មិនពឹងផ្អែកលើដំណាំតែមួយប្រភេទប៉ុណ្ណោះទេ គ្រួសារបងប្អូនជនរួមជាតិភាគតិចជាច្រើនលើភូមិសាស្ត្រខេត្ត បានម្ចាស់ការធ្វើពិពិធកម្មផលិតកម្ម ឆ្លៀតយកដីធ្លីគ្រប់កុងដើម្បីបង្កើតប្រភពចំណូលបន្ថែម។ ចាប់ពីដំណាំរួមផ្សំរយៈពេលខ្លី រហូតដល់ខ្ទឹមក្រហម ទំពាំងបារាំង ម្ទេស និងពូជដំណាំគ្រប់ប្រភេទ ទម្រង់នីមួយៗកំពុងបើកចេញនូវទិសដៅមុខរបរចិញ្ចឹមជីវិតបន្ថែម រួមចំណែកលើកកម្ពស់ប្រាក់ចំណូល ធ្វើឱ្យជីវភាពមានស្ថិរភាព។
បងស្រី ថាយធីហា សម្អាតចម្ការដំណាំរួមផ្សំ ត្រៀមរៀបចំសម្រាប់ការដាំដុះរដូវថ្មី។
ជាង ២០ ឆ្នាំផ្សារភ្ជាប់ជាមួយចម្ការដំណាំរួមផ្សំ ប្ដីប្រពន្ធបងស្រី ថាយធីហា នៅអនុសង្កាត់បៀនតី សង្កាត់ហ៊ីបថាញ់ បានឆ្លៀតយកផ្ទៃដីជាង ៤ កុង ដើម្បីដាំឆ្លាស់ដំណាំ និងបង្កើនរដូវបណ្ដាប្រភេទដំណាំផ្សេងៗរួមផ្សំរយៈពេលខ្លី ដូចជា៖ ស្ពៃតឿ ស្ពៃឈើ ស្ពៃផ្អែម ស្ពៃខៀវ និងស្លឹកខ្ទឹម។ រៀងរាល់មួយខែប្ដូររបៀបដាំថ្មី អាស្រ័យហេតុនោះ ក្រុមគ្រួសាររក្សាបានបន្លែជាច្រើនរដូវក្នុងមួយឆ្នាំ។
ឆ្នាំកន្លងហើយ បងស្រី ហា បានក្លាហានដាំសាកល្បងខ្ទឹមក្រហមហូឡង់ Maserati លើផ្ទៃដី ២ កុង។ ក្រោយរយៈពេល ៣ ខែ បន្ទាប់ពីគិតចំណាយរួចរាល់ គ្រួសារនូវចំណេញបានជាង ២០ លានដុង។ ឃើញថាមានប្រសិទ្ធភាព បងស្រីបន្តដាក់ពូជដាំរដូវថ្មីបន្តទៀត។ ចំណូលសរុបក្រោយពេលគិតចំណាយរួចរាល់ សម្រេចបានជាង ១០០ លានដុងក្នុងមួយឆ្នាំ។
បងស្រី ថាយធីហា បានឱ្យដឹង៖ «ខ្ទឹមក្រហមមានរយៈពេលលូតលាស់ប្រហែល ៣ ខែ ប្រសិនបើថែទាំបានល្អ នឹងផ្តល់ប្រសិទ្ធភាពខ្ពស់បង្គួរ។ ការផ្សំបញ្ចូលដំណាំរួមផ្សំជាច្រើនប្រភេទ ជួយឱ្យក្រុមគ្រួសារមានប្រភពចំណូលជាប្រចាំ ធ្វើឱ្យជីវភាពមានស្ថិរភាព និងផ្គត់ផ្គង់កូនៗរៀនសូត្រទៀតផង»។
នៅអនុសង្កាត់បៀនតី លោក ត្រឹងជីក្វាង ក៏បានជ្រើសរើសទិសដៅផលិតចម្រុះលើផ្ទៃដីជាង ២ ហិកតា ជាមួយដំណាំមៀនថាញ់ញ៉ាន ផ្លែយៀត និងទំពាំងបារាំង ដោយឡែកទំពាំងបារាំងរក្សាទុកប្រមាណ ៦.០០០ ម៉ែត្រការ៉េ។ ក្រោយរយៈពេលជាង ៥០ ឆ្នាំមានបទពិសោធន៍ធ្វើកសិកម្ម គាត់បានបង្វែរមកបណ្តុះពូជដំណាំ ដើម្បីផ្គត់ផ្គង់ជូនបងប្អូនកសិករ។
មានពេលខ្លះ គាត់បណ្តុះពូជទំពាំងបារាំងរាប់ពាន់ដើមទៀតផង។ ដោយឡែកក្នុងឆ្នាំនេះ ពូជ ម្ទេសជាង ៣ ពាន់ដើមត្រូវបានបណ្តុះតាមការកុម្ម៉ង់ទិញ។ បណ្ដាប្រភពចំណូលឆ្លាស់គ្នានាំមកជូនក្រុមគ្រួសារប្រមាណ ២០០ លានដុងក្នុងមួយឆ្នាំ។
លោក ត្រឹងជីក្វាង បានចែករំលែកថា៖ «ការឆ្លៀតយកបទពិសោធន៍ក្នុងការផលិតដើម្បីបណ្តុះពូជដំណាំ ជួយឱ្យខ្ញុំកាត់បន្ថយកម្លាំងពលកម្មបានច្រើន ព្រមទាំងមានប្រភពចំណូលបន្ថែម។ សេដ្ឋកិច្ចគ្រួសារអាស្រ័យផ្តោតលើនោះ ក៏កាន់តែមានស្ថិរភាពឡើងជាលំដាប់»។
ឆ្នាំនេះ លោក ត្រឹងជីក្វាង បណ្តុះម្ទេសពូជជាង ៣ ពាន់ដើមតាមការកុម្ម៉ង់ទិញ នាំមកនូវប្រភពចំណូលមានស្ថិរភាពសម្រាប់ក្រុមគ្រួសារផងដែរ។
គ្រួសារនីមួយៗមានរបៀបផលិតរៀងៗខ្លួន ប៉ុន្តែចំណុចរួមគឺសុទ្ធតែសំដៅដល់គោលដៅបង្កើតប្រភពចំណូលជាច្រើនលើផ្ទៃដីដដែល។ របៀបធ្វើនេះមិនត្រឹមតែលើកកម្ពស់តម្លៃផលិតប៉ុណ្ណោះទេ ថែមទាំងជួយឱ្យកសិករម្ចាស់ការជាងមុនចំពោះការប្រែប្រួលនៃដំណាំនីមួយៗ និងទីផ្សារផងដែរ។រួមដំណើរជាមួយបងប្អូនកសិករ សហករណ៍កសិកម្ម ឡុកទីម Farm នៅសង្កាត់ហ៊ីបថាញ់ ផ្គត់ផ្គង់ពូជ សម្ភារកសិកម្ម ឧបត្ថម្ភបច្ចេកទេស ធានាទិញកសិផល និងផ្សារភ្ជាប់បណ្ដាប្រភពទុនកម្ចីអនុគ្រោះដើម្បីវិនិយោគផលិតកម្ម។ ចាប់ពីទំពាំងបារាំង ម្ទេសស្នែងមាស រហូតដល់ខ្ទឹមក្រហម ទម្រង់នានាដែលឈានដំបូងផ្តល់ប្រសិទ្ធភាព កំពុងត្រូវបានសហករណ៍សហការជាមួយមូលដ្ឋានបន្តផ្សព្វផ្សាយ និងពង្រីកផងដែរ។
តាមសម្ដីលោក ឡឹមវ៉ាំងត្រន ប្រធានក្រុមប្រឹក្សាភិបាលសហករណ៍កសិកម្ម ឡុកទីមហ្វាម សហករណ៍កំពុងផ្តោតលើបណ្ដាទម្រង់គំរូទំពាំងបារាំង ម្ទេសស្នែងមាស និងខ្ទឹមក្រហម ព្រមទាំងមានបំណងបន្តទទួលបានការឧបត្ថម្ភអំពីប្រភពទុន ដើម្បីរួមដំណើរជាមួយកសិករក្នុងរដូវផលិតកម្ម ២០២៦-២០២៧។
ផ្តើមពីបណ្ដាចម្ការដំណាំរួមផ្សំ នៅពេលដែលដំណាំត្រូវបានធ្វើពិពិធកម្ម បច្ចេកទេសត្រូវបានអនុវត្តសមស្រប ទីផ្សារប្រើប្រាស់ និងប្រភពទុនត្រូវបានផ្សារភ្ជាប់ តម្លៃលើដីធ្លីគ្រប់កុងត្រូវបានលើកកម្ពស់។ បណ្ដាទម្រង់គំរូប្រកបដោយប្រសិទ្ធភាព កំពុងបង្កើតជម្រើសមុខរបរចិញ្ចឹមជីវិតបន្ថែម ជួយឱ្យបងប្អូនជនជាតិភាគតិចលើកកម្ពស់ប្រាក់ចំណូលជាជំហានៗ ធ្វើឱ្យជីវភាពមានស្ថិរភាព និងម្ចាស់ការឈានឡើងដោយសក្តានុពលជាក់ស្តែងរបស់ស្រុកកំណើត៕
អត្ថបទនិងរូប៖ គីមទ្រុក
រូបថត៖ អាញ់ទ្វឹន
