នៅបណ្តាថ្ងៃដើមឆ្នាំ គ្រប់តំបន់ភូមិភាគទូទាំងខេត្ត Cà Mau មានការមមាញឹកសម្រាប់ការបញ្ជូនយុវជនឱ្យចេញទៅបម្រើកងទ័ព។ ក្នុងចំណោមនោះ រូបភាពយុវជន Khmer ក្នុងឯកសណ្ឋានយោធាបានបន្សល់ទុកនូវចំណាប់អារម្មណ៍ដ៏ល្អប្រសើរខាងស្មារតីទទួលខុសត្រូវ និងទឹកចិត្តស្នេហាជាតិ ព្រមទាំងបំណងប្រាថ្នាចង់រួមចំណែកលះបង់ដើម្បីប្រទេសជាតិ មាតុភូមិរបស់ខ្លួន។
មិត្ត Đào Kiên Giang ត្រូវបានសម្ព័ន្ថយុវជនឃុំ Trí Phải ជូនអំណោយ និងលើកទឹកចិត្តមុនថ្ងៃចេញទៅបម្រើកងទ័ព។
សម្រាប់គ្រួសារ Khmer ជាច្រើន ថ្ងៃដែលកូនៗរបស់ខ្លួនបានចេញទៅបម្រើកងទ័ពគឺជាមោទនភាពយ៉ាងធំធេងផងដែរ។ ជាមួយសំលៀកបំពាក់ប្រពៃណី ឪពុកម្តាយ និងសាច់ញាតិបាននាំយោធិនថ្មីទៅកាន់ចំណុចប្រគល់ និងទទួលទ័ពជាមួយការផ្តល់ដំបូន្មានដ៏ស្មោះស្ម័គ្រ ដោយសង្ឃឹមថាកូនៗរបស់ពួកគេនឹងធំដឹងក្តីក្នុងបរិស្ថានយោធា។
មិត្ត Lý Hoài Trọng នៅឃុំ Trí Phải មិនអាចលាក់បាំងសេចក្តីរីករាយរបស់ខ្លួនបានរួចនិយាយថា៖ “ខ្ញុំពិតជារំភើបខ្លាំងណាស់ដែលបានចុះឈ្មោះចូលបម្រើកងទ័ព និងបំពេញកាតព្វកិច្ចរបស់ខ្លួនដើម្បីបម្រើមាតុភូមិ។ ខ្ញុំជឿជាក់ថាបរិយាកាសយោធានឹងជួយខ្ញុំហ្វឹកហាត់ខ្លួនឯង សិក្សាបំណិនក្នុងការរស់នៅ និងប្រកបកិច្ចការងារបានកាន់តែប្រសើរថែមទៀត”។
ជាអ្នករួមអារម្មណ៍ដូចគ្នា មិត្ត Đào Kiên Giang (អ្នករួមឃុំជាមួយ) បានចែករំលែកថា៖ “បងប្រុសរបស់ខ្ញុំក៏ធ្លាប់បានបម្រើការងារក្នុងជួរកងទ័ពដែរ ហើយក្រោយមកបានសិក្សានៅសាលានគរបាល។ ខ្ញុំចង់ដើរតាមគន្លងរបស់គាត់ ហើយសំខាន់ជាងនេះទៅទៀត ខ្ញុំចង់ជម្រុញទឹកចិត្តយុវជនជាជនជាតិភាគតិចខិតខំសិក្សារៀនសូត្រ និងហ្វឹកហាត់ខ្លួនឯង ដើម្បីបញ្ជាក់ខ្លួនឯង ព្រមទាំងរួមចំណែកក្នុងការកសាងមាតុភូមិ”។
យុវជន Khmer ជាច្រើនរូបបានបង្ហាញពីទំនុកចិត្តរបស់ពួកគេថា បរិយាកាសយោធានឹងជួយពួកគេវិវឌ្ឍរបៀបរស់នៅបែបវិទ្យាសាស្ត្រ និងពូនផ្តុំស្មារតីលះបង់ដើម្បីប្រទេសជាតិ មាតុភូមិ។ បន្ទាប់ពីបញ្ចប់កាតព្វកិច្ចជាយោធា មិត្តជាច្រើនសង្ឃឹមថានឹងវិលត្រឡប់ទៅភូមិភាគរបស់ខ្លួនវិញ អនុវត្តចំណេះដឹង និងបទពិសោធន៍ដែលពួកគេសិក្សាបាន ដើម្បីអភិវឌ្ឍសេដ្ឋកិច្ចគ្រួសារ ព្រមទាំងចូលរួមក្នុងសកម្មភាពយុវជន រួមកម្លាំងវ័យក្មេងរបស់ខ្លួនដើម្បីកសាងមាតុភូមិ Cà Mau ឱ្យកាន់តែរីកចម្រើន និងសម្បុររុងរឿងថែមទៀត។
មិត្ត Lý Hoài Trọng ជាមួយគ្រួសាររបស់ខ្លួនក្នុងថ្ងៃចេញទៅបម្រើកងទ័ព។
សមមិត្ត Phạm Tuấn Tài អនុប្រធានគណៈកម្មាធិការរណសិរ្សមាតុភូមិ Việt Nam ខេត្ត Cà Mau និងជាលេខាសម្ព័ន្ថយុវជនខេត្ត បានអះអាងថា៖ “ការចូលរួមកាតព្វកិច្ចជាយោធាគឺបង្ហាញពីភារកិច្ចទទួលខុសត្រូវលើមាតុភូមិ និងបង្ហាញពីស្មារតីស្ម័គ្រចិត្តរបស់យុវជន Cà Mau និយាយរួម ក្នុងនោះមានយុវជ័នជាជនជាតិ Khmer ផងដែរ”។
សម្រាប់ជំហានដ៏រឹងមាំរបស់យោធិនថ្មីជាជនជាតិ Khmer ទាំងឡាយគ្រប់រួបមិនត្រឹមតែឆ្ពោះទៅរកភារកិច្ចការពារមាតុភូមិប៉ុណ្ណោះទេ ថែមទាំងនាំមកនូវក្តីសង្ឃឹមក្នុងការកសាងប្រទេសជាតិ មាតុភូមិរបស់ពួកគេទៀតផង។ ជាមួយស្មារតីទទួលខុសត្រូវ និងឆន្ទៈក្នុងការឈានឆ្ពោះទៅមុខមិនឈប់ឈរ ព្រមទាំងមានទំនុកចិត្តសម្រាប់ថ្ងៃអនាគត មិត្តទាំងឡាយកំពុងបន្តសរសេររឿងរ៉ាវដ៏ល្អប្រសើររបស់យុវជន Cà Mau ដែលមិនថាយប់ឬថ្ងៃ ដើម្បីព្រួតដៃគ្នាកសាងតំបន់ដែនដីចុងជ្រោយបង្អស់របស់ប្រទេសជាតិមួយថ្ងៃកាន់តែមានការអភិវឌ្ឍ និងសម្បុររុងរឿងថែមទៀត៕
Hồng Thắm
