្អូនស្រី Sơn Thị Sóc Kha សមាជិកក្រុមរបាំ បានពោលទាំងក្តីរំភើបថា៖ «កាលពីមុនប្អូនមិនចេះរាំទេ ប៉ុន្តែក្រោយពីបានរៀន ប្អូនកាន់តែស្រឡាញ់សិល្បៈជនជាតិរបស់ខ្លួនខ្លាំងណាស់»។
ឈុតរបាំជូនពររបស់ក្រុមរបាំប្រពៃណីកុមារ Khmer វត្តកោះដូង។
លោក Trần On អនុប្រធានគណៈកម្មការវត្តកោះដូង បានសម្ដែងនូវក្ដីរីករាយថា៖ «ការបង្កើតក្រុមរបាំនេះបាននាំមកនូវជំនោរថ្មីដល់បរិយាកាសបុណ្យទានក្នុងវត្ត បំបាត់នូវភាពស្ងប់ស្ងាត់កាលពីមុន។ បងប្អូនក្នុងភូមិស្រុកមានសេចក្តីត្រេកអរជាខ្លាំង ពេលឃើញកូនចៅរបស់ខ្លួនកំពុងរួមចណែកថែរក្សា និងលើកតម្កើងតម្លៃវប្បធម៌ប្រពៃណីរបស់ដូនតា»។
ក្នុងវត្តនេះ “ពន្លកសិល្បៈ” ទាំងឡាយកំពុងតែខិតខំហាត់រៀនជារៀងរាល់ថ្ងៃ ដើម្បីរួមចំណែកលើកស្ទួយសម្រស់អត្តសញ្ញាណវប្បធម៌ Khmer នៅលើទឹកដីចុងបំផុតនៃភាគត្បូងនៃមាតុភូមិ៕
Chim Đôn Ta - Chanh Đa
