លើដំណើរផ្លូវជម្នះការលំបាករបស់ប្រជាជនក្រីក្រឃុំ Phong Hiệp សមាគមអតីតយុទ្ធជនឃុំតែងរួមដំណើរ និងណែនាំបច្ចេកទេសជូនប្រជាពលរដ្ឋអនុវត្តប្រកបដោយប្រសិទ្ធភាពនូវគ្រប់ទម្រង់។ ការរួមដំណើរប្រកបដោយការទទួលខុសត្រូវនោះបានក្លាយជាកម្លាំងចលករ ជួយគ្រួសារក្រីក្រជាច្រើនមានទំនុកចិត្តអភិវឌ្ឍន៍សេដ្ឋកិច្ច និងចាកផុតពីភាពក្រីក្រប្រកបដោយចីរភាព។
សមាគមអតីតយុទ្ធជនឃុំ Phong Hiệp ទស្សនាទម្រង់ចិញ្ចឹមគោរបស់គ្រួសារលោក Trần Văn Út។
ក្នុងចំណោមទម្រង់នៃមុខរបរចិញ្ចឹមជីវិតដែលបានដាក់ចេញ របរចិញ្ចឹមគោត្រូវបានវាយតម្លៃថាជាដំណោះស្រាយដែលនាំមកនូវប្រសិទ្ធភាពជាក់ស្តែង និងច្បាស់លាស់បំផុត។ តាមរយៈកម្មវិធី គ្រួសារក្រីក្រនីមួយៗទទួលបានការឧបត្ថម្ភគោពូជ ២ ក្បាល ដែលមានតម្លៃសរុប ៣០ លានដុង។ បន្ទាប់ពីថែទាំរយៈពេល ១៨ ខែ គោដែលបានឧបត្ថម្ភទាំងអស់នឹងក្លាយជាកម្មសិទ្ធិផ្ទាល់ខ្លួនរបស់គ្រួសារជាផ្លូវការ។
ជាគ្រួសារមួយក្នុងចំណោមគ្រួសារទទួលផលពីគោលនយោបាយ លោក Trần Văn Út នៅភូមិ 9A បានទទួលចិញ្ចឹមគោមួយគូរយៈពេលជាង ៩ ខែមកហើយ។ ដោយសាររៀបចំក្រោលទ្រុងបានល្អត្រឹមត្រូវ និងថែទាំតាមបច្ចេកទេស គោមួយគូនោះមានការលូតលាស់ល្អ រឹងមាំ និងធំធាត់យ៉ាងឆាប់រហ័សផងដែរ។ បច្ចុប្បន្ន លោកកំពុងរៀបចំបង្កាត់ពូជគោ ដោយសង្ឃឹមថានឹងពង្រីកហ្វូងគោឱ្យបានឆាប់ៗក្នុងពេលខាងមុខ។
លោក Trần Văn Út បានចែករំលែកថា៖ «ក្នុងដំណើរការចិញ្ចឹម ខ្ញុំខិតខំបន្ថែមស្មៅស្រស់ ថ្នាំបំប៉ន ហើយដល់យប់គឺចងមុងឱ្យគោដេកស្រួលផងដែរ។ ដោយសារតែការថែទាំយ៉ាងយកចិត្តទុកដាក់ ទើបគោឆាប់បានធំធាត់»។
តាមរយៈការពិនិត្យជាក់ស្តែងបង្ហាញថា ភាគច្រើននៃគ្រួសារទទួលបានការឧបត្ថម្ភសុទ្ធតែបានពង្រីកប្រសិទ្ធភាពទម្រង់បានល្អ និងថែទាំហ្វូងសត្វចិញ្ចឹមរបស់ខ្លួនឱ្យមានការកើនឡើងប្រកបដោយស្ថិរភាព។
លោក Huỳnh Văn Hiếu អនុប្រធានសមាគមអតីតយុទ្ធជនឃុំ Phong Hiệp មានសេចក្តីរីករាយចំពោះប្រសិទ្ធភាពពីទម្រង់ចិញ្ចឹមគោសម្រាប់គ្រួសារក្រីក្រនៅភូមិភាគ។
លោក Huỳnh Văn Hiếu អនុប្រធានសមាគមអតីតយុទ្ធជនឃុំ Phong Hiệp បានឱ្យដឹងថា៖ «សមាគមអតីតយុទ្ធជនឃុំបានជួយជ្រោមជ្រែងគ្រួសារក្រីក្រចំនួន ៦ គ្រួសារ។ យើងខ្ញុំបានចុះទៅដល់ផ្ទះពិនិត្យ និងអង្កេតជាក់ស្តែងនូវតម្រូវការរបស់គ្រួសារនីមួយៗ ទើបឈានទៅដល់ការឧបត្ថម្ភ ហើយគ្រួសារទាំង ៦ នោះសុទ្ធតែជ្រើសរើសយកទម្រង់ចិញ្ចឹមគោ។ មុនពេលទទួលកូនពូជ គ្រួសារទាំងអស់ត្រូវបានបណ្តុះបណ្តាល និងណែនាំបច្ចេកទេសក្នុងការថែទាំ។ ក្នុងអំឡុងពេលចិញ្ចឹម កម្មាភិបាលសមាគមតែងចុះទៅដល់ទីកន្លែងដើម្បីពិនិត្យ និងតាមដាន។ អាស្រ័យហេតុនេះ ទម្រង់សម្រេចបានប្រសិទ្ធភាពច្បាស់លាស់ ហើយហ្វូងគោរបស់គ្រួសារនានាក៏កំពុងលូតលាស់យ៉ាងល្អផងដែរ»។
ប្រសិទ្ធភាពពីទម្រង់ចិញ្ចឹមគោពូជរបស់សមាគមអតីតយុទ្ធជនឃុំ Phong Hiệp មិនត្រឹមតែឈប់នៅត្រឹមលេខរៀង ឬតម្លៃសម្ភារៈដែលបានប្រគល់ជូននោះទេ។ អត្ថន័យធំធេងបំផុតនោះគឺបានជំរុញស្មារតីម្ចាស់ការលើខ្លួនឯង ជួយគ្រួសារក្រីក្រផ្លាស់ប្តូរផ្នត់គំនិត និងមានទំនុកចិត្តពង្រីកខ្លួនឡើងដោយកម្លាំងពលកម្មរបស់ខ្លួនឯង។ ការរួមដំណើរយ៉ាងជិតស្និទ្ធនោះ សន្យថានឹងបន្តបើកចេញទិសដៅថ្មី រួមជាមួយមូលដ្ឋានអនុវត្តសម្រេចបានជោគជ័យនូវគោលដៅកាត់បន្ថយភាពក្រីក្រប្រកបដោយចីរភាព៕
Thuỳ Liên - Duy Phong
