ទំនៀមទម្លាប់បូជា ក្វាងថាញ់ដេគ្វឹង - ហៅម្យ៉ាងទៀតថា ក្វាងកុង ជាលក្ខណៈប្រពៃនៃវប្បធម៌ជំនឿរបស់សហគមន៍ជនជាតិចិន ដែលបង្ហាញពីក្តីប្រាថ្នាសេចក្តីសុខសាន្ត និងការបួងសួងសុំឱ្យរកស៊ីមានបាន និងមានលាភមានជ័យ។
អាសនៈបូជា ក្វាងកុង (រូបសំណាក៣នៅខាងឆ្វែង) រួមជាមួយព្រះក្វាងអឹម និងព្រះគ្រូ លីដាវមិញ ក្នុងផ្ទះគ្រួសារជនជាតិចិនមួយកន្លែងនៅខេត្តកាម៉ាវ។
ក្វាងកុង ឈ្មោះពិតថា ក្វាងវូ ហៅក្រៅថា វ៉ឹនទ្រឿង ជាមេទ័ពល្បីឈ្មោះឈានមុខក្នុងចំណោម មេទ័ពខ្លាទាំងប្រាំ ក្នុងសម័យ សាមកុក ហើយបានគេលើកតម្កើងរូបតំណាងជាវរៈមេទ័ពដ៏អង់អាចក្លាហាន ដែលមានស្នាដៃធំធេងក្នុងការស្ថាបនាគ្រឹះរាជវាំងស៊ូហាន។ លោកល្បីខាងទឹកចិត្តស្មោះត្រង់និងសច្ចធម៌ ទើបប្រជាជនគោរពបូជា និងលើកតម្កើងលោកជា ព្រះអង្គ ក្វាង ថាញ់ដេគ្វឹង។
ក្នុងជំនឿប្រពៃណីរបស់សហគមន៍ជនជាតិចិន លោក ក្វាងកុង បានចាត់ទុកជាទេវតាការពារ បណ្តេញខ្មោចព្រាយបិសាច និងនាំមកនូវសេចក្តីសុខសាន្ត សំណាងល្អ ហេតុនេះហើយបានជាគ្រួសារភាគច្រើនតែងតាំងអាសនៈបូជា។ ជាពិសេស អ្នករកស៊ីជួញដូរតែងតាំងបូជាព្រះអង្គ ក្វាងកុង នៅកន្លែងលក់ដូរ ឬក្នុងបន្ទប់ទទួលភ្ញៀវសំខាន់របស់ក្រុមហ៊ុន។
កម្មវិធីសម្តែងឡើងវិញនូវរូបភាពព្រះអង្គ ក្វាងថាញ់ដេគ្វឹងដើរប្រព័ទ្ធ នៅទីសក្ការបូជាបុរាណ ក្វាងដេកូមីវ - សង្កាត់ បាកលីវ។
ដោយឡែក នៅតាមវត្តអារាមរបស់ជនជាតិចិន លោក ក្វាងកុង បានបូជា ជាព្រះពោធិសត្វ យ៉ា ឡា រួមជាមួយនិងលោក វីដាហូផាប ដើម្បីជួយថែរក្សាការពារព្រះធម៌ និងព្រះរតនត្រ័យក្នុងព្រះពុទ្ធសាសនា។ ក្នុងសាសនាតាវវិញ លោក ក្វាងកុង បានគេតម្កើងជា ភុកម៉ាដាយដេ ដែលជាទេវតាបង្ក្រាបនិងកម្ចាត់ខ្មោចព្រាយបិសាច។
រីឯនៅតាមក្លឹបហាត់ក្បាច់គុន ឬក្រុមរបាំតោ លោកបានចាត់ទុកជាគ្រូដើម ដែលតែងហៅដោយឈ្មោះដ៏ស្និទ្ធស្នាលថា “ក្វាងញីកា” ក្នុងគោលបំណងលើកកម្ពស់ស្មារតីស្មោះត្រង់ ចិត្តទូលាយ និងពង្រីកប្រពៃណីសាមគ្គីរបស់សហគមន៍ជនជាតិចិន។ ចំណុចនេះក៏បានពន្យល់ ថា ឱ្យតែទីណាមានជនជាតិចិនរស់នៅ គឺទីនោះតែងមានទំនៀមទម្លាប់បូជា ក្វាងកុង ដោយនឹងអត្ថន័យនៃភាពសាមគ្គី ការពារ និងរួមគ្នារកស៊ីមានបាន។
គំនូរប្រពៃណីតួអង្គទាំង ៣ ដោយមានព្រះអង្គ ក្វាងថាញ់ដេគ្វឹង គង់នៅកណ្តាល អមដោយលោក ចូវធឿង នៅខាងស្តាំ និង លោក ក្វាងប៊ិញ នៅខាងឆ្វែង។
នៅតាមវត្តអារាមនានា ទិវាបូជា ក្វាងថាញ់ដេគ្វឹង(ថ្ងៃ ២៤ ខែ ៦ ច័ន្ទគតិ) បានប្រារព្ធធ្វើឡើងយ៉ាងអធិកអធម ដែលទាក់ទាញប្រជាជនក្នុងស្រុក និងភ្ញៀវទេសចរមកបួងសួងសុំពរជ័យ រហូតក្លាយជាពិធីបុណ្យប្រពៃណីដ៏លេចធ្លោមួយរបស់សហគមន៍ជនជាតិចិននៅខេត្តកាម៉ាវ៕
អត្ថបទនិងរូប៖ លឺឡឹមហ៊ី
