បញ្ចប់ដំណាក់កាលទី ១ (២០២១-២០២៥) កម្មវិធីគោលដៅជាតិស្តីពីការអភិវឌ្ឍសេដ្ឋកិច្ច-សង្គមតំបន់ជនជាតិភាគតិច និងតំបន់ភ្នំ (ហៅកាត់កម្មវិធី) ខេត្ត Cà Mau ទទួលបានលទ្ធផលគួរឱ្យលើកទឹកចិត្ត។ ចាប់ពីការឧបត្ថម្ភលំនៅឋាន មុខរបរចិញ្ចឹមជីវភាពរហូតដល់ការវិនិយោគហេដ្ឋារចនាសម្ព័ន្ធចាំបាច់ ទុក្ខលំបាកដែលអូសបន្លាយជាយូរមកហើយនៅតំបន់ដែលមានជនរួមជាតិភាគតិចរស់នៅកុះករ បានដោះស្រាយជាសន្សឹមៗ បង្កើតបានជាការផ្លាស់ប្តូរជាវិជ្ជមានក្នុងជីវភាពរស់នៅរបស់បងប្អូនប្រជាជន និងសោភ័ណភាពភូមិស្រុក។
ទម្រង់ផលិតរួមផ្សំការចិញ្ចឹមជលផលរបស់គ្រួសារជនរួមជាតិភាគតិច បាននាំមកនូវប្រាក់ចំណូលស្ថិរភាព រួមចំណែកកែលម្អជីវភាពរស់នៅផងដែរ។
ក្នុងដំណើរការអនុវត្តគម្រោង និងអនុគម្រោងនៃកម្មវិធី ខេត្ត Cà Mau បានផ្តោតលើប្រភពធនធានសម្រាប់តំបន់ដែលជួបលំបាកបំផុត ធានាគោលនយោបាយទៅដល់ចំមុខសញ្ញា និងសមស្របតាមតម្រូវការជាក់ស្តែង។ វិធីសាស្រ្តនេះបានជួយកាត់បន្ថយការវិនិយោគដែលមានលក្ខណៈរាយប៉ាយ លើកកម្ពស់ប្រសិទ្ធភាពនៃការប្រើប្រាស់ប្រភពទុន និងបង្កើតការឯកភាពគ្នារបស់បងប្អូនប្រជាជនក្នុងការចាត់តាំងអនុវត្ត។
លទ្ធផលដែលលេចធ្លោនៃដំណាក់កាលទី ១ គឺការឧបត្ថម្ភលំនៅឋាន និងការរក្សាស្ថិរភាពមុខរបរសម្រាប់គ្រួសារជនរួមជាតិភាគតិចដែលក្រីក្រ។ ទូទាំងខេត្តសាងសង់ថ្មី និងជួសជុលផ្ទះបានជាង ១.៥០០ ខ្នង ជួយឱ្យគ្រួសារជាច្រើនមានកន្លែងស្នាក់នៅរឹងមាំ និងអាចស្ងប់ចិត្តក្នុងការធ្វើពលកម្មផលិតកម្ម។ ទន្ទឹមនឹងនោះ ជាង ៤.០០០ គ្រួសារទទួលបានការឧបត្ថម្ភផ្លាស់ប្តូរមុខរបរ និងអភិវឌ្ឍសេដ្ឋកិច្ច ព្រមទាំងប្រភពទឹកស្អាតប្រើប្រាស់ ដែលជួយបង្កើនជីវភាពរស់នៅជាសន្សឹមៗ។
លោក Lâm Văn Nhiếp នៅភូមិ Khánh Tư ឃុំ Cái Nước បានឱ្យដឹងថា៖ ដោយសារទទួលបានការឧបត្ថម្ភលំនៅឋាន និងមុខរបរ គ្រួសារលោកលែងព្រួយបារម្ភអំពីកន្លែងស្នាក់នៅណ្ដោះអាសន្នដូចមុនទៀតហើយ។ ដោយមានផ្ទះស្នាក់នៅរឹងមាំ និងលក្ខណៈផលិតមានស្ថិរភាព លោកនិងបងប្អូនក្នុងភូមិមានភាពកក់ក្តៅជាខ្លាំង និងផ្តោតអារម្មណ៍លើការធ្វើពលកម្ម និងអភិវឌ្ឍន៍សេដ្ឋកិច្ច ដែលធ្វើឱ្យជីវភាពកាន់តែប្រសើរឡើង។
ក្នុងវិស័យផលិត កម្មវិធីបានឧបត្ថម្ភអភិវឌ្ឍន៍ទម្រង់សេដ្ឋកិច្ចជាង ១៣០ ទម្រង់ដែលមានដូចជា៖ ការចិញ្ចឹមជលផល បសុសត្វ ដាំដំណាំ និងការផលិតរួមផ្សំផ្សេងៗជាដើម។ ទម្រង់ទាំងនេះបានជ្រើសរើសឱ្យមានភាពសមស្របទៅនឹងលក្ខណៈនៃតំបន់នីមួយៗ ទាញយកផលប្រយោជន៍ពីសក្តានុពលដែលមានស្រាប់ បង្កើតការងារធ្វើនៅនឹងកន្លែង។ល។ ជួយបង្កើនប្រាក់ចំណូលជូនបងប្អូនជនរួមជាតិផងដែរ។
យោងតាមលោក Nguyễn Thanh Nhàn អនុប្រធានគណៈកម្មាធិការប្រជាជនឃុំ Hồ Thị Kỷ ដំណើរការអនុវត្តបានបង្ហាញថា បងប្អូនប្រជាជនមានភាពម្ចាស់ការជាងមុនក្នុងការជ្រើសរើសទម្រង់ដែលសមស្របនឹងលក្ខណៈគ្រួសារនីមួយៗ។ ពេលដែលបានអនុវត្តចំមុខសញ្ញា មានការផ្សព្វផ្សាយជាសាធារណៈ និងមានការណែនាំជាក់លាក់ ទម្រង់ទាំងនេះមិនត្រឹមតែនាំមកនូវប្រសិទ្ធភាពខាងវិស័យសេដ្ឋកិច្ចប៉ុណ្ណោះទេ ថែមទាំងជួយផ្លាស់ប្តូរផ្នត់គំនិតក្នុងការផលិតរបស់បងប្អូនជនជាតិភាគតិចតាមទិសដៅនិរន្តរភាពទៀតផង។
ទន្ទឹមនឹងការឧបត្ថម្ភមុខរបរចិញ្ចឹមជីវិត ខាងវិស័យហេដ្ឋារចនាសម្ព័ន្ធសេដ្ឋកិច្ច-សង្គមតំបន់ដែលមានជនរួមជាតិភាគតិចរស់នៅកុះករ ក៏ត្រូវបានយកចិត្តទុកដាក់វិនិយោគ និងលើកកម្ពស់ផងដែរ។ ដំណាក់កាលទី ១ បានសាងសង់ថ្មី និងជួសជុលសំណង់ហេដ្ឋារចនាសម្ព័ន្ធចាំបាច់ប្រមាណជាង ៤០០ កន្លែង រួមមានផ្លូវគមនាគមន៍ជនបទ សាលារៀន ដំណាក់សុខាភិបាល អាគារវប្បធម៌សហគមន៍។ល។ តាមរយៈនោះបានរួមចំណែកលើកកម្ពស់លទ្ធភាពទទួលបានសេវាសង្គមមូលដ្ឋានសម្រាប់ប្រជាជន និងបង្កើតមូលដ្ឋានគ្រឹះសម្រាប់ការអភិវឌ្ឍសេដ្ឋកិច្ចនៅតាមភូមិស្រុកទៀតផង។
សំណង់ផ្លូវគមនាគមន៍នៅតាមតំបន់ដែលមានជនរួមជាតិភាគតិចរស់នៅកុះករ ត្រូវបានវិនិយោគ និងលើកកម្ពស់ ជួយឱ្យការធ្វើដំណើរ និងការដោះដូរទំនិញរបស់ប្រជាជនមានភាពងាយស្រួលជាង។
យោងតាមការវាយតម្លៃលទ្ធផលរួម លោក Lương Văn Pho អនុប្រធានមន្ទីរជនជាតិនិងសាសនា បានឱ្យដឹងថា៖ កម្មវិធីបានផ្តោតសំខាន់លើតម្រូវការចាំបាច់របស់បងប្អូនជនជាតិភាគតិចដែលមានដូចជា លំនៅឋាន មុខរបរ ហេដ្ឋារចនាសម្ព័ន្ធ។ល។ ផ្តើមពីនោះ ក៏បង្កើតបានការផ្លាស់ប្តូរជាក់ស្តែងសម្រាប់ជីវភាពរស់នៅរបស់បងប្អូនប្រជាជន។ នេះគឺជាមូលដ្ឋានគ្រឹះដ៏សំខាន់ដើម្បីបន្តអនុវត្តកម្មវិធីក្នុងដំណាក់កាលបន្តទៀត តាមទិសដៅនិរន្តរភាព និងមានប្រសិទ្ធភាព។
បណ្តាលទ្ធផលសម្រាប់ដំណាក់កាលទី ១ បានបង្ហាញថា នៅពេលដែលកម្មវិធីត្រូវបានអនុវត្តយ៉ាងជិតស្និទ្ធនឹងស្ថានភាពជាក់ស្តែង មានការចាត់តាំងអនុវត្តយ៉ាងម៉ឹងម៉ាត់ និងទទួលបានការឯកភាព ការចូលរួមយ៉ាងសកម្មពីសំណាក់ប្រជាជន នោះវានឹងពង្រីកប្រសិទ្ធភាពយ៉ាងច្បាស់ក្រឡែតក្នុងការលើកកម្ពស់គុណភាពនៃការរស់នៅសម្រាប់បងប្អូនជនជាតិភាគតិចនៅខេត្ត Cà Mau៕
Nguyễn Đào - Chí Thức
