តម្រូវការដើម្បីបានចូលជិត ជំនួយឧបត្ថម្ភ និងពិគ្រោះយោបល់ គឺជាតម្រូវការដ៏សមស្របរបស់បងប្អូនប្រជាជន ជាពិសេសសម្រាប់បងប្អូនតំបន់ជនជាតិភាគតិច។ កន្លងមក Cà Mau ក៏បានពង្រីកតួនាទី និងភារកិច្ចទទួលខុសត្រូវសង្គមរបស់មេធាវី យុត្តិវិទូ និងអ្នកជំនាញផ្នែកច្បាប់ក្នុងការផ្សព្វផ្សាយ និងអប់រំច្បាប់នៅតំបន់ជនជាតិភាគតិច។
គណៈមេធាវីទាំងឡាយចូលរួមពិគ្រោះយោបល់ខាងច្បាប់នៅនឹងកន្លែង។
នាដើមខែតុលាកន្លងហើយ គណៈមេធាវី Bạc Liêu (បន្ទុកខេត្ត Cà Mau) បានរៀបចំកម្មវិធី “ទិវាផ្តល់ពិគ្រោះដោយឥតគិតថ្លៃ” នៅឃុំ Hưng Hội។ មានមេធាវីជាង ៤០ នាក់បានចូលរួមក្នុងកម្មវិធីនេះ ភាគច្រើនសុទ្ធសឹងជាអ្នកមានបទពិសោធន៍ និងអតីតភាពការងារក្នុងវិស័យជំនួយផ្នែកច្បាប់ដល់ប្រជាជនលើភូមិសាស្ត្រខេត្ត។ វគ្គពិគ្រោះយោបល់បានទាក់ទាញការយកចិត្តទុកដាក់ជាពិសេសពីសំណាក់បងប្អូនតំបន់ជនរួមជាតិ Khmer នៅគ្រប់បណ្តាភូមិ។
ជាមួយកូនប្រុសបានមកទីនេះស្នើការពិគ្រោះយោបល់ដើម្បីទទួលបានលិខិតបញ្ជាក់ពីកម្មសិទ្ធិប្រើប្រាស់ដីធ្លី អ្នកមីង Thạch Thị Hiếu (ភូមិ Cù Lao) បានចែករំលែកថា៖ “គ្រួសារមានតម្រូវការចង់ទទួលបានការពិគ្រោះខាងច្បាប់ តែមិនដឹងថាត្រូវទៅទៅណា បើយើងទៅការិយាល័យច្បាប់ យើងខ្លាចបង់ប្រាក់ថ្លៃ។ ថ្ងៃនេះមានមេធាវីច្រើនរូបបានពិគ្រោះយោបល់ដោយមិនគិតថ្លៃពិតជាការល្អខ្លាំងណាស់!”។
បណ្តាខ្លឹមសារពិគ្រោះក្នុងកម្មវិធី សុទ្ធតែជាបញ្ហាច្បាប់យ៉ាងជាក់ស្តែង ដែលបងប្អូនប្រជាជនមានការចាប់អារម្មណ៍ តាំងពីរឿងតូចតាចនៅក្នុងគ្រួសារ និងនៅក្រៅសង្កាត់ ដូចជាវិវាទលើព្រំប្រទល់ដី ប្រឡាយទឹក និងទំនាក់ទំនងស៊ីវិល ប្រាក់កម្ចី ឬក៏លើវិស័យអាពាហ៍ពិពាហ៍ និងគ្រួសារ ដូចជាវិវាទលើការដណ្តើមសិទ្ធិចិញ្ចឹមកូន ការទទួលកេរដំណែលមរតក ធ្វើសំបុត្រកំណើតរបស់កូនដែលមានធាតុផ្សំពីបរទេស ។ល។ រហូតដល់បញ្ហាធំៗដូចជា ការប្រយុទ្ធប្រឆាំងនឹងការជួញដូរមនុស្ស ការក្លែងបន្លំ បង្កើតជាតិពុលលើបរិស្ថាន សុវត្ថិភាពចរាចរណ៍។ល។ សុទ្ធតែត្រូវបានបកស្រាយ និងណែនាំយ៉ាងច្បាស់លាស់។
សកម្មភាពនៃការពិគ្រោះយោបល់ខាងច្បាប់ដោយមិនគិតថ្លៃ គឺជារបៀបធ្វើដ៏ជាក់ស្តែង និងសមស្របជាមួយលក្ខណៈពិតប្រាកដ រួមចំណែកនាំយកច្បាប់ឱ្យចូលកាន់តែកៀកជិតថែមទៀតជាមួយ បងប្អូនប្រជាជន ជាពិសេសជនរួមជាតិភាគតិចលើភូមិសាស្ត្រ។
តាមរយៈការកំណត់ត្រា ប្រជាជនភាគច្រើនបានសម្តែងក្តីរំភើបនៅពេលដែលពួកគេមានបញ្ហាផ្លូវច្បាប់ ហើយបញ្ហាខាងគ្រួសារក៏បានឆ្លើយតប។ ទន្ទឹមនឹងនោះក៏មានបំណងចង់ឱ្យមានកម្មវិធីពិគ្រោះយោបល់ផ្នែកច្បាប់បែបនេះបន្ថែមទៀត និងកាន់តែមានភាពស៊ីជម្រៅបន្ថែមទៀត ដើម្បី ជួយបងប្អូនប្រជាជនមានលក្ខណៈចូលជិតបញ្ហាផ្លូវច្បាប់ដោយមិនគិតថ្លៃ ផ្តើមពីនោះ រួមចំណែកលើកកម្ពស់ចំណេះដឹងសម្រាប់ការអនុវត្តច្បាប់។
បងប្អូនប្រជាជនឃុំ Hưng Hội ចូលរួមទិវាពិគ្រោះយោបល់ខាងច្បាប់ដោយឥតគិតថ្លៃ។
លោកមេធាវី Nguyễn Duy Sơn ប្រធានគណៈមេធាវី Bạc Liêu បានសង្កត់ធ្ងន់ថា៖ “កាដែលក្រុមគណៈមេធាវីបានចាត់តាំងកម្មវិធី “ទិវាពិគ្រោះយោបល់ខាងច្បាប់ដោយឥតគិតថ្លៃ” សម្រាប់មាមីងបងប្អូននៅឃុំ Hưng Hội ដែលជាភូមិភាគមានបងប្អូនជនរួមជាតិ Khmer រស់នៅច្រើនកុះករ ជាទង្វើដ៏មានអត្ថន័យខ្លាំងណាស់។ ឆ្លងតាមរយៈនៃការពិគ្រោះយោបល់ មាមីងបងប្អូនក៏មានការលើកកម្ពស់ចំណេះដឹងខាងច្បាប់ យល់ច្បាស់ពីកម្មសិទ្ធិរបស់ខ្លួន និងគ្រួសារដែលត្រូវបានផ្លូវច្បាប់ និងរដ្ឋការពារ។ ទន្ទឹមនិងនោះ សម្រាប់អ្នកដែលទទួលបន្ទុកការងារខាងច្បាប់ ដូចជាកណៈមេធាវី ការយល់ដឹងកាន់តែបានជ្រៅជ្រះជាងសម្រាប់បេសកកម្មរបស់ខ្លួនក្នុងការផ្តល់ចំណេះដឹងខាងច្បាប់ជូនបងប្អូនប្រជាជន មិនត្រឹមតែនៅក្នុងសម័យកាត់ក្តីនៃតុលាការ និងនៅការិយាល័យច្បាប់ប៉ុណ្ណោះទេ ថែមទាំងបានស៊ីជម្រៅ និងបង្កភាពជិតស្និទ្ធជាមួយមហាជនទៀតផង”។
យោងតាមប្រសាសន៍លោកមេធាវី Nguyễn Duy Sơn បានឱ្យដឹង៖ ជាមួយភាពជោគជ័យនៃទិវាពិគ្រោះយោបល់ខាងច្បាប់នៅឃុំ Hưng Hội នាពេលខាងមុខ គណៈមេធាវីខេត្តនឹងបន្តសិក្សាស្រាវជ្រាវ និងសំណើរបន្ថែមនូវកម្មវិធីពិគ្រោះយោបល់ខាងច្បាប់សម្រាប់ភូមិភាគជាច្រើនទៀត ជាពិសេសតំបន់ឆ្ងាយដាច់ស្រយាល និងតំបន់ជនរួមជាតិភាគតិច។ តាមរយៈការឃោសនា ផ្សព្វផ្សាយ និងការអប់រំច្បាប់ បងប្អូនប្រជាជនទាំងឡាយគ្រប់រូបនឹងមានចំណេះដឹងបន្ថែមទៀត ដើម្បីការ ពារសិទ្ធិ និងផលប្រយោជន៍ស្របច្បាប់រៀងខ្លួន រួមចំណែកកសាងសង្គមប្រកបដោយស្ថិរភាព សុវត្ថិភាព និងអភិវឌ្ឍន៍៕
Kim Phượng
