ក្នុងចំណោមវត្ត Khmer ទាំង ២៨ ទូទាំងខេត្ត Cà Mau មានវត្តចំនួន ៦ ដែលបានកសាងឡើងក្នុងអំឡុងទសវត្សរ៍ឆ្នាំ ៧០ នៃសតវត្សមុន ដែលជាដំណាក់កាលផ្ទុះសង្គ្រាមឆាបឆេះយ៉ាងខ្លាំងក្លានៅតំបន់ Nam Bộ។ វត្តហូផុងថ្មី គឺជាវត្តមួយក្នុងចំណោមវត្តទាំងនោះ ដែលបានបង្កើតឡើងដោយផ្អែកលើមូលដ្ឋានគ្រឹះនៃសាមគ្គីភាពរវាងបងប្អូនជនជាតិទាំង ៣៖ Kinh - Khmer - Hoa។
ក្នុងឱកាសបុណ្យទាន វត្ត Hộ Phòng Mới ទាក់ទាញប្រជាជនយ៉ាងច្រើនកុះករមកចូលរួម (រូបថត៖ បុណ្យកឋិនទាន)។
វត្ត Hộ Phòng Mới មានទីតាំងស្ថិតនៅតាមបណ្ដោយផ្លូវជាតិលេខ ១ A សង្កាត់ Giá Rai ។ តាមប្រសាសន៍របស់លោក Hữu Hoàng Danh អនុប្រធានគណៈកម្មការវត្ត បានឱ្យដឹងថា៖ វត្តនេះត្រូវបានកសាងដើមទសវត្សរ៍ឆ្នាំ ៧០ នៅពេលដែលសត្រូវធ្វើការបង្ក្រាប និងតាមចាប់ប្រជាជនឱ្យចូលធ្វើទាហានបម្រើឱ្យពួកវា។ កាលនោះ វត្ត Hộ Phòng Cũ (ស្ថិតនៅត្រើយម្ខាងព្រេក) គឺជាមូលដ្ឋានបដិវត្តន៍ និងជាកន្លែងជ្រកកោនដ៏សុវត្ថិភាព ព្រោះសត្រូវមិនហ៊ានចូលទៅចាប់ប្រជាជនឡើយ។ ប៉ុន្តែ ដោយសារភូមិសាស្ត្ររាំងស្កាត់ដោយព្រែកទន្លេ ម៉្លោះហើយធ្វើឱ្យប្រជាជននៅត្រើយម្ខាងនេះពិបាកនឹងរកទីជម្រកឱ្យបានទាន់ពេលវេលា ទើបចាស់ទុំតំណាងឱ្យជនជាតិទាំង ៣ រួមមាន៖ លោក Hữu Mẫu (Khmer) លោក Chương (Kinh) និងលោកស្រី Gần (Hoa) បានឯកភាពគ្នាជួយកសាងវត្តថ្មីមួយទៀតនៅត្រើយខាងនេះ ដើម្បីទុកជាកន្លែងជ្រកកោនផង និងដើម្បីគាំទ្រដល់ចលនាបដិវត្តន៍ផង។ ហើយវត្តនេះដែរត្រូវបានបង្កើតឡើងក្រោមការដឹកនាំរបស់ព្រះតេជគុណ Thạch Chửng រហូតដល់ឆ្នាំ ១៩៧៣ វត្តក៏បានផ្ដើមបញ្ចុះថ្មគោលសីមាដើម្បីកសាងព្រះវិហារដោយប្រើប្រាស់ឈើ និងស្លឹកដែលមានស្រាប់ក្នុងស្រុក។
វត្តគឺជាកន្លែងសម្រាប់ចាត់តាំងសកម្មភាពសម្ងាត់របស់កម្មាភិបាលបម្រើបដិវត្តន៍ Phan Thanh Hồng ផងដែរ។ តាមការរៀបរាប់របស់ចាស់ព្រឹទ្ធាចារ្យ វត្តបានបែងចែកជា ២ តំបន់៖ តំបន់មួយសម្រាប់ព្រះសង្ឃដែលបួសរៀនពិតប្រាកដតាមវិន័យព្រះពុទ្ធសាសនាទក្ខិណានិកាយ Khmer (ប្រតិបត្តិតាមធម៌វិន័យ មិនឆាន់ចង្ហាន់ពេលល្ងាច) និងតំបន់មួយទៀតសម្រាប់អ្នកដែល "បួសដើម្បីរត់គេចពីខ្មាំង"។ បណ្តាអ្នកដែលបួសគេចខ្លួន មានជួនត្រូវបានប្រពន្ធកូនលួចផ្ដល់អាហារនៅពេលយប់ ដោយសារពួកគាត់មិនទាន់ស៊ាំនឹងការដាច់បាយពេលល្ងាច។ ក្នុងករណីមានអាសន្ន ពួកគាត់នាំគ្នាកាត់សក់ឱ្យខ្លី និងគ្រងស្បង់ចីវរដើម្បីបន្លំធ្វើជាសង្ឃ ធ្វើឱ្យសត្រូវមិនហ៊ានចាប់ខ្លួន។ អាស្រ័យដោយមានវត្តនេះ ប្រជាជនជាច្រើននៅក្នុងតំបន់បានរួចផុតពីការតាមចាប់ឱ្យចូលធ្វើទាហានក្នុងឆ្នាំចុងក្រោយនៃសង្គ្រាមតស៊ូ។
ផ្លូវធ្វើដំណើរចូលទៅកាន់បរិវេណវត្ត Hộ Phòng Mới។
ក្រោយពេលប្រទេសជាតិទទួលបានឯករាជ្យ វត្តត្រូវបានរក្សាទុកដូចជាភស្តុតាងប្រវត្តិសាស្ត្រមួយ ដើម្បីរំលឹកគុណដល់ការការពារជ្រកកោនសម្រាប់ប្រជាជន។ ដោយសារការពង្រីកផ្លូវជាតិលេខ ១ A ដែលបច្ចុប្បន្នមានទីតាំងស្ថិតនៅត្រង់ចំណុចផ្លូវបំបែកជាបីវាងផ្សារ Hộ Phòng ។ ជាមួយនឹងតម្លៃប្រវត្តិសាស្ត្រដ៏ពិសេស និងភូមិសាស្ត្រអំណោយផលផងនោះ វត្ត Hộ Phòng Mới ត្រូវបានជួសជុលឡើងវិញតាមរចនាបថក្បូរក្បាច់ Khmer យ៉ាងល្អប្រណិត។ នេះគឺជាកត្តាដ៏សំខាន់សម្រាប់អភិវឌ្ឍទេសចរណ៍បែបសាសនា ដែលផ្សារភ្ជាប់នឹងប្រពៃណីនៃការតស៊ូ និងសាមគ្គីភាពដ៏រឹងមាំរវាងជនជាតិទាំង ៣៖ Kinh - Khmer - Hoa ទៀតផង៕
Chim Đôn Ta
