លោក Danh Sai (នៅភូមិ Bà Gồng ឃុំ Hồng Dân) ជាកសិករខ្មែរដែលមានបទពិសោធន៍ ៤០ ឆ្នាំ ប្រកបរបរដាំបន្លែសុវត្ថិភាព។ ដោយការឧស្សាហ៍ព្យាយាម និងទម្រង់ផលិតកម្មប្រសិទ្ធភាព លោកមិនត្រឹមតែកសាងជីវភាពធូរធារសម្រាប់គ្រួសារប៉ុណ្ណោះទេ ថែមទាំងក្លាយជាគំរូដ៏ល្អ ជួយកូនចៅរស់នៅ និងប្រកបរបរចិញ្ចឹមជីវិតលើទឹកដីភូមិកំណើតរបស់ខ្លួនទៀតផង។
ប្តីប្រពន្ធលោក យ័ញសាយ នៅក្នុងផ្ទះដ៏ស្អាតស្អំ។
លើផ្ទៃដីចំការទំហំ ១.៣០០ ម៉ែត្រការ៉េ លោក យ័ញសាយ ដាំដំណាំច្រើនប្រភេទឆ្លាស់គ្នាដូចជា៖ ស្ពៃខៀវ សាឡាត់ ជីគ្រប់មុខ ពោតបារាំង សណ្តែកកួរ ត្រសក់។ល។ ដើម្បីផ្គត់ផ្គង់ឱ្យឈ្មួញនៅផ្សារ។ ជាមធ្យម រៀងរាល់ថ្ងៃ ចំការបន្លែនាំមកនូវប្រាក់ចំណូលប្រហែល ២០០ ពាន់ដុង សម្រាប់ប្តីប្រពន្ធរបស់លោក។ ជាពិសេស ពេលប្រមូលផលត្រសក់ អាចរកចំណូលបានជាង ៥០០ ពាន់ដុង/ថ្ងៃ។
លោក Danh Sai មានប្រសាសន៍ថា៖ “ក្នុងដំណើរការដាំដុះ ខ្ញុំកាត់បន្ថយការប្រើប្រាស់ថ្នាំសម្លាប់សត្វល្អិត ថ្នាំសម្លាប់ស្មៅ និងជីគីមី ដើម្បីការពារសុខភាពអ្នកប្រើប្រាស់ និងបរិស្ថាន"។ ស្របជាមួយនឹងការដាំបន្លែស្អាត ប្ដីប្រពន្ធលោក Danh Sai ក៏ចិញ្ចឹមជ្រូក ទា ត្រីជាដើមដើម្បីបង្កើនប្រាក់ចំណូលផងដែរ។
មិនតែប៉ុណ្ណោះ ផ្តើមពីប្រភពទុនប្រឹតសំចៃគាត់បានទិញម៉ាស៊ីនភ្ជួរដី ២ គ្រឿង ដើម្បីបម្រើការផលិតរបស់គ្រួសារ និងប្រជាជនក្នុងតំបន់ អាស្រ័យហេតុនេះ ប្រាក់ចំណូលសរុបប្រចាំឆ្នាំមានជាង ១៥០ លានដុង។
កាលពីមុន លោក Danh Sai ធ្លាប់ជាសមាជិកគណៈប្រតិបត្តិសមាគមកសិករ ទីរួមស្រុក Ngan Dừa (ចាស់)។ បច្ចុប្បន្ន គាត់មានតួនាទីជាប្រធានក្រុមបូមទឹករបស់ភូមិ។ ក្នុងតួនាទីនេះ គាត់បានដឹកនាំ និងប្រមូលផ្តុំប្រជាជនដោយផ្ទាល់ ដើម្បីជីកព្រែក បូមទឹក ផ្គត់ផ្គង់ទឹកសម្រាប់ផលិតកម្ម និងបង្ហូរទឹកដើម្បីបង្ការទឹកលិចក្នុងតំបន់។ ជាពិសេស ដោយស្មារតីជួយគ្នាទៅវិញទៅមក ពេលភ្ជួរដីជួយប្រជាជន គាត់តែងអនុញ្ញាតឱ្យពួកគាត់ជំពាក់ថ្លៃឈ្នួលសិន ហើយចាំ សងវិញបន្ទាប់ពីប្រមូលផលរួច។ អ្នកណាជួបលំបាក ត្រូវការជំនួយផ្នែកពូជដំណាំ ពូជសត្វ ឬបច្ចេកទេស គាត់តែងស្ម័គ្រចិត្តជួយជានិច្ច។
អាស្រ័យដោយការឧស្សាហ៍ព្យាយាមច្រើនឆ្នាំជាប់ៗគ្នា លោក Danh Sai បានទទួលស្គាល់ថាជាកសិករផលិតលក់ដូរឆ្នើមក្នុងតំបន់។ រស់នៅដោយស្មោះត្រង់ អស់ ពីចិត្តដើម្បីប្រជាជន គាត់បានមនុស្សគ្រប់គ្នាស្រឡាញ់រាប់អាន និងទុកចិត្ត។
ដើរតាមគំរូរបស់លោកឪពុក កូនទាំង ៥ នាក់របស់កាត់ ក៏បានចាប់ផ្តើមអាជីពដោយទម្រង់ដាំបន្លែសុវត្ថិភាព ហើយបានសាងសង់ផ្ទះសម្បែងស្អាតស្អំ ហើយមានជីវភាពធូរធារ។ “ប្តីប្រពន្ធខ្ញុំមានកូន ៥ នាក់ ប៉ុន្តែគ្មាននរណាម្នាក់ចាកចោលស្រុកកំណើតទៅធ្វើការនៅទីក្រុងធំៗទេ។ គ្រាន់តែឧស្សាហ៍ព្យាយាម ខិត ខំប្រកបរបរនៅស្រុកកំណើត ក៏មានជីវភាពនឹងនរ និងធូរធារប្រសើរផងដែរ” អ្នកមីង ធីហឿន ភរិយារបស់លោក Danh Sai បានចែករំលែកដូច្នេះ។
ប្តីប្រពន្ធលោក Danh Sai កំពុងប្រមូលផលជី។
ក្នុងវ័យ ៧០ ឆ្នាំ ការខិតខំពេញមួយជីវិតរបស់ប្តីប្រពន្ធលោក យ័ញសាយ បានតបស្នងយ៉ាងសក្តិសម។ ក្នុងឱកាសបុណ្យចូលឆ្នាំ ២០២៥ គ្រួសាររបស់គាត់បានជួសជុលផ្ទះឡើងវិញយ៉ាងស្អាតស្អំមានតម្លៃជាងកន្លះពាន់លានដុង ជាក្តីសុបិនរបស់ប្រជាជនជាច្រើននៅទីនេះ។
លោក Danh Sai មិនត្រឹមតែជាកសិករផលិតឆ្នើមប៉ុណ្ណោះទេ ថែមទាំងជាឪពុកគំរូ ដោយប្រើភាពឧស្សាហ៍ព្យាយាម និងវិធីធ្វើអាជីវកម្មប្រសិទ្ធភាពរបស់ខ្លួន ដើម្បីដឹកនាំ ធ្វើឱ្យកូនចៅស្រឡាញ់ ហើយកសាងជីវភាពធូរធារលើទឹកដីកំណើតរបស់ខ្លួនទៀតផង៕
Thanh Hải
