ប៉ុន្មានឆ្នាំកន្លងមកនេះ ទន្ទឹមជាមួយការអនុវត្តបណ្តាសកម្មភាពសាសនា គណៈកម្មាធិការសប្បុរសធម៌នៃព្រះពុទ្ធសាសនា Bạc Liêu បានពង្រីកស្មារតីមេត្តាករុណាជាបន្តបន្ទាប់តាមរយៈកម្មវិធីសុខុមាលភាពសង្គមជាក់ស្តែងជាច្រើន។ បណ្តាសកម្មភាពយ៉ាងសាមញ្ញទាំងនេះ ពោរពេញដោយក្តីសប្បុរសដែលផុសចេញពីទឹកចិត្តពិតៗ ព្រមទាំងផ្តល់ថែមកម្លាំងចិត្ត និងសម្រាប់អ្នកខ្វះសំណាងឆ្លងកាត់រាល់ឧបស័គ្គទាំងពួង ដើម្បីឆ្ពោះទៅអនាគតដ៏ភ្លឺស្វាង។
សមាជិកនៃគណៈសប្បុរសធម៌ព្រះពុទ្ធសាសនា Bạc Liêu ជូនអំណោយអ្នកក្រ។
គណៈសប្បុរសធម៌នៃព្រះពុទ្ធសាសនា Bạc Liêu មានសមាជិកប្រមាណជាង ១០០ រូបដែលបានចូលរួមសកម្មភាពរបស់គ្រប់បណ្តាក្រុម មានដូចជា៖ ក្រុមទទួលបន្ទុកខាងសាងសង់ស្ពាន ថ្នល់និងបេតុង ផ្លូវគមនាគមន៍ជនបទ ផ្ទះមេត្តាធម៌ ព្រមទាំងក្រុមសុខាភិបាលបន្តការជំនួយឧបត្ថម្ភខាងវះកាត់បេះដូង ចំណាយប្រាក់ពិនិត្យព្យាបាលជំងឺ និងថែទាំសុខភាពជូនអ្នកក្រ និងក្រុមជំនួយកិច្ចការងារផ្សេងៗ មានទាំងការដឹកជញ្ជូននៅរសល់អំណោយទាំងឡាយផងដែរ។ ម្នាក់ៗមានតួនាទីខុសៗគ្នា តែសុទ្ធឆ្ពោះទៅទឹកចិត្តសប្បុរសធម៌ដើម្បីសហគមន៍ដូចគ្នា។
អនុវត្តតាមទិសស្លោក "រស់នៅល្អជាតិ ល្អសាសនា” ជាច្រើនឆ្នាំកន្លងមកនេះ ការខិតខំប្រឹងប្រែងឥតឈប់ឈររបស់សមាជិកគណៈសប្បុរសធម៌បានក្លាយជាទម្លាប់សម្រាប់រដ្ឋអំណាចភូមិភាគ និងបងប្អូនប្រជាជនក្រីក្រគ្រប់ភូមិភាគទូទាំងខេត្តផងដែរ ព្រមទាំងបានពង្រីកយ៉ាងទូលំទូលាយទៅដល់តំបន់ដែលរងគ្រោះធម្មជាតិទូទាំងប្រទេស។ ពិសេស ជារៀងរាល់ឆ្នាំ ក្នុងឱកាសបុណ្យចូលឆ្នាំ Tết គណៈសប្បុរសធម៌បានរៀបចំកម្មវិធី "ស្នាមញញឹមនៃនិទាឃរដូវ" ជូនអំណោយបុណ្យតេតចាប់ពី ៥០០-១.០០០ចំណែក រួមចំណែកផ្តល់ជូននិទាឃរដូវដ៏សែនកក់ក្តៅ និងមានអត្ថន័យសម្រាប់គ្រួសារក្រីក្រទាំងឡាយលើភូូមិសាស្ត្រខេត្តផងដែរ។
ដោយឡែកក្នុងឆ្នាំ ២០២៥ គណៈសប្បុរសធម៌បានសកម្មតភ្ជាប់ទំនាក់ទំនងជាមួយសប្បុរសជនទាំងក្នុងប្រទេស និងអន្តរជាតិ រួមវិភាគទានសាងសង់ស្ពានបេតុងចំនួន ៩ ខ្សែនិងផ្ទះមេត្តាធម៌ ៥ ខ្នង ព្រមទាំងឧបត្ថម្ភអង្ករប្រចាំខែជូន ៧២ករណីជួបលំបាក ព្រមទាំងជូនអំណោយចំនួន ៥.៨០០ ចំណែកសម្រាប់សិស្សានុសិស្ស និងគ្រួសារក្រ ជនពិការ។ល។ ដោយសរុបទឹកប្រាក់ប្រមាណជិត ៤,៦ ពានើលានដុង។
ខ្លោចចិត្តចំពោះស្ថានភាពគ្រួសារដែលជួបលំបាកខ្លាំងសម្រាប់អ្នកក្រីក្រទាំងឡាយ អ្នកស្រី Nguyễn Kim Lý ប្រធានគណៈសប្បុរសធម៌នៃព្រះពុទ្ធសាសនាខេត្ត Bạc Liêu បានចែករំលែកថា “បច្ចុប្បន្ននេះ នៅមានគ្រួសារជាច្រើនកំពុងជួបការលំបាកក្នុងការរកប្រាក់ដើម្បីចិញ្ចឹមជីវិត។ អ្នកជំងឺក្រីក្រជាច្រើនត្រូវការជំនួយឧបត្ថម្ភផងដែរ ដើម្បីមានឱកាសទទួលបានការពិនិត្យព្យាបាល។ល។ ដូច្នេះហើយ ពួកគេពិតជាត្រូវការទឹកចិត្តសប្បុរស និងការយកចិត្តទុកដាក់ ចែករំលែកពីសហគមន៍ផងដែរ”។
គណៈសប្បុរសធម៌នៃព្រះពុទ្ធសាសនា Bạc Liêu បានផ្តើមចលនាទឹកចិត្តសប្បុរសជនដើម្បីជំនួយឧបត្ថម្ភផ្ទះមេត្តាធម៌ដល់គ្រួសារជួបលំបាកខាងលំនៅឋាននៅសង្កាត់ Vĩnh Lộc។
ជាមួយទឹកចិត្តសប្បុរស និងក្តីមេត្តាករុណា និងការចែករំលែកចេញពីបេះដូងពិតៗសម្រាប់អ្នកខ្វះភ័ព្វព្រេងវាសនា សមាជិកនៃគណៈសប្បុរសធម៌នៃព្រះពុទ្ធសាសនា Bạc Liêu មិនបានក្រែងចិត្ត គេចវេះពីការលំបាកនោះឡើយ តែងត្រៀមស្មារតីជានិច្ចសម្រាប់ជួយជ្រោមជ្រែងដល់អ្នកក្រីក្រ និងគ្រួសារជួបលំបាក កើតមានជំងឺដង្កាត់ផ្សេងៗជាដើម ដើម្បីបង្កើនទំនុកចិត្ត លុបបំបាត់ការខ្មាស់អៀនដើម្បីឈានឡើងក្នុងសង្គម។ រាល់គ្រប់ទង្វើសប្បុរសធម៌ដ៏ស្ងប់ស្ងាត់ទាំងនេះ មិនត្រឹមតែបានពង្រីកនូវក្តីស្រឡាញ់ក្នុងសហគមន៍ និងរួមចំណែករឹតបន្តឹងចំណងមហាសាមគ្គីទូទាំងប្រជាជនប៉ុណ្ណោះទេ ថែមទាំងអនុវត្តយ៉ាងមានប្រសិទ្ធភាពដល់ការកាត់បន្ថយក្រនៅភូមិភាគទៀតផង៕
Thuỳ Lâm
