សម្រាប់តំបន់ជនជាតិភាគតិច ការបំប៉នចំណេះដឹង និងជំនាញឌីជីថលមិនត្រឹមតែជួយប្រជាជនឱ្យទទួលបានគោលការណ៍ណែនាំ និងគោលនយោបាយរបស់បក្ស និងក្រឹត្យច្បាប់របស់រដ្ឋបានលឿន និងឆាប់រហ័សជាងមុនប៉ុណ្ណោះទេ ប៉ុន្តែវាក៏បើកឱកាសសម្រាប់ការរៀនសូត្រ និងអនុវត្តវិទ្យាសាស្ត្រ បច្ចេកវិទ្យាទៅក្នុងការផលិត និងបង្កើនប្រាក់ចំណូល ព្រមទាំងសម្រេចបាននូវការកាត់បន្ថយភាពក្រីក្រប្រកបដោយចីរភាពផងដែរ។
លោក Thạch Mít បានអញ្ជើញទៅដល់គ្រួសារបងប្អូន Khmer នីមួយនៅភូមិ Cả Vĩnh ឃុំ Hưng Hội ចលនាបងប្អូនប្រជាជនចូលរួមក្រុម Zalo នៅភូមិដើម្បីក្តាប់ព័ត៌មានបានទាន់ពេល។
យោងតាមការជាក់ស្តែងបានឱ្យឃើញថា ឧបសគ្គដ៏ធំបំផុតចំពោះការផ្លាស់ប្តូរឌីជីថលនៅតាមតំបន់ជនជាតិភាគតិចគឺកង្វះជំនាញខាងបច្ចេកវិទ្យា។ មនុស្សជាច្រើនស្គាល់តែការប្រើប្រាស់ទូរស័ព្ទសម្រាប់ការហៅទូរស័ព្ទ ហើយមិនដឹងពីរបៀបប្រើប្រាស់អ៊ីនធឺណិតដើម្បីស្វែងរកប្រភពព័ត៌មាន រៀនបច្ចេកទេសផលិត ឬចូលប្រើសេវាសាធារណៈតាមអ៊ីនធឺណិតនោះទេ។ ដូច្នេះ ការបង្កើនសមត្ថភាពឌីជីថលរបស់បងប្អូនប្រជាជនបានក្លាយជាកិច្ចការសំខាន់មួយ រួមចំណែកដល់ការកសាងពលរដ្ឋឌីជីថលពីកម្រិតមូលដ្ឋានផងដែរ។
ដោយអនុវត្តតាមទិសស្លោក "ទៅតាមច្រក ហៅតាមផ្ទះ" សមមិត្ត Thạch Mít ប្រធានសាខាបក្ស និងជាប្រធានភូមិ Cả Vĩnh ឃុំ Hưng Hội បានចលនាគ្រួសារជនជាតិភាគតិចជាង ៣០០ គ្រួសារឱ្យចូលរួមជាមួយក្រុម Zalo តាមតំបន់ប្រជុំជន។ នេះក៏ជា "ស្ពានតភ្ជាប់" ដើម្បីនាំយកគោលនយោបាយ និងគោលការណ៍ណែនាំថ្មីៗ កាលវិភាគនីតិវិធីរដ្ឋបាល កម្មវិធីឧបត្ថម្ភផលិត ការបណ្តុះបណ្តាលវិជ្ជាជីវៈ ព័ត៌មានបង្ការ និងប្រឆាំងគ្រោះមហន្តរាយ និងការព្រមានអំពីការបោកប្រាស់តាមប្រព័ន្ធអ៊ីនធឺណិតដល់ប្រជាជនបានយ៉ាងឆាប់រហ័ស ត្រឹមត្រូវ និងទាន់ហេតុការណ៍។
ការផ្លាស់ប្តូរឌីជីថលមិនត្រឹមតែជួយប្រជាជនឱ្យទទួលបានព័ត៌មានប៉ុណ្ណោះទេ ថែមទាំងជួយពួកគេឱ្យរៀនពីរបៀបធ្វើអាជីវកម្មទៀតផង។ ក្រុមគ្រួសាររបស់បង Sơn Quang Bình នៅភូមិ Năm Căn ឃុំ Hưng Hội គឺជាឧទាហរណ៍ដ៏ល្អមួយ។ តាមរយៈអ៊ីនធឺណិត បងតែងសិក្សាស្រាវជ្រាវបច្ចេកទេសខាងដាំដំណាំ និងចិញ្ចឹមសត្វជាប្រចាំ ព្រមទាំងពិគ្រោះយោបល់អំពីទម្រង់ផលិតដែលមានប្រសិទ្ធភាពនៅតាមតំបន់ភូមិភាគជាច្រើនផងដែរ។ ដូច្នេះ បងក៏បានផ្លាស់ប្តូរដំណាំយ៉ាងក្លាហាន និងបង្កើតទម្រង់ចិញ្ចឹមសត្វដែលសមស្របទៅនឹងស្ថានភាពគ្រួសាររបស់បង។ រហូតមកដល់បច្ចុប្បន្ន គ្រួសារបងមានលក្ខណៈឈានឡើងរួចាចកពីភាពក្រីក្រប្រកបដោយចីរភាព។
កងជួរកម្មាភិបាលជនជាតិភាគតិចរួមចំណែកយ៉ាងសកម្មក្នុងការណែនាំ និងជំនួយឧបត្ថម្ភបងប្អូនប្រជាជនប្រើប្រាស់បណ្តាសេវាសាធារណៈតាមប្រព័ន្ធអ៊ីនធឺណិត។
យោងតាមផែនការលេខ ០២៧០ របស់គណៈកម្មាធិការប្រជាជនខេត្ត Cà Mau ស្តីពីការអនុវត្តកម្មវិធីគោលដៅជាតិសម្រាប់ការកសាងជនបទថ្មី កាត់បន្ថយភាពក្រីក្រប្រកបដោយចីរភាព និងការអភិវឌ្ឍសេដ្ឋកិច្ច-សង្គមនៅតំបន់ជនជាតិភាគតិច និងតំបន់ភ្នំដំណាក់កាល ២០២៦-២០៣០ ការផ្លាស់ប្តូរឌីជីថលត្រូវបានកំណត់ថាជាដំណោះស្រាយដ៏សំខាន់មួយដើម្បីបង្កើតសន្ទុះសម្រាប់ការអភិវឌ្ឍប្រកបដោយចីរភាព។ ខេត្តនឹងបន្តលើកកម្ពស់ការអនុវត្តបច្ចេកវិទ្យាព័ត៌មាន ផ្ទេរវឌ្ឍនភាពវិទ្យាសាស្ត្រ និងបច្ចេកទេសទៅក្នុងការផលិត និងជីវិតរស់នៅប្រចាំថ្ងៃ បង្កើនសមត្ថភាពឌីជីថលរបស់បងប្អូនប្រជាជន និងក្នុងពេលដំណាលគ្នាកសាង និងពង្រីកសាយភាយទម្រង់ "ភូមិឆ្លាតវៃ" រួមចំណែកដល់ការអភិវឌ្ឍសេដ្ឋកិច្ចជនបទ និងលើកកម្ពស់គុណភាពរស់នៅក្នុងតំបន់ជនជាតិភាគតិច។
ការកំណត់ទិសដៅទាំងនេះបានបង្ហាញឱ្យឃើញថា ការផ្លាស់ប្តូរឌីជីថលមិនត្រឹមតែជួយប្រជាជនឱ្យដឹងពីរបៀបរុករកផ្នែកបច្ចេកវិទ្យាដើម្បីទទួលបានចំណេះដឹង និងអនុវត្តវិទ្យាសាស្ត្រ និងបច្ចេកវិទ្យាចូលក្នុងការផលិតប៉ុណ្ណោះទេ ថែមទាំងអាចជួយឱ្យពួកគេយល់ដឹងព័ត៌មានយ៉ាងសកម្ម ភ្ជាប់ទំនាក់ទំនងជាមួយទីផ្សារ បង្កើតសន្ទុះថ្មីសម្រាប់តំបន់ជនជាតិភាគតិច និងរួមចំណែកដល់ការសម្រេចបាននូវគោលដៅនៃការកាត់បន្ថយភាពក្រីក្រប្រកបដោយចីរភាពទៀតផង៕
Kiều Nương
