គណៈកម្មាធិការប្រជាជនខេត្ត Cà Mau ទើបបានចេញផ្សាយផែនការស្តីពីការធានាសណ្តាប់ធ្នាប់ សុវត្ថិភាពចរាចរណ៍ ក្នុងឱកាសបុណ្យចូលឆ្នាំសកល និងបុណ្យចូលឆ្នាំ Tết ប្រពៃណី (ឆ្នាំមមី) និង បុណ្យនិទាឃរដូវឆ្នាំ ២០២៦។ ចាប់ផ្តើមអនុវត្តរហូតដល់ថ្ងៃទី ៤ ខែមីនា ឆ្នាំ ២០២៦ (ត្រូវនឹងថ្ងៃ១រោចខែមាឃ ឆ្នាំមមី)។
ការិយាប៉ូលិសចរាចរណ៍ នៃស្នងការដ្ឋាននគរបាលខេត្ត Cà Mau បង្កើនការល្បាត ត្រួតពិនិត្យចរាចរណ៍ ដើម្បីធានាសណ្តាប់ធ្នាប់សុវត្ថិភាពចរាចរណ៍ក្នុងឱកាសបុណ្យ Tết និងពិធីបុណ្យនិទាឃរដូវឆ្នាំ ២០២៦។
យោងតាមផែនការ ខេត្ត Cà Mau បានដាក់គោលដៅធានាការធ្វើចរាចរណ៍ឱ្យបាន រលូន សុវត្ថិភាព ឆ្លើយតបតម្រូវការធ្វើដំណើរ និងដឹកជញ្ជូនទំនិញរបស់ប្រជាជនក្នុងឱកាសបុណ្យចូលឆ្នាំ។ ទន្ទឹមនឹងនោះកាត់បន្ថយគ្រោះថ្នាក់ចរាចរណ៍ធ្ងន់ធ្ងរ និងមិនបណ្តោយឱ្យកើតមានការកកស្ទះចរាចរណ៍អូសបន្លាយក្នុងអំឡុងពេលមមាញឹក។
ភារកិច្ចសំខាន់មួយគឺជំរុញការងារផ្សព្វផ្សាយ ច្បាប់ស្តីពីសណ្តាប់ធ្នាប់សុវត្ថិភាពចរាចរណ៍ ចលនាប្រជាជនឱ្យស្ម័គ្រចិត្តអនុវត្តតាមបទប្បញ្ញត្តិនៅពេលចូលរួមចរាចរណ៍ ជាពិសេសគឺសារ “ពិសាស្រា បៀរហើយ - មិនបើកបរយានយន្ត” មិនបើកបរលឿន ឆ្លងមុខដោយធ្វេសប្រហែស ឌុបមនុស្សលើសចំនួនកំណត់ និងត្រូវពាក់មួកសុវត្ថិភាពត្រឹមត្រូវតាមស្តង់ដារ។ ស្ថាប័នមានសមត្ថកិច្ចប្រកាសលេខទូរស័ព្ទបន្ទាន់ ដើម្បីទទួល និងដោះស្រាយទាន់ពេលវេលានូវការឆ្លុះបញ្ចាំងរបស់ប្រជាជន។
នគរបាលខេត្តប្រគល់ភារកិច្ចបង្កើនការល្បាត ត្រួតពិនិត្យ និងដោះស្រាយយ៉ាងតឹងរឹងនូវអំពើល្មើសច្បាប់ដែលជាមូលហេតុចម្បងនាំឱ្យគ្រោះថ្នាក់ចរាចរណ៍ ទាំងផ្លូវគោក និងផ្លូវទឹក ដូចជា៖ ល្មើសល្បឿន កម្រិតជាតិអាល់កុល គ្រឿងញៀន ដឹកលើសទម្ងន់ មិនបំពាក់អាវពោង ឬឧបករណ៍សង្គ្រោះជីវិត។ ប្តេជ្ញាទប់ស្កាត់ និងដោះស្រាយយ៉ាងតឹងរឹងនូវអំពើប្រណាំងរថយន្តខុសច្បាប់ ការប្រមូលផ្តុំបង្កអសន្តិសុខសណ្តាប់ធ្នាប់សាធារណៈ។
ផែនការក៏តម្រូវឱ្យលើកកម្ពស់គុណភាពខាងសេវាកម្មដឹកជញ្ជូន ធានាមានមធ្យោបាយគ្រប់គ្រាន់ដើម្បីបម្រើតម្រូវការធ្វើដំណើររបស់ប្រជាជន គ្រប់គ្រងយ៉ាងតឹងរឹងនូវស្ថានភាព “រថយន្តគ្មានចំណតកំណត់ ចំណតខុសច្បាប់” ការដំឡើងថ្លៃសំបុត្រខុសច្បាប់។ ទន្ទឹមនឹងនោះ អង្គភាពគ្រប់គ្រងហេដ្ឋារចនាសម្ព័ន្ធចរាចរណ៍ ត្រូវផ្តោតលើការពិនិត្យ និងជួសជុលទាន់ពេលវេលានូវចំណុចដែលបាត់បង់សុវត្ថិភាព បំពេញបន្ថែមប្រព័ន្ធផ្លាកសញ្ញា និងការបែងចែកគន្លងចរាចរណ៍ឱ្យបានសមស្រប ជាពិសេសនៅតាមតំបន់ដែលប្រារព្ធពិធីបុណ្យ។
កងកម្លាំងសមត្ថកិច្ចកំពុងបំពេញភារកិច្ច ត្រួតពិនិត្យឯកសារចំពោះអ្នកបើកបររថយន្តដឹកទំនិញ និងបញ្ញើប្រៃសណីយ៍ នៅលើផ្លូវជាតិលេខ ១។
គណៈកម្មាធិការប្រជាជនខេត្តប្រគល់ឱ្យបណ្តាមន្ទីរ ស្ថាប័ន និងមូលដ្ឋាន ប្រមូលផ្តុំកម្លាំងជាអតិបរមា ចាត់កម្លាំងប្រចាំការ ២៤/២៤ ម៉ោង ក្នុងអំឡុងពេលមមាញឹក សហការយ៉ាងជិតស្និទ្ធដើម្បីធានាសណ្តាប់ធ្នាប់សុវត្ថិភាពចរាចរណ៍ រួមចំណែកឲ្យប្រជាជនសប្បាយរីករាយក្នុងឱកាសបុណ្យចូលឆ្នាំ ទទួលអំណរនិទាឃរដូវដោយសុវត្ថិភាព និងល្អប្រសើរ៕
Trần Chuyển - Chí Diện
