ប៉ុន្មានថ្ងៃនេះ ប្រសិនបើមានឱកាសបានទៅទស្សនាភូមិរបរងៀតត្រីកន្ធនៅភូមិ Đá Bạc A ឃុំ Đá Bạc នឹងបានឃើញនូវបរិយាកាសយ៉ាងឱឡារឹករបស់បងប្អូនប្រជាកសិករនៅទីនេះជាក់ជាមិនខាន។ ម្នាក់ៗកំពុងរវាល់ហាលងៀតសម្រាប់បម្រើទៅផ្សារបុណ្យតេត ពីព្រោះងៀតត្រីកន្ធក្លាយជាមុខម្ហូបដែលនិយមបានឃើញជាប្រចាំនៅក្នុងស្ពកបាយ ឬរៀបចំដើម្បីទទួលភ្ញៀវនាឱកាសបុណ្យចូលឆ្នាំ Tết សម្រាប់គ្រួសារជាច្រើនផងដែរ។
ភូមិរបរងៀតត្រីកន្ធនៅភូមិ Đá Bạc A ឃុំ Đá Bạc កំពុងមានភាពមមាញឹកមុនថ្ងៃបុណ្យ Tết ។
តាំងពីព្រឹកព្រលឹម ទីធ្លាហាលងៀតក៏មានភាពអ៊ូអរដោយសំណើច និងការជជែកគ្នាយ៉ាងក្អាកក្អាយ។ បណ្តាកញ្ឆេងៀតត្រីកន្ធស្រស់ដែលត្រូវបានសម្អាតរួច និងត្រូវបានរៀបជាជួរហាលខាងមុខផ្ទះ។ ក្រោមពន្លឺនៃកំដៅព្រះអាទិត្យនិទាឃរដូវដ៏ស្រទន់ រួមជាមួយចំហាយត្រីប្រចាំតំបន់ ញាំងឱ្យបរិយាកាសនៃភូមិរបរកាន់តែមានភាពកក់ក្តៅជាងពេលណាៗទាំងអស់។
ភូមិ Đá Bạc A មានជនរួមជាតិ Khmer រស់នៅប្រមាណជាង ៦០ គ្រួសារ។ ក្នុងរយៈពេលប៉ុន្មានឆ្នាំមកនេះ គ្រួសារជាច្រើនឈានឡើងធ្វើមានអាស្រ័យមុខរបរផលិតងៀតត្រីកន្ធ ព្រមទាំងក្លាយជាម្ចាស់មូលដ្ឋានផលិតងៀតទាំងខ្លួននៅវ័យក្មេងទៀតផង។ តួយ៉ាងដូចជាបង Danh Văn Hiếu (អាយុ ៤០ ឆ្នាំ) ជាអ្នកប្រកបរបរផលិតងៀតត្រីកន្ធអស់រយៈពេលជាង ១០ ឆ្នាំមកហើយ ហើយបច្ចុប្បន្នជាម្ចាស់មូលដ្ឋានផលិតងៀតត្រីកន្ធ ហាយឡើយ របស់ភូមិផងដែរ។ ទន្ទឹមនិងការខិតខំធ្វើមានសម្រាប់ខ្លួនផ្ទាល់ បង Hiếu ថែមទាំងបានបង្កើតការងារធ្វើសម្រាប់កម្មករក្នុងស្រុកទៀតផង ដោយផ្តល់ឱ្យពួកគេនូវប្រាក់ចំណូលចាប់ពី ១០០-២០០ ពាន់ដុង/ថ្ងៃ។ រួមចំណែកផ្តល់ឱកាសការងារធ្វើសម្រាប់គ្រួសារដែលមានជីវភាពខ្វះខាត ដោយមិនចាំបាច់ទៅរកស៊ីនៅតាមស្រុកឆ្ងាយ។
បែងប្រភេទងៀតត្រីកន្ធតាមតម្រូវការរបស់ភ្ញៀវអតិថិជនដែលបានដាក់ពាក្យទិញ។
បង Hiếu បានឱ្យដឹងថា៖ “ពីមុន មុខរបរធ្វើងៀតត្រីកន្ធ មួយឆ្នាំធ្វើបានត្រឹមរយៈពេល ៣ ខែប៉ុណ្ណោះ (ចាប់ពីខែតុលារហូតដល់ចុងខែធ្នូ តាមប្រតិទិនចន្ទគតិ) ដោយសារខ្វះវត្ថុធាតុដើម។ ទោះដីដូច្នេះក៏ដោយ តែផ្ទុយមកវិញ ប៉ុន្មានឆ្នាំមកនេះ ត្រីកន្ធត្រូវបានចិញ្ចឹមច្រើនសន្ធឹកសន្ធាប់ ទើបរបរផលិតងៀតត្រីកន្ធក៏ត្រូវបានគ្រួសារជាច្រើននៅទីនេះធ្វើតៗគ្នាយ៉ាងមានប្រសិទ្ធភាពទៀតផង ជាពិសេស គ្រួសារ Khmer តែម្តង។ បណ្តាថ្ងៃប្រកៀកនឹងបុណ្យ Tết នេះតម្រូវការភ្ញៀវអតិថិជនទិញងៀតក៏មានការកើនខ្ពស់ណាស់ដែរ”។
ត្រីកន្ធស្រស់ត្រូវបានលាងសម្អាតមុនពេលយកទៅប្រឡាក់អំបិល។
និទាឃរដូវនៅភូមិរបរងៀតត្រីកន្ធ មិនត្រឹមតែនាំមកនូវក្តីសប្បាយរីករាយក្នុងការពលកម្មប៉ុណ្ណោះទេ ថែមទាំងបាននាំមកនូវមោទនភាពសម្រាប់ខាងមុខរបរជាប្រពៃណីរទៀតផង។ ចំពោះល្បឿននៃការផ្លាស់ប្តូរជីវភាពរស់នៅ បងប្អូនប្រជាជនទីនេះនៅតែរក្សារបរប្រពីណីដែលជាកេរដមណែលពីដូនតា ដើម្បីរដូវបុណ្យ Tết ឈានចូលមកដល់ ភូមិរបរកាន់តែមានភាពអឹកធឹក និងកក់ក្តៅពេញដោយក្តីសង្ឃឹមជាងពេលណាៗទាំងអស់៕
Danh Điệp
