ប៉ុន្មានឆ្នាំកន្លង ពេលបានវិនិយោគគ្រប់សព្វតាំងពីមូលដ្ឋានសម្ភារៈ បរិក្ខារពេទ្យ គ្រូពេទ្យ វេជ្ជបណ្ឌិតនៃដំណាក់សុខាភិបាលឃុំចូវដៀង ស្រុកកូវកែ ខេត្តត្រាវិញ អនុវត្តបានល្អនូវការងារថែរក្សាសុខភាពប្រជាជន និងបង្ការទប់ស្កាត់ជំងឺឆ្លងរាលដាលនៅមូលដ្ឋាន។
ប្រជាជនកំពុងពិនិត្យជំងឺនៅដំណាក់សុខាភិបាលឃុំចូវដៀង។
លោកឡេក្វឹកទ្វឹង ប្រធានគណៈកម្មាធិការប្រជាជនឃុំចូវដៀង ឱ្យដឹង៖ “កងជួរកម្មាភិបាលដំណាក់សុខាភិបាល ត្រូវបានយកចិត្តទុកដាក់ គុណភាពពិនិត្យនិងព្យាបាលជំងឺ បានកើនឡើងឥតឈប់ឈរ។ កម្មវិធីសុខាភិបាលជាតិត្រូវបានផ្សព្វផ្សាយអនុវត្តល្អ ការបង្ការទប់ស្កាត់ជំងឺឆ្លងរាលដាលមានភាពម្ចាស់ការពីដើមឆ្នាំ។ អាស្រ័យហេតុនោះ ជំងឺឆ្លងរាលដាលបានថយចុះបើធៀបនឹងខណៈពេលដូចគ្នា ការពិនិត្យនិងព្យាបាលជំងឺជូនមុខសញ្ញាគោលនយោបាយ អ្នកក្រ មាតានិងទារកត្រូវបានយកចិត្តទុកដាក់អនុវត្ត បង្កើនការងារថែទាំសុខភាពកុមារ។ ឃុំរក្សាខ្ជាប់បទដ្ឋានជាតិផ្នែកសុខាភិបាល”។
ឃុំចូវដៀង មានជនរួមជាតិខ្មែររស់នៅប្រមាណ៨៣%។ មុននេះ ដោយសារជីវភាពលំបាក ទើបប្រជាជនមិនសូវយកចិត្តទុកដាក់ដល់ការថែទាំសុខភាពផ្ទាល់ខ្លួននិងគ្រួសារ។ ប៉ុន្មានឆ្នាំមកនេះ ដោយការយកចិត្តទុកដាក់គិតគូររបស់បក្ស រដ្ឋ ជីវភាពរស់នៅរបស់ប្រជាជននៅទីនេះត្រូវបានលើកស្ទួយ។ ផ្ដើមពីនោះ ការយល់ដឹងរបស់ប្រជាជនក្នុងការថែទាំសុខភាព និងបង្ការទប់ស្កាត់ជំងឺឆ្លងរាលដាលក៏មានភាពជាវិជ្ជមាន។ វេជ្ជបណ្ឌិតឡឹមវ៉ាន់ងឺ អនុប្រធានដំណាក់សុខាភិបាលឃុំចូវដៀង ឱ្យដឹង៖ “ចូវដៀងជាឃុំតំបន់ជ្រៅ ជីវភាពរបស់ប្រជាជនមានការលំបាកខ្លាំង។ តាំងពីមានដំណាក់សុខាភិបាល ប្រជាជនមិនសូវពិបាកក្នុងការព្យាបាលជំងឺ។ យើងខ្ញុំខិតខំអនុវត្តល្អនូវភារកិច្ចថែទាំសុខភាពជូនប្រជាជន ពិសេស ចំពោះមាមីងក្រីក្រ…”។
រៀងរាល់ថ្ងៃ ដំណាក់សុខាភិបាលឃុំចូវដៀង ពិនិត្យនិងផ្តល់ថ្នាំដល់អ្នកជំងឺពី៤០-៥០នាក់។ ករណីជំងឺធ្ងន់ត្រូវបានដំណាក់បញ្ជូនទៅមន្ទីរពេទ្យថ្នាក់លើ ដើម្បីប្រជាជនបានព្យាបាលទាន់ពេល។ អ្នកមីងសឺនធីហង នៅភូមិអូរទទឹង ឱ្យដឹង៖ “ខ្ញុំមានជំងឺទឹកនោមផ្អែមនិងសម្ពាធឈាម។ ពិនិត្យជំងឺនៅដំណាក់សុខាភិបាល បានវេជ្ជបណ្ឌិតណែនាំពីរបៀបថែទាំនិងបង្ការជំងឺយ៉ាងហ្មត់ចត់ ដូច្នេះខ្ញុំស្ងប់អារម្មណ៍ណាស់។ គ្រូពេទ្យ វេជ្ជបណ្ឌិតនៅទីនេះ រួសរាយរាក់ទាក់អស់ពីចិត្តពីថ្លើមចំពោះអ្នកជំងឺដែលមានជីវភាពក្រីក្រដូចយើងខ្ញុំ ទទួលបានការយកចិត្តទុកដាក់គិតគូរថែទាំសុខភាពដោយមិនបង់ថ្លៃ ជំងឺធ្ងន់ត្រូវបានបញ្ជូនទៅមន្ទីរពេទ្យថ្នាក់លើ យើងខ្ញុំសប្បាយចិត្តណាស់”៕
សឺនម៉ាល័យ-ទីទុយ
