ដោយមានឆន្ទៈដ៏មោះមុត និងការខិតខំធ្វើការងារយ៉ាងសកម្មផងនោះ កសិករជាច្រើនបានម្ចាស់ការស្វែងរកទិសដៅនៃការផលិតសមស្រប និងទាញយកសក្ដានុពលដីធ្លី ដើម្បីបង្កើតនូវរបរចិញ្ចឹមជីវភាពយ៉ាងមានប្រសិទ្ធភាព។ ការខិតខំប្រឹងប្រែងទាំងនោះ មិនត្រឹមតែជួយឱ្យពួកគាត់ឈានឡើងក្នុងការរស់នៅប៉ុណ្ណោះទេ ថែមទាំងក្លាយជាគំរូឆ្នើមក្នុងការជម្នះលំបាក ផ្សព្វផ្សាយនូវស្មារតីជាវិជ្ជមាន និងភាពរវាសរវៃក្នុងសហគមន៍ទៀតផង។
បងស្រី Huỳnh Thị Mơ ឆ្លៀតយកប្រភពចំណីដែលមានស្រាប់ក្នុងតំបន់ ដើម្បីកាត់បន្ថយចំណាយក្នុងការចិញ្ចឹមពពែ។
កាលពីមុន គ្រួសារបងស្រី Huỳnh Thị Mơ (ភូមិ Chòm Xoài សង្កាត់ Hiệp Thành) ស្ថិតក្នុងស្ថានភាពលំបាក ដោយមានដីចម្ការត្រឹមតែជាង ២ កុង ទើបចំណូលមិនស្ថិតស្ថេរ ជីវភាពពឹងផ្អែកទាំងស្រុងលើការងារធ្វើសំណង់របស់ប្តី។ មិនចុះចាញ់នឹងភាពក្រីក្រ នៅឆ្នាំ ២០២២ ដោយទទួលបានប្រភពទុនកម្ចី ៤០ លានដុង ពីធនាគារគោលនយោបាយសង្គម បងស្រី Mơ បានកែលម្អដី ដំឡើងរងខ្ពស់ដើម្បីដាំត្រសក់ សណ្តែកកួរ ម្រះជាដើម។
ក្រៅពីនោះ គាត់ថែមទាំងមានចិញ្ចឹមពពែ ដែលជាទម្រង់សមស្របនឹងលក្ខណៈដីធ្លី សេដ្ឋកិច្ចជាមួយផ្ទៃដីរបស់គ្រួសារផងដែរ។ ដំបូងឡើយ បងស្រីទិញពពែពូជចំនួន ៤ ក្បាលមកចិញ្ចឹមសាកល្បង។ ដោយការថែទាំបានយ៉ាងល្អ ត្រឹមតែជិត ១ ឆ្នាំប៉ុណ្ណោះ ហ្វូងពពែ បង្កើតកូនថែមបាន ៦ ក្បាលទៀត។ មកទល់ពេលនេះ ហ្វូងពពែបានកើនឡើងជាង ២០ ក្បាលទៅហើយ តម្លៃពពែសាច់ចាបពី ១៤០-១៦០ ពាន់ដុង/គីឡូក្រាម ទីផ្សារលក់មានស្ថេរភាព ជួយឱ្យគាត់មានចំណូលគួរឱ្យកត់សម្គាល់។ ដើម្បីកាត់បន្ថយចំណាយ ប្តីប្រពន្ធគាត់បានឆ្លៀតយកប្រភពស្មៅនៅជុំវិញធារផ្ទះសម្រាប់ធ្វើជាចំណីឱ្យពពែ។
តាមការគួបផ្សំមានប្រសិទ្ធភាពរវាងការដាំដុះ និងការចិញ្ចឹមសត្វ សេដ្ឋកិច្ចគ្រួសារបងស្រី Mơ កាន់តែមានស្ថេរភាព។ មិនត្រឹមតែធានាបាននូវការចំណាយប្រចាំថ្ងៃប៉ុណ្ណោះទេ បងស្រីនៅទាំងមានលក្ខណៈថែទាំកូនៗរៀនសូត្របានល្អទៀតផង ហើយជីវភាពកាន់តែរីកចម្រើនប្រសើរឡើង។
ចំណែកលោក Sơn Phến អាយុ ៥៩ ឆ្នាំ នៅភូមិ Bình Lễ ឃុំ Vĩnh Phước ក៏ជាគំរូមួយក្នុងចំណោមគំរូជម្នះលំបាកឈានឡើង កាលពីមុនធ្លាប់ស្ថិតក្នុងស្ថានភាពលំបាកដែរ។ ទោះបីជាមានដីផលិតក៏ដោយ ប៉ុន្តែដីធ្វើស្រែបានផលទាប ចំណូលមិននឹងនរ។
ឆ្នាំ ២០២៣ ក្រោយពីស្វែងយល់ព័ត៌មានតាមរយៈមធ្យោបាយផ្សព្វផ្សាយ និងឃើញទម្រង់ដាំជីរក្រអូបមានប្រសិទ្ធភាព គាត់ក៏បានសម្រេចចិត្តកែលម្អដីចំការប្រហែល ៦០០ ម៉ែត្រការ៉េ ដើម្បីប្តូរមកដាំបន្លែប្រភេទនេះសម្រាប់ផ្គត់ផ្គង់ទីផ្សារក្នុងតំបន់។ ដោយភាពអត់ធ្មត់ ព្យាយាម និងអនុវត្តបច្ចេកទេសសមស្រប ទម្រង់របស់គាត់បានផ្តល់ប្រសិទ្ធភាពយ៉ាងរហ័ស។ ជាមធ្យមក្នុងមួយឆ្នាំ គាត់ប្រមូលផលបានប្រហែល ៨ លើក ក្នុងមួយលើកបានពី ៤០០-៦០០ គីឡូក្រាម ក្នុងតម្លៃលក់ពី ១៨-៣៥ ពាន់ដុង/គីឡូក្រាម។ ក្រោយពីទូទាត់ចំណាយរួច គ្រួសារគាត់ទទួលបានប្រាក់ចំណេញពី ៥០-៧០ លានដុងក្នុងមួយឆ្នាំ រួមចំណែកកែលម្អជីវភាពគ្រួសារ។
លោក Sơn Phến ដកស្មៅជុំវិញចម្ការបន្លែជីរក្រអូប។
លោក ភេន មានប្រសាសន៍ដោយក្តីរីករាយថា៖ “បើប្រៀបធៀបនឹងការធ្វើស្រែ ដាំជីរក្រអូបផ្តល់ចំណូលខ្ពស់ជាង ការថែទាំក៏ស្រាលជាង ហើយប្រភពចំណូលក៏មានជាប្រចាំផងដែរ។ ពេលខាងមុខ ខ្ញុំមានគម្រោងពង្រីកផ្ទៃដីបន្ថែម អនុវត្តវិទ្យាសាស្ត្រ-បច្ចេកទេស ដើម្បីអភិវឌ្ឍគំរូនេះឱ្យបានចីរភាព"។
រឿងរ៉ាវរបស់បងស្រី Huỳnh Thị Mơ និងលោក Sơn Phến គឺជាសក្ខីភាពនៃស្មារតីជម្នះការលំបាកដោយឆន្ទៈ និងការខិតខំធ្វើការងារ។ ផ្តើមពីលក្ខណៈដែលមានកម្រិត ពួកគាត់បានចេះចាប់យកឱកាស ផ្លាស់ប្តូរផ្នាត់គំនិតក្នុងការផលិត ឈានឡើងជម្នះភាពក្រីក្រជាសន្សឹមៗ និងកសាងជីវភាពកាន់តែរីកចម្រើនឆ្ពោះទៅមុខ៕
Tú Quyên
