ដើម្បីដោះស្រាយនីតិវិធីរដ្ឋបាលឱ្យបានឆាប់រហ័សសម្រាប់ប្រជាពលរដ្ឋ ជាពិសេសមនុស្សចាស់ ជនពិការ និងមុខសញ្ញាងាយរងគ្រោះ ឃុំ Vĩnh Lợi ក៏បានបង្កើតក្រុមដោះស្រាយនីតិវិធីរដ្ឋបាលចល័ត។ ចាប់តាំងពីពេលដែលបានដំណើរការ ទម្រង់នេះទទួលបានការគាំទ្រយ៉ាងខ្លាំងពីប្រជាពលរដ្ឋក្នុងតំបន់។
ក្រុមដោះស្រាយនីតិវិធីរដ្ឋបាលចល័តនៅឃុំ Vĩnh Lợi បានចុះទៅដល់ភូមិ Mặc Đây ដើម្បីណែនាំ និងដោះស្រាយនីតិវិធីរដ្ឋបាលជូនបងប្អូនប្រជាជន។
ទោះបីទើបតែបានអនុវត្តថ្មីៗនេះក៏ដោយ ក្រុមដោះស្រាយនីតិវិធីរដ្ឋបាលចល័តក៏បានបង្ហាញពីប្រសិទ្ធភាពយ៉ាងច្បាស់លាស់។ នៅភូមិ Mắc Đây ប្រជាពលរដ្ឋមានសេចក្តីសោមនស្សរីករាយជាខ្លាំងដែលកម្មាភិបាលបានមកដល់ផ្ទះរបស់ខ្លួនដើម្បីណែនាំ ទទួលយក និងដោះស្រាយនីតិវិធីរដ្ឋបាល។
លោក Triệu Hiệp Diếp អាយុ ៧៥ ឆ្នាំ បានចែករំលែកថា៖ «ដោយសារតែមានវ័យចាស់ជរា និងជួបលំបាកក្នុងការធ្វើដំណើរ ហើយទទួលបានការជំនួយអនុវត្តនីតិវិធីរដ្ឋបាលនៅក្នុងតំបន់លំនៅដ្ឋានក៏ជួយឱ្យខ្ញុំ ព្រមទាំងបងប្អូនប្រជាជនដទៃមានលក្ខណៈងាយស្រួលណាស់ដែរ»។
ក្រុមដោះស្រាយនីតិវិធីរដ្ឋបាលចល័តឃុំ Vĩnh Lợi យមានសមាជិក ១៣ នាក់។ ភារកិច្ចរបស់ក្រុមគឺណែនាំ ទទួលយក ដំណើរការ និងផ្តល់លទ្ធផលនៃនីតិវិធីរដ្ឋបាលនៅលំនៅដ្ឋានរបស់មនុស្សចាស់ ជនពិការ អ្នកដែលមានសគុណលើបដិវត្តន៍ គ្រួសារអ្នកទទួលផលគោលនយោបាយ និងមុខសញ្ញាងាយរងគ្រោះផ្សេងទៀតតាមការកំណត់។ ទន្ទឹមនិងនោះ ជំនួយឧបត្ថម្ភដល់អង្គការ និងបុគ្គលក្នុងការអនុវត្តនីតិវិធីរដ្ឋបាលតាមប្រព័ន្ធអេឡិចត្រូនិក ប្រើប្រាស់លេខកូដ និងកំណត់អត្តសញ្ញាណអេឡិចត្រូនិក VNeID ការដាក់ពាក្យសុំតាមអ៊ីនធឺណិត ទូទាត់តាមអ៊ីនធឺណិត និងការប្រើប្រាស់សេវាកម្មប្រៃសណីយ៍សាធារណៈ។
លើសពីនេះ ក្រុមការងារថែមទាំងទទួលបានមតិយោបល់ និងការផ្តល់យោបល់ពីអង្គការ និងបុគ្គលទាក់ទងនឹងការដោះស្រាយនីតិវិធីរដ្ឋបាល។ ដោះស្រាយយ៉ាងឆាប់រហ័ស ឬរាយការណ៍ទៅផ្នែកសមត្ថកិច្ចសម្រាប់ការពិចារណា និងដោះស្រាយបានទាន់ពេលទៀតផង។
នៅភូមិ Mặc Đây ប្រជាជនភាគច្រើនបានអនុវត្តបែបបទរដ្ឋបាលសម្រាប់ខាងវិស័យដីធ្លី និងបញ្ជីគ្រួសារ ព្រមទាំងសេចក្តីបញ្ជាក់ផ្សេងៗដទៃទៀត។
លោកស្រី Trương Thị Xuân Thảo នាយិកាមជ្ឈមណ្ឌលសេវាកម្មរដ្ឋបាលសាធារណៈឃុំ និងជាប្រធានក្រុមដោះស្រាយនីតិវិធីរដ្ឋបាលចល័តឃុំ Vĩnh Lợi បានឱ្យដឹង៖ “នៅពេលខាងមុខ ក្រុមការងារនឹងបន្តដំណើរការជាវេននៅតាមគ្រប់បណ្តាភូមិ សង្កាត់ ដោយផ្តល់អាទិភាពដល់តំបន់ដែលមានតម្រូវការខ្ពស់។ សកម្មភាពភាគច្រើននឹងត្រូវបានធ្វើឡើងនៅថ្ងៃសៅរ៍ និងថ្ងៃអាទិត្យ”។
ការបង្កើតក្រុមដោះស្រាយនីតិវិធីរដ្ឋបាលចល័តនៅឃុំ Vĩnh Lợi បានរួមចំណែកដល់ការនាំយកសេវាកម្មសាធារណៈឱ្យកាន់តែខិតជិតប្រជាជន ជាពិសេសអ្នកដែលប្រឈមមុខនឹងការលំបាកក្នុងការដឹកជញ្ជូន។ នេះមិនត្រឹមតែជួយសម្រួលដល់ការដោះស្រាយនីតិវិធីរដ្ឋបាលប៉ុណ្ណោះទេ ថែមទាំងជួយកាត់បន្ថយការចំណាយ សន្សំសំចៃពេលវេលាសម្រាប់ប្រជាពលរដ្ឋ បង្កើនគុណភាពសេវាកម្ម និងបង្កើនប្រសិទ្ធភាពនៃកំណែទម្រង់រដ្ឋបាលនៅមូលដ្ឋានផងដែរ៕
Trung Kiên
