ស្ថិតនៅភូមិខ្វែងបបែល ឃុំ Hưng Hội វត្តបុប្ផារាម មិនត្រឹមតែជាវត្តបុរាណដែលមានអាយុកាលរាប់រយឆ្នាំប៉ុណ្ណោះទេ ថែមទាំងបានគេប្រៀបដូចជា "សារមន្ទីររស់" ជាទីឋានរក្សាទុកនូវវត្ថុបុរាណដ៏ច្រើនបំផុតប្រចាំខេត្ត Cà Mau។ ចំកណ្ដាលលំហដ៏ស្ងប់ស្ងាត់ វត្តនេះបានលេចត្រដែតឡើងដូចជាស្ពានមេត្រីតភ្ជាប់រវាងអតីតកាល និងបច្ចុប្បន្ន ដោយបានអភិរក្សគ្រប់គ្រាន់នូវតម្លៃវប្បធម៌ដ៏វិសេសវិសាលនៃព្រះពុទ្ធសាសនាទក្ខិណានិកាយ Khmer ។
ឧបដ្ឋានសាលាឈើដែលមានអាយុកាលជាងមួយសតវត្ស នៅវត្តបុប្ផារាម។
ចំណុចលេចធ្លោពិសេសរបស់វត្ត គឺឧបដ្ឋានសាលាធ្វើពីឈើដែលមានអាយុកាលជាងមួយសតវត្សមកហើយ។ ទោះបីជាឆ្លងកាត់ការប្រែប្រួលនៃពេលវេលាយ៉ាងណាក៏ដោយ សំណង់នេះនៅតែមានភាពរឹងមាំ និងបន្តប្រើប្រាស់រហូតមកទល់បច្ចុប្បន្ន នេះក៏ជាភស្តុតាងបង្ហាញពីបច្ចេកទេសនៃស្ថាបត្យកម្មដ៏ផ្ចិតផ្ចង់របស់អ្នកជំនាន់មុនៗផងដែរ។ ខាងក្នុង គឺជាបណ្តុំរូបបដិមាព្រះពុទ្ធធ្វើពីថ្មភក់ (ថ្មភក់ពណ៌ប្រផេះ) តាំងពីសតវត្សទី XVI-XVII ដែលមានរចនាប័ទ្មយ៉ាងច្បាស់លាស់តាមបែបក្រោយសម័យអង្គរ និងសម័យអយុធ្យា។ ទាំងនេះគឺជាសក្ខីកម្មដ៏មានតម្លៃអំពីដំណើរនៃការកសាងទឹកដីនេះរបស់ជនរួមជាតិ Khmer។
រូបព្រះពុទ្ធបដិមាជាច្រើនអង្គដែលបានធ្វើពីថ្មភក់តាំងពីសតវត្សទី XVI-XVII ត្រូវបានរក្សាទុកក្នុងវត្តបុប្ផារាម។
មិនត្រឹមតែមានព្រះពុទ្ធបដិមាប៉ុណ្ណោះទេ វត្តក៏ជាកន្លែងរក្សាទុកបុរាណវត្ថុប្លែកៗជាច្រើនទៀតដូចជា៖ គ្រែស្ពាន់ ទូឈើ រហូតដល់គូសត្វតោស្ពាន់។ល។ វត្ថុតាងនីមួយៗសុទ្ធតែផ្ទុកនូវស្លាកស្នាមនៃការរួមរស់ និងរងឥទ្ធិពលវប្បធម៌រវាងជនជាតិជាបងប្អូន Việt - Khmer - Hoa ឆ្លុះបញ្ចាំងពីជីវភាពរួមគ្នាជិតស្និទ្ធអស់ជាច្រើនសតវត្សកន្លងមកហើយ។
ទន្ទឹមជាមួយការថែរក្សាតម្លៃទាំងនោះ ក៏មានការយកចិត្តទុកដាក់ខ្ពស់ពីសំណាក់ ព្រះឧបជ្ឈាយ៍ Tăng sa Vong ផងដែរដែលជាព្រះចៅអធិការវត្ត ព្រះអង្គបានខិតខំតស៊ូ ចលនា ប្រមូល និងលោះយកមកវិញនូវវត្ថុអនុស្សាវរីយ៍ដ៏មានតម្លៃក្នុងប្រជាជន ដើម្បីយកមករក្សាទុកក្នុងវត្ត។ អាស្រ័យហេតុនេះ "បំណែកនៃពេលវេលា" ទាំងនោះមិនបានបាត់បង់ឡើយ ប៉ុន្តែបានក្លាយជាបេតិកភណ្ឌដ៏មានតម្លៃសម្រាប់បច្ចុប្បន្ន អនាគត។
បុរាណវត្ថុជាច្រើន ត្រូវបានវត្តរក្សាទុកយ៉ាងយកចិត្តទុកដាក់បំផុត។
ជាមួយឃ្លាំងនៃវត្ថុតាងដ៏ពិសេស វត្តបុប្ផារាម (Cái Giá Chót) មិនត្រឹមតែជាបង្អែកខាងស្មារតីប៉ុណ្ណោះទេ ថែមទាំងជាមោទនភាពនៃអត្តសញ្ញាណវប្បធម៌ រួមចំណែកធ្វើឱ្យសម្បូរបែបនូវចរន្តវប្បធម៌នៃទឹកដីចុងជ្រោយបង្អស់របស់ប្រទេសជាតិ មាតុភូមិ ទៀតផង៕
Chim Đôn Ta - Chanh Đa
