មកដល់ភូមិអណ្តូងចេក (Đìa Chuối) ឃុំ Vĩnh Mỹ សាកសួររកវត្តអណ្ដូងចេកគ្រប់គ្នាសុទ្ធតែស្គាល់។ វត្តមិនត្រឹមតែជាទីសក្ការៈបូជាខាងវិញ្ញាណប៉ុណ្ណោះទេ ថែមទាំងជាទីកន្លែងចិញ្ចឹមលាក់បំពួនកម្មាភិបាលបដិវត្តន៍ ក្នុងសម័យតស៊ូទាំង ២ លើក ប្រឆាំងបរទេសឈ្លានពានរបស់ជនជាតិទៀតផង។ កណ្តាលបរិយាកាសដ៏ស្ងប់ស្ងាត់ វត្តលេចចេញរូបរាងយ៉ាងស្ងៀមស្ងាត់ រក្សាទុកនូវអនុស្សាវរីយ៍ដ៏អង់អាចក្លាហាន តាមរយៈសរសៃឈើ និងក្បឿងដំបូលដែលដុះសរាយពេលវេលា។
ព្រះវិហារវត្តអណ្ដូងចេក (Đìa Chuối)។
វត្តព្រះពុទ្ធសាសនាទក្ខិណានិកាយ Khmer នេះ បានឆ្លងកាត់ជាង ១ សតវត្សរ៍នៃការកសាងនិងអភិវឌ្ឍន៍ (កសាងតាំងពីឆ្នាំ ១៩០៣) ដោយមានព្រះចៅអធិការ ១៥ ជំនាន់។ ក្នុងសម័យតស៊ូទាំង ២ លើក ប្រឆាំងបារាំង (Pháp) និងអាមេរិក (Mỹ) ព្រះចៅអធិការវត្តគ្រប់ជំនាន់តែងមានចិត្តស្មោះស្ម័គ្រដើរតាមបក្ស តាមលោកប្រធាន Hồ Chí Minh និងគាំទ្របដិវត្តន៍ទាំងសម្ភារៈនិងស្មារតី។ ក្នុងនោះ ឆ្នើមបំផុតគឺអតីតឧបជ្ឈាយ៍ Tăng Neang (ជាព្រះចៅអធិការពីឆ្នាំ ១៩១៦-១៩៧៦)។
ប្រជាជននៅទីនេះនៅតែនិយាយតៗគ្នា នូវពាក្យសម្តីដ៏មុះម៉ាត់របស់ឧបជ្ឈាយ៍ Tăng Neang នៅចំពោះមុខចុងកាំភ្លើងរបស់ពួកសត្រូវថា៖ “បើចង់សម្លាប់អាត្មា ទុកឱ្យអាត្មាបានឡើងលើព្រះវិហារថ្វាយបង្គំព្រះជាមុនសិន ចាំពួកលោកសម្លាប់ចុះ។ តែអាត្មាដាច់ខាតមិនទៅណាទេ អាត្មា និងវត្តនេះ មួយតឹកកមិនឆ្ងាយមួយលីក៏មិនចាកចេញ”។ គឺស្មារតីដ៏អង់អាចនោះហើយ បានប្រែក្លាយវត្តនេះទៅជា "បន្ទាយដែក"។
រូបសំណាកអតីតឧបជ្ឈាយ៍ Tăng Neang ដែលបានតម្កល់បូជានៅឧបដ្ឋានសាលាបុរាណក្នុងវត្តអណ្ដូងចេក (Đìa Chuối)។
ក្នុងបណ្តាឆ្នាំនៃសង្គ្រាមដ៏សាហាវឃោរឃៅ សូម្បីតែដើមឈើនៅក្នុងវត្តក៏បានចូលរួមធ្វើបដិវត្តន៍ដែរ។ នៅឆ្នាំ ១៩៤៨ វត្តបានបរិច្ចាគដើមឈើធំៗចំនួន ៥ ដើម ដើម្បីធ្វើទូកដឹកជញ្ជូន និងធ្វើដងកាំភ្លើងជូន Việt Minh។ លេនសម្ងាត់នៅក្រោម បល្ល័ង្កព្រះ ឬនៅលើពិដានព្រះវិហារ និងសាលា បានការពារយ៉ាងសុវត្ថិភាពដល់កម្មាភិបាលស្នូលជាច្រើនរបស់ខេត្ត Bạc Liêu (ចាស់)។
ឆ្នាំ ២០១២ វត្តអណ្ដូងចេក មានកិត្តិយសបានទទួលស្គាល់ជា កេរដំណែលប្រវត្តិសាស្ត្រថ្នាក់ខេត្ត។ កិត្តិនាមនេះជាការតបស្នងសគុណដ៏សក្តិសម ចំពោះការរួមចំណែករបស់វត្ត និងការលះបង់ របស់បុព្វបុរសជំនាន់មុន។
បរិវេណវត្តអណ្ដូងចេក (Đìa Chuối)។
សព្វថ្ងៃនេះ ឈរនៅក្រោមដំបូលឧបដ្ឋានសាលា ប៉ះដៃលើស្លាកស្នាមនៃពេលវេលា ជំនាន់យុវវ័យមិនត្រឹមតែបានទស្សនាសម្រស់ស្ថាបត្យកម្ម Khmer ប៉ុណ្ណោះទេ ថែមទាំងមានអារម្មណ៍ដឹងនូវភាពកក់ក្តៅនៃទឹកចិត្តស្នេហាជាតិទៀតផង។ ឧបដ្ឋានសាលានោះឈរយ៉ាងស្ងៀមស្ងាត់នៅទីនោះ និទានរឿងអំពីសាមគ្គីភាពជនជាតិ ដាស់តឿនកូនចៅអំពីសម័យកាលគ្រាប់រំសេវដ៏លំបាក ដើម្បីដណ្តើមឯករាជ្យ សេរីភាពសម្រាប់ថ្ងៃនេះ៕
Đờ Ni - Danh Điệp
