នៅតំបន់ឆ្នេរសមុទ្រនៃឃុំ Cái Đôi Vàm ឃុំ Cái Đôi Vàm ទម្រង់ការងារសាមញ្ញ ប៉ុន្តែមានសភាពនឹងនរល្អរអស់រយៈពេលរាប់សិបឆ្នាំមកហើយ ដោយផ្តល់ប្រាក់ចំណូលស្ថិរភាព និងក្លាយជាការទីបង្អែកខាងវិស័យសេដ្ឋកិច្ចសម្រាប់គ្រួសារជាច្រើន នោះគឺរបរប៉ះដេរសំណាញ់នេសាទ។
-7772.JPG)
នារីឃុំ Cái Đôi Vàm មានប្រភពចំណូលនឹងនរពីរបរប៉ះដេរសំណាញ់។
ទូទាំងឃុំ Cái Đôi Vàm មានគ្រួសារជាង ៦.៧០០ គ្រួសារ ដែលមានប្រជាជនប្រមាណ ២៨ ពាន់នាក់។ តំបន់នេះរួមមានទាំងអស់ ១៩ ភូមិ ដែលជាជម្រករបស់បងប្អូនបណ្តាជនជាតិជាបងប្អូនចំនួន ៩ ជនជាតិ៖ Kinh, Khmer, Hoa, Tày, Nùng… មនុស្សម្នាក់ៗមានស្ថានភាពខុសៗគ្នា ខាងមុខរបររកស៊ីក៏មិនដូចគ្នា ក៏ប៉ុន្តែចំណុចរួមតែមួយគឺការខិតខំឧស្សាហ៍ព្យាយាមរកស៊ី។ បងប្អូននារី នៅទីនេះ ក្រៅពីតួនាទីជាអ្នក “បន្តរក្សារ” សុភមង្គលគ្រួសារ ធ្វើការយ៉ាងសកម្ម និងសិក្សារៀនដើម្បីកែលម្អជីវភាពរស់នៅរបស់ខ្លួន។
លោកស្រី Đào Thị Thanh An អនុប្រធានសមាគមសហព័ន្ធនារីឃុំ Cái Đôi Vàm បានមានប្រសាសន៍ថា “ក្នុងចំណោមទម្រង់នៃការរស់នៅដូចជាការដាំបន្លែ ធ្វើងៀត និងរបរផលិតទឹកត្រី។ល។ របរជួសជុលសំណាញ់នេសាទមានភាពទាក់ទាញបងប្អូននារីជាច្រើន ដោយទទួលបានប្រភាពប្រាក់ចំណូលនឹងនរ រួមចំណែកដល់ការកាត់បន្ថយភាពក្រីក្រប្រកបដោយប្រសិទ្ធភាពទៀតផង”។
បណ្តាសំណាញ់នេសាទតែងតែរហែកបន្ទាប់ពីចេញទៅសមុទ្រម្តងៗ ហើយត្រូវជួសជុលភ្លាមៗដើម្បីបន្តបម្រើការងារខាងនេសាទ។ ការងារនេះមើលទៅហាក់ដូចជាសាមញ្ញ ប៉ុន្តែទាមទារភាពហ្មត់ចត់ ការអត់ធ្មត់ និងជំនាញ - បណ្តាគុណសម្បត្តិដែលបងប្អូននារីនៅតាមតំបន់ឆ្នេរមាត់សមុទ្រមានស្រាប់ផងដែរ។ ដូច្នេះ ការប៉ះដេរសំណាញ់នេសាទបានក្លាយជាជម្រើសដ៏ពេញនិយមយ៉ាងឆាប់រហ័សសម្រាប់បងប្អូននារីជាច្រើនដើម្បីរកប្រាក់ចំណូលបន្ថែមក្នុងអំឡុងពេលទំនេររបស់ពួកគេ។
ជាអ្នកប្រកបរបរនេះអស់រយៈពេលជាង ១០ ឆ្នាំមកហើយ បងស្រី Dương Ngọc Bích (អាយុ ៤៧ ឆ្នាំ នៅភូមិលេខ ៥ ឃុំ Cái Đôi Vàm) ក៏បានស្គាល់គ្រប់ប្រភេទសំណាញ់ និងថ្នេរផងដែរ។ ខណៈពេលដែលប្តីរបស់គាត់ប្រកបរបរខាងនេសាទ គាត់នៅផ្ទះមើលថែកូនៗ និងប៉ះដេរសំណាញ់ស៊ីឈ្នួល ។ បងស្រី Bích បាននិយាយថា៖ “ផ្តើមពីរបរនេះ ក្នុងមួយថ្ងៃខ្ញុំអាចរកបានប្រាក់ប្រហែល ២០០ ពាន់ ទោះបីវាមិនមែនជាចំនួនច្រើនក៏ដោយ ប៉ុន្តែគ្រប់គ្រាន់សម្រាប់ចំណាយក្នុងការរស់នៅប្រចាំថ្ងៃបាន”។ ប្រាក់ចំណូលបន្ថែមនេះបានជួយគ្រួសារបងស្រី Bích ឱ្យមានស្ថិរភាពជីវិតរបស់ពួកគេបន្តិចម្តងៗ និងបង្កលក្ខណៈកាន់តែប្រសើរឡើងសម្រាប់កូនៗរបស់ខ្លួន។
កម្មាភិបាលនៃកងទ័ពការពារព្រំដែនសមុទ្រ Cái Đôi Vàm ចុះពិនិត្យ និងសួរសុកទុក្ខជីវភាពរស់នៅរបស់បងប្អូននារីនៅភូមិភាគ។
បណ្តាបងប្អូនស្ត្រីដែលមានវ័យចំណាស់ជាច្រើននៅ Cái Đôi Vàm ក៏ធ្វើការយ៉ាងឧស្សាហ៍ព្យាយាមជាមួយមុខរបរនេះដែរ។ តួយ៉ាងដូចជាអ្នកមីង Nguyễn Thị Nào (អាយុ ៦០ ឆ្នាំ រស់នៅភូមិលេខ ៣) ជាអ្នកផ្សារភ្ជាប់ជាមួយរបរប៉ះដេរសំណាញ់នេសាទតាំងពីក្មេង។ ជាច្រើនឆ្នាំកន្លងមកនេះ តាំងពីរៀបការរហូតដល់មានកូនចៅជាច្រើន អ្នកមីងបានរក្សាមុខរបរនេះជាផ្នែកមួយដែលមិនអាចខ្វះបានក្នុងជីវភាពរស់នៅរបស់ខ្លួន។ សម្រាប់អ្នកមីង របរប៉ះដេរសំណាញ់នេសាទមិនត្រឹមតែជាមធ្យោបាយសម្រាប់ការរស់នៅប៉ុណ្ណោះទេ ប៉ុន្តែវាក៏ជាទម្លាប់ និងក្តីសប្បាយរីករាយផងដែរ។
របរប៉ះដេរសំណាញ់នេសាទមិនត្រឹមតែផ្តល់នូវប្រភពប្រាក់ចំណូលប៉ុណ្ណោះទេ ថែមទាំងបានជួយឱ្យបងប្អូននារីទាំងឡាយមានទំនុកចិត្ត និងសកម្មជាងមុនក្នុងការរស់នៅទៀតផង។ សម្រាប់បងប្អូននារីនៅតាមតំបន់ឆ្នេរសមុទ្រ Cái Đôi Vàm ពោលគឺលែងពឹងផ្អែកទាំងស្រុងលើប្រាក់ចំណូលរបស់ប្តីខ្លួនទៀតហើយ ប៉ុន្តែអាចចែករំលែកបន្ទុកសេដ្ឋកិច្ច រួមចំណែកដល់ការកែលម្អជីវភាពគ្រួសារ រួមជាមួយនឹងការបំពេញការងារផ្ទះ និងចិញ្ចឹមទុន្មានកូនរបស់ខ្លួនបានយ៉ាងល្អទៀតផង៕
Thanh Hải
