យោងតាមការវាយតម្លៃរបស់លោកស្រី Nguyễn Thu Tư ប្រធានមន្ទីរជនជាតិ និងសាសនា ការអនុវត្ត និងការរៀបចំកម្មវិធីគោលដៅជាតិអភិវឌ្ឍន៍សេដ្ឋកិច្ច-សង្គមតំបន់ជនរួមជាតិភាគតិច និងតំបន់ភ្នំ សម្រាប់ដំណាក់កាល ២០២១-២០៣០ ដំណាក់កាលទី១៖ ពីឆ្នាំ ២០២១-២០២៥ (កម្មវិធី) លើភូមិសាស្ត្រខេត្ត រហូតមកទល់ពេលនេះ សម្រេចបានប្រសិទ្ធភាព។ បណ្តាគម្រោង និងអនុគម្រោងការមួយចំនួនដែលមានឥទ្ធិពលខ្លាំង និងប៉ះពាល់ដោយផ្ទាល់ដល់ជនរួមជាតិភាគតិច និងតំបន់ជនជាតិភាគតិច ក៏ត្រូវបានខេត្តផ្ដល់អាទិភាពលើធនធាន ដើម្បីអនុវត្ត (ជិត៧៥%នៃទុនសរុបរបស់កម្មវិធីទាំងមូល) ដែលបានបង្ហាញពីប្រសិទ្ធភាពជាវិជ្ជមាន ហើយអត្រានៃការចែកចាយដើមទុនប្រចាំឆ្នាំ សុទ្ធតែសម្រេចបានលើសពី៩០%។
គោលនយោបាយឧបត្ថម្ភពីកម្មវិធីគោលដៅជាតិសម្រាប់ការអភិវឌ្ឍន៍សេដ្ឋកិច្ច-សង្គមតំបន់ជនរួមជាតិភាគតិចបានបង្កលក្ខណៈសម្រាប់បងប្អូនប្រជាជនអភិវឌ្ឍសេដ្ឋកិច្ចគ្រួសារ។
ក្នុងបណ្តាខែដែលនៅសល់នៃឆ្នាំ ២០២៥ ខេត្តនឹងផ្ដោតលើការយកចិត្តទុកដាក់ ខិតខំសម្រេចឱ្យបាន១០០%នូវគោលដៅ និងផែនការបើកដើមទុន។ ប្រញាប់ប្រញាល់បង្កើនល្បឿននៃសំណង់ និងគម្រោងដែលកំពុងដំណើរការ។ ធានាគោលនយោបាយឧបត្ថម្ភបានទៅដល់មុខសញ្ញាត្រឹមត្រូវ ទាន់ពេលវេលា និងបង្ហាញពីប្រសិទ្ធភាពជាក់ស្ដែង។
លោកស្រី Nguyễn Thu Tư បានបន្ថែមថា៖ "ជាមួយនឹងភារកិច្ចដែលបានបែងចែកជាអង្គភាពដឹកនាំគ្រប់គ្រងកម្មវិធី មន្ទីរជនជាតិ និងសាសនា តែងតាមដាន និងជំរុញវឌ្ឍនភាពជានិច្ច។ បង្កើតក្រុមការងារចុះទៅមូលដ្ឋានជាក់ស្ដែងតាមតំបន់មានការលំបាកខ្លាំង ដើម្បីក្ដាប់ស្ថានការណ៍ ណែនាំ និងដោះស្រាយរាល់ការលំបាក ជាប់ជំពាក់ដែលកើតឡើងឱ្យបានទាន់ពេល ក៏ដូចជាការបូកសរុបធ្វើសេនាធិការជូនគណៈកម្មាធិការប្រជាជនខេត្ត ដើម្បីពិនិត្យ និងចង្អុលការណែនាំចំពោះបញ្ហាដែលលើសពីសមត្ថកិច្ច។ យោងលើមូលដ្ឋាននេះ ត្រូវមានភាពម្ចាស់ការក្នុងកិច្ចសហការជាមួយ មន្ទីរ ស្ថាប័ន និងមូលដ្ឋាននានាឱ្យបានឆាប់រហ័ស និងខ្លាំងក្លាថែមទៀតក្នុងការរៀបចំអនុវត្តគម្រោង និងអនុគម្រោងការ ព្រមទាំងខ្លឹមសារផ្សេងៗដែលស្ថិត ក្រោមកម្មវិធីរបស់ខេត្ត ដើម្បីឆ្ពោះទៅសម្រេចនូវគោលដៅ និងភារកិច្ចរបស់កម្មវិធីតាមផែនការដែលបានដាក់ចេញដល់ចុងឆ្នាំ ២០២៥"។
ម្យ៉ាងវិញទៀត ប្រធានគណៈកម្មាធិការប្រជាជនខេត្តក៏បានក្រើនរំឭក និងបង្គាប់ជាទូទៅយ៉ាងច្រើនលើកចំពោះកម្មវិធីគោលដៅជាតិទាំងបីរបស់ខេត្ត ដោយក្នុងនោះបានតម្រូវឱ្យប្រធានមន្ទីរ គណៈផ្នែក ស្ថាប័នថ្នាក់ខេត្ត និងប្រធានគណៈកម្មាធិការប្រជាជនឃុំ សង្កាត់ ត្រូវលើកកម្ពស់ស្មារតីទទួលខុសត្រូវក្នុងការដឹកនាំ ចង្អុលបង្ហាញ រៀបចំអនុវត្តឱ្យបានយ៉ាងម៉ឺងម៉ាត់ ខ្លាំងក្លា ស្រុះគ្នា ទាន់ពេលវេលា និងប្រកបដោយប្រសិទ្ធភាពនូវភារកិច្ច និងដំណោះស្រាយផ្សេងៗស្ដីពីការបង្កើនល្បឿនអនុវត្ត ខិតខំចែកចាយប្រភពដើមទុនតាមកិច្ចចង្អុលការរបស់នាយករដ្ឋមន្ត្រី។
ប្រគល់ភារកិច្ចឱ្យមន្ទីរហិរញ្ញវត្ថុ (អង្គភាពប្រចាំការនៃកម្មវិធីគោលដៅជាតិ) ចាត់តាំងកម្មាភិបាលទទួលខុសត្រូវក្នុងការណែនាំ ជំរុញបណ្ដាស្ថាប័ន និងមូលដ្ឋានធ្វើបច្ចុប្បន្នភាពលទ្ធផលនៃការបើកដើមទុនប្រចាំសប្ដាហ៍ទៅក្នុងតារាងតាមដានវឌ្ឍនភាពនៃការប្រឡងប្រណាំង (តាមប្រព័ន្ធអេឡិចត្រូនិក) ក្នុងការអនុវត្តកម្មវិធីគោលដៅជាតិ។ យោងតាមនោះ ធ្វើជាសេនាធិការជូនប្រធានគណៈកម្មាធិការប្រជាជនខេត្តក្នុងការរៀបចំកិច្ចប្រជុំត្រួតពិនិត្យការងាររៀងរាល់ពីរសប្ដាហ៍ម្ដងជាមួយ អង្គភាព ម្ចាស់វិនិយោគដែលមានអត្រាបើកដើមទុនទាប ឬមានការលំបាក ជាប់ជំពាក់ត្រូវការដោះស្រាយជាបន្ទាន់។
ការផ្សព្វផ្សាយរាល់ខ្លឹមសាររបស់កម្មវិធីត្រូវបានសមាគម និងអង្គការនានាជំរុញយ៉ាងខ្លាំងក្លា ដើម្បីប្រជាជនយល់ច្បាស់ និងអនុវត្ត។
លោកស្រី Nguyễn Thu Tư បានបន្ថែមទៀតថា ក្រៅពីការប្ដេជ្ញាចិត្តសម្រាប់ផ្នែកខាងនយោបាយ និងការអនុវត្តភារកិច្ច និងដំណោះស្រាយស្រុះគ្នា ដើម្បីលើកកម្ពស់ប្រសិទ្ធភាពនៃការអនុវត្តកម្មវិធី ខេត្ត Cà Mau បានស្នើមជ្ឈិមពិនិត្យដំឡើងកម្រិតឧបត្ថម្ភថវិកាចំពោះគោលនយោបាយស្ដីពីដីធ្លីលំនៅឋាន ផ្ទះសម្បែង ដីផលិតកម្ម ការផ្លាស់ប្ដូរមុខរបរ ទឹកស្អាតប្រើប្រាស់ និងហេដ្ឋារចនាសម្ព័ន្ធចាំបាច់ ឱ្យសមស្របនឹងអត្រាវិនិយោគជាក់ស្ដែងនៅតំបន់ជនរួមជាតិភាគតិច។បន្ថែមធនធានដើម្បីឧបត្ថម្ភដល់មូលដ្ឋានក្នុងការឆ្លើយតបនឹងការប្រែប្រួលអាកាសធាតុ (គ្រោះរាំងស្ងួត ការជ្រាបជាតិប្រៃ ការស្រុតបាក់ដីតាមមាត់ព្រែក និងឆ្នេរសមុទ្រ) ភ្ជាប់ជាមួយនឹងការអភិវឌ្ឍជីវភាពរស់នៅ និងលំនឹងអាសយជននៅតំបន់ជនរួមជាតិភាគតិច។បង្កើនការបែងចែកអំណាច និងការប្រគល់សិទ្ធិឱ្យកាន់តែច្បាស់លាស់ដើម្បីឱ្យមូលដ្ឋានមានភាពម្ចាស់ការ និងបត់បែនជាងមុនក្នុងការរៀបចំអនុវត្ត និងដោះស្រាយបញ្ហាដែលកើតឡើងឱ្យបានទាន់ពេលវេលា។ ពិនិត្យ និងចេញយន្តការអនុញ្ញាតឱ្យមានការកែសម្រួលទុនប្រកបដោយភាពបត់បែនរវាងគម្រោង និងអនុគម្រោងការ ព្រមទាំងខ្លឹមសារផ្សេងៗរបស់កម្មវិធី ដើម្បីដោះស្រាយស្ថានភាពនៃការបែងចែកទុនមិនសមស្របនឹងតម្រូវការ (មានខ្លឹមសារត្រូវការទុនច្រើន ប៉ុន្តែតម្រូវការតិចនិងផ្ទុយមកវិញ) ធានាបាននូវការប្រើប្រាស់ធនធានប្រកបដោយប្រសិទ្ធភាព និងឆ្លើយតបបានទាន់ពេលនឹងតម្រូវការចាំបាច់របស់ជនរួមជាតិ។
"ក្នុងទិសដៅរយៈពេលយូរ ខេត្តក៏បានស្នើមជ្ឈិមពិនិត្យស្រាវជ្រាវ និងលើកកម្មវិធីដំណាក់កាលទី២ (២០២៦-២០៣០) តាមទិសដៅផ្ដោតធនធានលើគម្រោងការ និងអនុគម្រោង ឧបត្ថម្ភដោយផ្ទាល់ដល់តំបន់ជនរួមជាតិភាគតិច និងបុគ្គលជាអ្នកទទួលផល ជាជនរួមជាតិភាគតិច។ ផ្ដល់អាទិភាពដល់ជីវភាពរស់នៅ បង្កើតការងារ ដីធ្លីលំនៅឋាន ផ្ទះសម្បែង ទឹកស្អាតប្រើប្រាស់ ហេដ្ឋារចនាសម្ព័ន្ធចាំបាច់ ភ្ជាប់នឹងការឆ្លើយតបនឹងការប្រែប្រួលអាកាសធាតុ។ កាត់បន្ថយជាបណ្ដើរៗនូវខ្លឹមសារដែលមានលក្ខណៈជាការស្រាវជ្រាវ និងដោយប្រយោល ដើម្បីធនធានទៅដល់ប្រជាជនបានលឿន និងជាក់ស្ដែងជាងមុន។ ដោយការប្ដេជ្ញាចិត្តផ្នែកនយោបាយខ្ពស់ ការយកចិត្តទុកដាក់ពីមជ្ឈិម និងការខិតខំប្រឹងប្រែងរបស់ប្រព័ន្ធទាំងមូល ខេត្តជឿជាក់ថាកម្មវិធីនឹងសម្រេចបាននូវគោលដៅដំណាក់កាលទី១ បង្កើតជាមូលដ្ឋានដ៏ល្អប្រសើរដើម្បីឆ្ពោះទៅដំណាក់កាលទី២ ដោយលទ្ធផលគ្រប់ជ្រុងជ្រោយ និងស្ថេរភាពជាង" លោកស្រី Nguyễn Thu Tư បានមានប្រសាសន៍៕
Quỳnh Anh
