ពេលដែលផ្កាលឿងរាជកំពុងរីកបង្អួតសម្រស់តាមដងផ្លូវភូមិស្រុក អបជាមួយសូរសម្លេង ស្គរឆៃយ៉ាំ និងតន្រ្តីពិណពាទ្យបន្លឺឡើងយ៉ាងពិរោះរន្តំ ក៏ជាឱកាសដែលបងប្អូន Khmer Nam Bộ រីករាយស្វាគមន៍ទទួលបុណ្យចូលឆ្នាំថ្មីប្រពៃណីជាតិ ឆ្នាំ២០២៦ ដែលជាពិធីបុណ្យពោពេញដោយពណ៌សម្បុរវប្បធម៌ពុទ្ធសាសនាទក្ខិណានិកាយ Khmer សុទ្ធសាធ។ មិនត្រឹមតែជាពេលវេលាផ្លាស់ប្តូររវាងរដូវប្រាំងនិងរដូវវស្សាប៉ុណ្ណោះទេ នេះក៏ជាឱកាសសម្រាប់កូនចៅម្នាក់ៗវិលមករកស្រុកកំណើតវិញ តាមរយៈពិធីបុណ្យតាមជំនឿសាសនាដ៏ជ្រាលជ្រៅ។
ពិធីទទួលទេវតាឆ្នាំថ្មី ក្នុងឱកាសបុណ្យចូលឆ្នាំថ្មីប្រពៃណី Khmer ។
ទទួលសង្រ្កាន្តថ្មី៖ ខណៈពេលប្រសព្វគ្នារវាងមេឃនិងដី
ឈានចូលពិធីកិច្ចដ៏សំខាន់បំផុតគឺទទួលមហាសង្រ្កាន្តថ្មី (ទទួលទេវតា)។ ក្នុងវេលាល្អដ៏ដែលបានកំណត់ បងប្អូន Khmer ជាមួយសម្លៀកបំពាក់ប្រពៃណីដ៏ស្រស់ស្អាត ទូលជើងពាន ផ្លែឈើ ភ្ញីផ្កា ទៀនធូបយ៉ាងសមរម្យដើម្បីដង្ហែប្រទក្សិណជុំវិញព្រះវិហារ។ នេះគឺជាពិធីទទួលស្វាគមន៍ទេវតា ឆ្នាំថ្មីដែលយាងចុះមកគ្របគ្រងឋានមនុស្សលោក។ សូរសព្ទតន្រ្តីពិណពាទ្យដ៏អឹងកង ក្បួនដង្ហែបានបង្កើតបរិយាកាសយ៉ាឱឡារឹក បួងសួងសុំឱ្យឆ្នាំថ្មីមានទឹកភ្លៀងបង្អុរចុះមកតាមរដូវកាល ភោគផលកសិកម្មបានពេញបរិបូរណ៍ និងជីវភាព សុខសាន្តសម្រាប់ភូមិស្រុកទាំងមូល។
បងប្អូន Khmer រួមគ្នាចូលវត្តស្រង់ព្រះ ក្នុងឱកាសឆ្នាំថ្មី។
ស្រង់ព្រះ ស្រង់ព្រះសង្ឃ និងភាពកតញ្ញូរបស់កូនចៅ
ពិធីកិច្ចដែលគួរឱ្យរំភើប និងមានលក្ខណៈមនុស្សធម៌ខ្ពង់ខ្ពស់បំផុត គឺពិធីស្រង់ព្រះ។ បន្ទាប់ពីស្ដាប់ព្រះបរិត្ត ព្រះធម៌ទេសនា ព្រះសង្ឃនិងពុទ្ធបរិស័ទបានប្រើទឹកអប់ ដើម្បីស្រង់ព្រះពុទ្ធរូប។ បន្ទាប់មក គឺពិធីស្រង់ព្រះសង្ឃដែលជាអ្នកមានសីលធម៌ខ្ពង់ខ្ពស់ និងស្រង់មុខទឹកសម្អាតរាងកាយជូនលោកតា លោកយាយ ឪពុកម្តាយនៅឯផ្ទះ។ ទឹកដ៏ត្រជាក់មិនត្រឹមតែមានអត្ថន័យលាងជម្រះរាល់មន្ទិលក្នុងឆ្នាំចាស់ប៉ុណ្ណោះទេ ថែមទាំងជាស្ពានមេត្រីបង្ហាញពីកតញ្ញូតាធម៌ ចំពោះអ្នកមានគុណ និងអ្នកដែលនាំផ្លូវសទ្ធាជ្រះថ្លា។ នេះគឺជាខណៈពេលដ៏ស្មឹងស្មាធិ៍សម្រាប់ជំនាន់វ័យក្មេងពិនិត្យមើលខ្លួនឯងឡើងវិញ និងប្រសិទ្ធពរជ័យសិរីមង្គលជូនដល់សាច់ញាតិ។
ពូនភ្នំខ្សាច់ និងពិធីបង្សុកូល៖ ការតភ្ជាប់រវាងអតីតកាលនិងបច្ចុប្បន្នកាល
នៅតាមបរិវេណវត្តអារាមនីមួយៗ ពិធីពូនភ្នំខ្សាច់ បានទាក់ទាញបងប្អូនចូលរួមយ៉ាងកុះករ។ ភ្នំខ្សាច់តូចៗបានពូនឡើងដោយជំនឿថា គ្រាប់ខ្សាច់ទាំងឡាយ គឺជាពាក្យបន់ស្រន់ដើម្បីជម្រះបាបកម្ម និងសន្សំបុណ្យកុសល។ ជាចុងក្រោយ មិនអាចខ្វះបាននូវពិធីបង្សុកូល។ នៅចំពោះមុខចេតិយ ឬអាសនៈដូនតា ព្រះសង្ឃបានសូត្រធម៌ឧទ្ទិសកុសលជូនដល់វិញ្ញាណក្ខន្ធអ្នកដែលបានចែកឋាន។ ពិធីនេះកាន់តែបញ្ជាក់ពីសីលធម៌ "ផឹកទឹកនឹក ប្រភព" របស់ប្រជាជាតិវៀតណាម បើទោះជាក្នុងសេចក្តីសប្បាយរីករាយទទួលឆ្នាំថ្មី ក៏បងប្អូន Khmer នៅតែមិនភ្លេចរំលឹកដល់បុព្វបុរសដែលបានលាចាកលោកផងដែរ។
ថ្ងៃចុងក្រោយនៃបុណ្យចូលឆ្នាំថ្មី បងប្អូន Khmer កុះករប្រមូលផ្តុំគ្នាក្នុងវត្ត ដើម្បីបង្សុកូលឧទ្ទិសកុសលដល់វិញ្ញាណក្ខន្ធបុព្វការីជនដែលបានចែកឋាន។
បុណ្យចូលឆ្នាំថ្មីប្រពៃណីជាតិ ដោយពិធីកិច្ចតាមលំដាប់លំដោយ ចាប់ពីទទួលសង្រ្កាន្តឆ្នាំថ្មីរហូតដល់ពិធីបង្សុកូល បានបង្កើតជាលំហូរវប្បធម៌មិនរីងស្ងួត។ នោះមិនត្រឹមតែជាពិធីកិច្ចសាសនានោះទេ ថែមទាំងជាដួងព្រលឹងជាតិ ជាខ្សែចំណងរឹតបន្តឹងសាមគ្គីភាពក្នុងសហគមន៍ និងចិត្តជ្រះថ្លាក្នុងមនុស្សម្នាក់ៗទៀតផង៕
Đờ Ni - Danh Điệp
