ស្ថិតនៅសង្កាត់ Vĩnh Trạch វត្តដើមពោន (Kim Cấu) មិនត្រឹមតែជាកន្លែងសកម្មភាពជំនឿសាសនារបស់បងប្អូន Khmer ប៉ុណ្ណោះទេ ថែមទាំងជារូបសញ្ញាតភ្ជាប់រវាងសហគមន៍ទៀតផង។ ក្រោមការដឹកនាំរបស់ព្រះតេជព្រះគុណ Thạch Thương ព្រះចៅអធិការវត្ត វត្តក៏បានសរសេរឡើងនូវរឿងរ៉ាវគួរឱ្យស្ងើចសរសើរអំពីការផ្សារភ្ជាប់រវាងវិស័យពុទ្ធចក្រ និងអាណាចក្រ តាមរយៈការងារសុខុមាលភាពសង្គម និងបុព្វហេតុនៃការបណ្តុះបណ្តាលប្រភពធនធានមនុស្ស ។
សកម្មភាពប្រជុំប្រចាំការរបស់គណៈកម្មការវត្តដើមពោន (Kim Cấu)។
ថែទាំជីវភាព បើកផ្លូវឆ្ពោះទៅអនាគត
ប៉ុន្មានឆ្នាំកន្លងមកនេះ ព្រះតេជព្រះគុណ Thạch Thương តែងមានព្រះទ័យបារម្ភចំពោះផ្លូវលំដីភក់ ល្បាប់ដែលបង្កលំបាកដល់ការធ្វើដំណើររបស់ប្រជាជន និងការទៅសាលារៀនរបស់កុមារាកុមារី។ ដោយទស្សនៈ "អ្វីដែលរដ្ឋធ្វើមិនទាន់សព្វវត្តនិងពុទ្ធបរិស័ទរួមដៃគ្នាធ្វើ" វត្តបានចលនាពុទ្ធបរិស័ទចាក់បេតុងផ្លូវជាច្រើនខ្សែតភ្ជាប់ភូមិស្រុក រួមចំណែកផ្លាស់ប្តូរមុខមាត់តំបន់ជនបទក្រលំបាក។ ផ្លូវដ៏ស្អាតមិនត្រឹមតែជួយឱ្យបងប្អូនធ្វើដំណើរបានស្រួលប៉ុណ្ណោះទេ ថែមទាំងរួមចំណែកដល់ការអភិវឌ្ឍសេដ្ឋកិច្ចភូមិភាគទៀតផង។
ជាពិសេស បំណងប្រាថ្នាដ៏ធំបំផុតរបស់វត្តគឺ "ធនធានមនុស្ស"។ វត្តដើមពោនបានរក្សាមូលនិធិឧបត្ថម្ភនិស្សិត ដើម្បីជួយសម្រាលបន្ទុកដល់កូនចៅពុទ្ធបរិស័ទដែលកំពុងសិក្សានៅសាកលវិទ្យាល័យ។ ប្រចាំឆ្នាំ និស្សិតដែលរៀននៅខេត្ត Bạc Liêu (ចាស់) ទទួលបានទឹកប្រាក់ ១ លានដុង នៅទីក្រុង Cần Thơ ចំនួន២ លានដុង និងនៅក្រុង Hồ Chí Minh ៣ លានដុង។ ការឧបត្ថម្ភនេះបានអនុវត្តដោយសមធម៌ មិនប្រកាន់អ្នកមានឬអ្នកក្រ ឱ្យតែពួកគាត់មានស្មារតីសិក្សានិងមានឆន្ទៈជឿនលឿន។
ថែរក្សាអត្តសញ្ញាណ និងសីលធម៌
ការអភិរក្សអក្សរសាស្ត្រ និងធម៌អាថ៌វិន័យប្រពៃណី តែងបានវត្តដាក់ជាអាទិភាពចម្បង។ ថ្នាក់រៀនអក្សរ Khmer នារដូវវិស្សមកាល បានទាក់ទាញសិស្សរាប់រយនាក់ រួមជាមួយថ្នាក់ធម្មវិន័យបានង្រៀនជាប្រចាំ។ ដើម្បីលើកទឹកចិត្ត រាល់ម៉ោងសិក្សានៅថ្ងៃអាទិត្យ សិស្សានុសិស្សទទួលបានថវិកា ១០ ពាន់ដុងពីវត្ត។ នៅទីនេះ ប្អូនៗមិនត្រឹមតែបានរៀនអក្សរប៉ុណ្ណោះទេ ថែមទាំងបានរៀនអំពីសីលធម៌ និងរបៀបរស់នៅជាមនុស្សល្អក្នុងសង្គមផងដែរ។
ព្រះសង្ឃក្នុងវត្តក្នុងម៉ោងសិក្សាធម្មវិន័យថ្នាក់ត្រី ឆ្នាំ ២០២៥-២០២៦។
គ្រួសារលោក Danh Thanh Hùng និងលោក Dương Văn Tiến គឺជាអ្នកទទួលបានការឧបត្ថម្ភពីវត្ត។ ទោះបីជីវភាពគ្រួសារនៅមានការលំបាក កូនៗកំពុងសិក្សាផ្នែកវេជ្ជសាស្ត្រ និងគរុកោសល្យនៅសាកលវិទ្យាល័យ Cần Thơ ប៉ុន្តែដោយសារមានការជួយជ្រោមជ្រែងទាន់ពេលវេលាពីមូលនិធិវត្តដើមពោន (Kim Cấu) បានក្លាយជាកម្លាំងចិត្តដ៏ធំធេងជួយឱ្យពួកគាត់មានទំនុកចិត្តលើវិថីសិក្សារៀនសូត្រ។
តាមរយៈសកម្មភាពជាក់ស្តែង វត្តដើមពោន (Kim Cấu) បានអះអាងពីតួនាទីជាបង្អែកដ៏រឹងមាំ រួមចំណែកយ៉ាងសំខាន់ក្នុងកិច្ចការសុខុមាលភាពសង្គម និងការថែរក្សាព្រលឹងជាតិនៅភូមិភាគ៕
Đờ Ni - Ngọc Quyên
