វិស័យសិក្សាអប់រំ និងបណ្តុះបណ្តាលខេត្ត Cà Mau កំពុងអនុវត្តការរៀបចំប្រព័ន្ធសាលារៀនឡើងវិញដើម្បីឱ្យសមស្របទៅនឹងទំហំប្រជាជន តំបន់ភូមិសាស្ត្រ និងតម្រូវការអភិវឌ្ឍន៍អប់រំ។ គោលដៅគឺដើម្បីធានាសកម្មភាពបង្រៀន និងរៀនមានស្ថេរភាព និងប្រសិទ្ធភាពបន្ទាប់ពីការរៀបចំឡើងវិញ។ ជាពិសេសធានាលក្ខណៈសិក្សាអំណោយផលសម្រាប់សិស្សនៅក្នុងតំបន់ដែលមានជនរួមជាតិភាគតិចរស់នៅច្រើន។
ការរៀបចំសាលាឡើងវិញក៏ត្រូវបានអនុវត្តតាមទិសដៅនៃការបំព្រួញដើមទង ព្រមទាំងធានាលក្ខណៈរៀនសូត្រសម្រាប់ប្អូនៗសិស្សានុសិស្ស។ (រូបថតនៅសាលាបឋមសិក្សា Hồ Thị Kỷ A)។
យោងតាមលោក Nguyễn Văn Nguyên នាយកមន្ទីរអប់រំ និងបណ្តុះបណ្តាលខេត្ត Cà Mau ការរៀបចំសាលារៀនឡើងវិញគឺជាតម្រូវការដ៏សំខាន់មួយដើម្បីអនុវត្តគោលនយោបាយជាទូទៅរបស់មជ្ឈិម ផ្តើមពីនោះក៏លើកកម្ពស់ការគ្រប់គ្រង និងប្រើប្រាស់ប្រភពនៃការវិនិយោគសម្រាប់ខាងវិស័យអប់រំផងដែរ។ ទោះជាយ៉ាងណាក៏ដោយ ដំណើរការអនុវត្តត្រូវតែពិចារណាដោយប្រុងប្រយ័ត្នដើម្បីឱ្យមានការសមស្របទៅនឹងលក្ខណៈជាក់ស្តែងនៃតំបន់នីមួយៗ។
"ប្រការដែលសំខាន់បំផុតក្នុងដំណើរការរៀបចំឡើងវិញគឺធានាសិទ្ធិសិក្សារៀនសូត្ររបស់សិស្ស។ ការរៀបចំសាលារៀនឡើងវិញត្រូវតែគិតគូរពីចម្ងាយនៃការធ្វើដំណើរ លក្ខណៈដឹកជញ្ជូន ចំនួនសិស្ស សម្ភារៈ គ្រូបង្រៀន និងលក្ខណៈប្រជាសាស្ត្រនៃតំបន់នីមួយៗ។ នេះនឹងធានាថាគោលនយោបាយត្រូវបានអនុវត្តយ៉ាងត្រឹមត្រូវ ខណៈពេលដែលបង្កើតបរិយាកាសសិក្សាដែលមានស្ថិរភាព និងអំណោយផលសម្រាប់សិស្សក្នុងឆ្នាំសិក្សាថ្មីផងដែរ" លោក Nguyễn Văn Nguyên បានសង្កត់ធ្ងន់ដុច្នេះ។
ឃុំ Hồ Thị Kỷ ភូមិភាគដែលមានជនរួមជាតិ Khmer រស់នៅច្រើន ដូច្នេះការរៀបចំសាលារៀនឡើងវិញតែងទទួលបានការយកចិត្តទុកដាក់ពីរដ្ឋអំណាចភូមិភាគ ជាពិសេសការធានាលក្ខណៈសិក្សារៀនសូត្រសម្រាប់កូនក្មួយជនរួមជាតិភាគតិច។ ឆ្នាំសិក្សា ២០២៦-២០២៧ ទូទាំងឃុំនឹងមានកុមារ និងសិស្សចំនួន ៣.៤៤៣ នាក់ រួមទាំងកុមារកម្រិតមត្តេយ្យសិក្សាចំនួន ៦៧៥ នាក់ (កុមារជនជាតិភាគតិច ៤០ នាក់) សិស្សបឋមសិក្សាចំនួន ២.០៤៥ នាក់ (សិស្សជនជាតិភាគតិច ២៤១ នាក់) និងសិស្សកម្រិតមធ្យមសិក្សាចំនួន ៧២៣ នាក់ (សិស្សជនជាតិភាគតិច ១៤២ នាក់)។ សរុបសិស្សជនជាតិភាគតិចទាំងអស់មានចំនួន ៤២៣ នាក់។
មុនពេលការរៀបចំឡើងវិញ ឃុំនេះមានសាលារៀនទាំងអស់ចំនួន ៩ រួមមាន៖ សាលាមត្តេយ្យចំនួន ៣ សាលាបឋមសិក្សា ៤ សាលាអនុវិទ្យាល័យ ១ និងសាលាអនុវិទ្យាល័យ-វិទ្យាល័យរួមបញ្ចូលគ្នាចំនួន ១។ បន្ទាប់ពីការរៀបចំឡើងវិញ នៅសល់សាលាចំនួន ៦ ទៀត រួមមាន៖ ២ សាលាមត្តេយ្យ និងសាលាបឋមសិក្សាចំនួន ២ សាលាអនុវិទ្យាល័យ ១ ព្រមទាំងសាលាវិទ្យាល័យ និងវិទ្យាល័យរួមបញ្ចូលគ្នាចំនួន ១ ផងដែរ។
ប្អូនៗកុមារកម្រិតមតេយ្យ សប្បាយរីករាយជាមួយបរិស្ថានសិក្សាដែលមួយថ្ងៃកាន់តែទទួលបានការយកចិត្តទុកដាក់វិនិយោគ។
លោក Nguyễn Thanh Nhàn អនុប្រធានគណៈកម្មាធិការប្រជាជនឃុំ Hồ Thị Kỷ បានមានប្រសាសន៍ថា “ភូមិភាគនេះផ្តោតលើការឃោសនា និងបង្កើតការឯកភាពគ្នាក្នុងចំណោមប្រជាជន។ ផ្តើមពីនោះ ក៏បានសម្របសម្រួលជាមួយវិស័យអប់រំ ដើម្បីធានាបាននូវសម្ភារៈ បុគ្គលិក គ្រូបង្រៀន និងលក្ខណៈចាំបាច់សម្រាប់សិស្សានុសិស្សសិក្សារៀនសូត្របានល្អងាយស្រួល”។
រួមជាមួយនឹងការរៀបចំសាលារៀនឡើងវិញ វិស័យអប់រំ និងភូមិភាគនេះកំពុងផ្តោតលើការរៀបចំលក្ខណៈសម្រាប់ឆ្នាំសិក្សា ២០២៦-២០២៧។ ក្នុងបរិបទនេះ ហេដ្ឋារចនាសម្ព័ន្ធ ថ្នាក់រៀន ឧបករណ៍ សៀវភៅសិក្សា បុគ្គលិកគ្រូបង្រៀន និងការជំនួយឧបត្ថម្ភសម្រាប់សិស្សដែលជួបការលំបាកត្រូវបានកំណត់ថាជាអាទិភាពដ៏ចម្បងផងដែរ។
ផ្តោតលើស្មារតីរួម គឺត្រូវរៀបចំឡើងវិញដោយមិនរំខានដល់ការបង្រៀន និងរៀន ព្រមទាំងដើម្បីជៀសវាងគុណវិបត្តិដែលមិនចាំបាច់សម្រាប់សិស្សផងដែរ។ អាស្រ័យភូមិភាគមានទំហំធំទូលាយ និងមានប្រជាជនរស់នៅច្រើន ឬក៏ចំនួនសិស្សជនជាតិភាគតិចច្រើនផងនោះ ការរៀបចំសាលារៀនឡើងវិញ រួមទាំងការដឹកជញ្ជូននឹងបន្តពិនិត្យឡើងវិញ ដើម្បីធានាបាននូវភាពសមស្របទៅនឹងស្ថានភាពជាក់ស្តែង។ ក្នុងពេលជាមួយគ្នានេះ វិស័យអប់រំនឹងបន្តចាត់ចែងគ្រូបង្រៀនឱ្យបានល្អត្រឹមត្រូវ ប្រើប្រាស់សម្ភារៈដែលមានស្រាប់ប្រកបដោយប្រសិទ្ធភាព និងផ្តល់អាទិភាពនៃប្រភពធនធានសម្រាប់តំបន់ដែលជួបលំបាក៕
Trúc Linh
