ដោយភាពមានប្រៀបខ្លាំងចំពោះដីផលិតនៅជិតមាត់ព្រែក ជាច្រើនឆ្នាំកន្លងមកនេះ លោក Thạch Ha នៅភូមិ Phước Thắng A ឃុំ Định Thành បានស្វែងយល់ និងពិសោធន៍ទទួលបានជោគជ័យជាមួយទម្រង់ចិញ្ចឹមគ្រែងឈាមធម្មជាតិផងដែរ។
លោក Thạch Ha ប្រមូលផលគ្រែងបន្ទាប់ពី ៦ ខែចិញ្ចឹម។
កាលពីជាង ១០ ឆ្នាំមុន លោក Thạch Ha មានភ័ព្ទនិស្ស័យជាមួយគ្រែងឈាមតាមរយៈការចុះប្រមូលទិញពូជគ្រែងពីគ្រួសារនៅតាមតំបន់ដីល្បាប់នៃមាត់សមុទ្រ។ តាមរយៈការទិញនិងលក់កូនពូជ លោក Thạch Ha រកឃើញថា តំបន់ដីដែលលោកកំពុងរស់នៅ ស័ក្តិសមបំផុតសម្រាប់ចិញ្ចឹមគ្រែងឈាម។ ចំណីចម្បងរបស់គ្រែងឈាមគឺដីល្បាប់ និងកាកសំណល់នៃសរីរាង្គ។ ដោយទាញយកផលប្រយោជន៍ពីរបបទឹកជោរនាចតាមកាលកំណត់ ដើម្បីបង្កើតប្រភពចំណីធម្មជាតិ លោក Thạch Ha បានចិញ្ចឹមគ្រែងឈាមលើផ្ទៃដី ៥ កុង នៅជិតមាត់ព្រែក។ បន្ទាប់ពី ៦ ខែ ទៅ ១ ឆ្នាំ ពេលគ្រែងឈាមមានទម្ងន់ ៦០ ក្បាល/គីឡូក្រាម ចាប់ផ្តើមប្រមូលផល។ គ្រែងឈាមដែលចិញ្ចឹមបែបធម្មជាតិមានតម្លៃលក់ចេញខ្ពស់ និងមានម៉ូយទិញច្រើនទៀតផង ក្នុងមួយឆ្នាំៗ លោក Thạch Ha ទទួលបានប្រាក់ចំណេញចាប់ពី ២៥០-៣០០ លានដុង។
លោក Thạch Ha ឱ្យដឹងថា៖ “ដោយទម្រង់ចិញ្ចឹមគ្រែងឈាមធម្មជាតិ កូនពូជបានរុករកពីធម្មជាតិនៅតាមតំបន់ដីល្បាប់ ហើយចិញ្ចឹមដោយប្រភពចំណីមានស្រាប់នៅក្នុងស្រះ ដូច្នេះជួយប្រឹតសំចៃការចំណាយ និងកាត់បន្ថយការខូចខាតដោយសារឥទ្ធិពលនៃអាកាសធាតុ។ គ្រែងដែលចិញ្ចឹមដោយចំណីធម្មជាតិមានសាច់ក្រាស់ ស្រួយ និងផ្អែម បានអតិថិជននិយមចូលចិត្ត ទីផ្សារលក់ចេញតែងស្ថេរភាពក្នុងតម្លៃខ្ពស់”។
“មិនត្រឹមតែនាំមកនូវប្រសិទ្ធភាពសេដ្ឋកិច្ចចីរភាពសម្រាប់គ្រួសារប៉ុណ្ណោះទេ ប៉ុន្តែរបៀបចិញ្ចឹមគ្រែងបែបធម្មជាតិ នៅទាំងរួមចំណែកការពារបរិស្ថានធម្មជាតិ និងប្រភពទឹកសម្រាប់តំបន់ផលិតតាមឆ្នេរសមុទ្រផងដែរ” លោក Thạch Ha ចែករំលែកបន្ថែម។
ទោះបីគ្រែងឈាមងាយស្រួលចិញ្ចឹម មិនត្រូវការបច្ចេកទេសខ្ពស់ និងចំណាយដើមទុនតិចក៏ដោយ ប៉ុន្តែមិនមែនគ្រប់តំបន់សុទ្ធតែអាចចិញ្ចឹមតាមបែបធម្មជាតិបានដោយរលូននោះទេ តំបន់ចិញ្ចឹមត្រូវធានាការបញ្ចូលនិងបញ្ចេញទឹក ដើម្បីបង្កើតប្រភពចំណី និងដោះស្រាយបរិស្ថានស្រះចិញ្ចឹម។
កម្មាភិបាលជំរុញកសិកម្មឃុំ Định Thành ទស្សនាទម្រង់ចិញ្ចឹមគ្រែងឈាមធម្មជាតិរបស់លោក Thạch Ha។
លោក Võ Văn Giới អ្នកឯកទេសជំរុញកសិកម្ម មជ្ឈមណ្ឌលផលប្រយោជន៍សាធារណៈឃុំ Định Thành បានឱ្យដឹងថា៖ “ដោយប្រសិទ្ធភាពនៃទម្រង់ចិញ្ចឹមគ្រែងឈាមធម្មជាតិនៅលើភូមិសាស្ត្រឃុំ Định Thành ភូមិភាគនឹងតម្រង់ទិសអភិវឌ្ឍន៍ទម្រង់នេះ ចំពោះគ្រួសារដែលមានផ្ទៃដីបង្កបង្កើនផលសមស្រប។ ការអភិវឌ្ឍន៍ត្រូវពិចារណាលើប្រៀបខ្លាំងដីបង្កបង្កើនផល ទ្រង់ទ្រាយនៃការផ្គត់ផ្គង់ប្រភពពូជគ្រែងធម្មជាតិ និងបញ្ហាការពារបរិស្ថាន”។
ដោយគោលដៅរក្សាប្រភពបែបធម្មជាតិ ដើម្បីបង្កើតរសជាតិពិសេសសម្រាប់ប្រភេទគ្រឿងសមុទ្រនៃស្រុកកំណើត ទម្រង់ចិញ្ចឹមគ្រែងធម្មជាតិរបស់លោក Thạch Ha សន្យថានឹងក្លាយជាទម្រង់ចីរភាព នាំមកនូវចំណូលមាននឹងនរសម្រាប់បងប្អូននៅតំបន់ឆ្នេរមាត់សមុទ្រ Cà Mau៕
Thiên Hương - Nguyễn Linh
