ក្នុងរយៈពេលប៉ុន្មានឆ្នាំកន្លងមកនេះ គម្រោងទី ៨ " អនុវត្តសមភាពយេនឌ័រ និងការដោះស្រាយបញ្ហាបន្ទាន់សម្រាប់ស្ត្រី និងកុមារ" ក្រោមកម្មវិធីគោលដៅជាតិសម្រាប់ការអភិវឌ្ឍសេដ្ឋកិច្ច-សង្គមនៅតំបន់ជនជាតិភាគតិច និងតំបន់ភ្នំ (២០២១-២០៣០) បានបង្កើតការផ្លាស់ប្តូរជាវិជ្ជមាននៅតាមសាលារៀន រួមចំណែកបង្កើនការយល់ដឹង និងបំពាក់ជំនាញដល់សិស្ស ជាពិសេសនៅក្នុងតំបន់ដែលមានបងប្អូនជនរួមជាតិភាគតិចរស់នៅច្រើន។
សិក្ខាសាលា និងការផ្លាស់ប្តូររវាងក្លឹប "អ្នកដឹកនាំនៃការផ្លាស់ប្តូរ" ដែលរៀបចំដោយសមាគមសហព័ន្ធនារីខេត្ត Cà Mau ទាក់ទាញការចូលរួមរបស់សិស្សានុសិស្សជាច្រើនផងដែរ។
បណ្តាសមាគមសហព័ន្ធនារីគ្រប់បណ្តាថ្នាក់ទូទាំងខេត្ត បានសហការជាមួយវិស័យអប់រំ បង្កើតក្លឹប "អ្នកដឹកនាំនៃការផ្លាស់ប្តូរ" ចំនួន ១៤ ក្លឹប។ តាមរយៈសកម្មភាពជាប្រចាំ ប្អូនៗសិស្សានុសិស្សត្រូវបានបំពាក់ដោយចំណេះដឹងស្តីអំពីសិទ្ធិកុមារ ការបង្ការ និងប្រយុទ្ធប្រឆាំងនឹងការរំលោភបំពានផ្លូវភេទ អាពាហ៍ពិពាហ៍កុមារ និងអាពាហ៍ពិពាហ៍សាច់ញាតិ ព្រមទាំងអំពើហិង្សានៅសាលា និងជំនាញក្នុងការទំនាក់ទំនង និងអាកប្បកិរិយាប្រកបដោយសុវត្ថិភាពនៅក្នុងលំហអ៊ីនធឺណិត។
ប្អូនស្រី Triệu Võ Ngọc Trân សមាជិកក្លឹបនៃសាលាមធ្យមសិក្សា Lê Hồng Phong ឃុំ Khánh Lâm បានឱ្យដឹង៖ “ពីមុន ខ្ញុំខ្មាស់អៀនខ្លាំងណាស់ពេលដែលនិយាយស្តីនៅក្នុងថ្នាក់រៀន។ តែចាប់តាំងពីបានចូលរួមក្លឹបមក ខ្ញុំបានបង្កើនជំនាញធ្វើបទបង្ហាញ ព្រមទាំងជំនាញធ្វើការជាក្រុម និងយល់កាន់តែច្បាស់អំពីសិទ្ធិសិរីរបស់ខ្លួន ធ្វើឱ្យខ្ញុំមានទំនុកចិត្តកាន់តែខ្លាំងក្នុងការសិក្សា និងសកម្មភាពជាក្រុមទៀតផង”។
យោងតាមបងស្រី Lê Xí Muội គ្រូបង្រៀនទទួលបន្ទុកក្លឹបនៃសាលាមធ្យមសិក្សា លេហុងផុង សកម្មភាពក្លឹបជួយឱ្យប្អូនៗសិស្សានុសិស្សទាំងឡាយបានដោះដូរដោយបើកចំហអំពីការប្រកាន់ភេទ អំពើហិង្សានៅសាលា និងជំនាញការពារខ្លួនឯង។ តាមរយៈនេះ សិស្សានុសិស្សបង្កើនការយល់ដឹង ចេះគោរពគ្នាទៅវិញទៅមក និងមានអាកប្បកិរិយាសមរម្យ ជម្លោះនៅក្នុងសាលាក៏ត្រូវបានកាត់បន្ថយផងដែរ។
ទន្ទឹមជាមួយសកម្មភាពនៅសាលា សមាគមនារីខេត្តថែមទាំងបានចាត់តាំងបើកថ្នាក់ហ្វឹកហ្វឺន វេទិកា និងសិក្ខាសាលាសម្រាប់ក្លឹបដើម្បីធ្វើអន្តរកម្ម និងដោះដូរបទពិសោធន៍ទៀតផង។ តាមរយៈនេះ សិស្សានុសិស្សមានឱកាសកាន់តែច្រើនក្នុងការរៀនសូត្រ ផ្តើមពីនោះនឹងផ្សព្វផ្សាយសារនៃសមភាពយេនឌ័រដល់គ្រួសារ និងសហគមន៍ផងដែរ។
ចូលរួមក្លឹបនេះបានជួយឱ្យប្អូន Triệu Võ Ngọc Trân ជាសិស្សមកពីសាលាមធ្យមសិក្សា Lê Hồng Phong ឃុំ Khánh Hưng (ខាងឆ្វេងបង្អស់) ឱ្យកាន់តែមានទំនុកចិត្តលើបទបង្ហាញរបស់ខ្លួន។
លោកស្រី Tô Mỹ Thuận អនុប្រធានសមាគមសហព័ន្ធនារីខេត្ត Cà Mau បានឱ្យដឹង៖ រួមជាមួយគ្រួសារ ការលើកកម្ពស់សមភាពយេនឌ័រត្រូវតែចាប់ផ្តើមតាំងពីដំបូងទាំងនៅក្នុងបរិស្ថានសាលា។ នៅពេលដែលកុមារត្រូវបានបំពាក់ចំណេះដឹង បំណិន និងទទួលបានការជំរុញទឹកចិត្តឱ្យបញ្ចេញមតិរបស់ខ្លួន កុមារនឹងក្លាយជា "អ្នកដឹកនាំតូចៗ" ដោយផ្សព្វផ្សាយសារជាវិជ្ជមានដល់គ្រួសារ និងសហគមន៍របស់ពួកគេ ជាពិសេសនៅក្នុងតំបន់ដែលមានជនរួមជាតិភាគតិចរស់នៅច្រើនកុះករ។
នៅពេលខាងមុខ សមាគមសហប័ន្ធនារីខេត្តនឹងបន្តកែលម្អគុណភាព និងពង្រីកក្លឹប "អ្នកដឹកនាំនៃការផ្លាស់ប្តូរ"។ ក្នុងពេលជាមួយគ្នានេះ វានឹងមានការច្នៃប្រតិដ្ឋខ្លឹមសារនៃសកម្មភាពក្នុងទិសដៅជាក់ស្តែង ពង្រឹងជំនាញការពារខ្លួន ទប់ស្កាត់ការប្រើអំពើហិង្សា និងការរំលោភបំពាន ប្រើប្រាស់ប្រព័ន្ធផ្សព្វផ្សាយសង្គមដោយសុវត្ថិភាព រួមចំណែកដល់ការកសាងយុវជនជំនាន់ក្រោយដែលមានទំនុកចិត្ត និងមានសមត្ថភាពនៅ Cà Mau ដោយធ្វើការរួមគ្នាដើម្បីលើកកម្ពស់សមភាពយេនឌ័រ៕
Cẩm Nhi
